Yezu Ali Ahubiri Omwanzi gw’Obwami

Kasanzi kasungunu enyuma z’okubatizibwa kwage, Yezu arhondera ahubiri ntya: ‘Obwami bwa Mungu buli hofi.’ Abanafunzi bakag’imukulikira erhi ali agera omu Galilaya n’omu Yudeya. Erhi Yezu agaluka omu vile y’emwabo e Nazareti, aja omu sinagogi, anayigula ecitabu cizinge ca Izaya anasoma ntya n’izu linene: ‘Yehova ampire iroho litagatifu lyo nyaliza omwanzi mwinja.’ Bici oko kwal’ihugwire? Oko kwal’ihugwire oku ciru akaba abantu bal’ilonzize babone Yezu ali ajira ebisomerine, akantu k’obulagirire bwenene karhumaga ahâbwa iroho litagatifu kwali kuyaliza omwanzi mwinja. Enyuma z’aho abwira abakag’imuyumvirhiza ntya: ‘Ene, obo bulebi bwahikirire.’

Enyuma z’aho, Yezu aja ebwa Nyanja y’e Galilaya, arhimanayo banafunzi bani bali badubi b’ensamaki. Abalalika omu kubabwira ntya: ‘Muyishe munkulikire, namujira badubi ba bantu.’ Egarhi k’abo banafunzi hali Petro, Andreya, Yakobo, na Yowane. Ho n’aho baleka omukolo gwabo gw’okuduba ensamaki bakulikira Yezu. Bagera omu Galilaya yoshi, baja bahubiri lugenda Obwami bwa Yehova. Bakag’ihubiri omu masinagogi, omu bibuye n’omu mabarabara. Ehitu hy’abantu hyakag’ibakulikira ngasi hoshi banajire. Emyanzi lugenda Yezu yalumira ngasi hoshi, ciru yahika n’omu maeneo ga kulî nk’e Siriya.

Erhi hagera akasanzi, Yezu aha banafunzi bage baguma na baguma obuhashe bw’okufumya abalwala n’okufukuza abazimu. Abandi bakamukulikira erhi ali ahubiri omu vile ziri lubero n’omu ngo ziri lubero. Bakazi banji bishwekerezi, bahiziremwo Mariya Magdalena, Yowane, Suzana, n’abandi, bakag’ishibirira Yezu n’entumwa zage.

Erhi Yezu ayus’ikomereza abanafunzi bage, abarhuma lyo baj’ihubiri. Erhi bahubiri omu eneo y’e Galilaya yoshi, bandi bantu banji baba banafunzi banabatizibwa. Bulya bantu banji bal’ilonzize babe banafuzi, Yezu abashushanya n’ishwa liyezire liri hofi lisarulwe. Aderha ntya: ‘Mushenge Yehova arhume bakozi banji b’okusarula.’ Enyuma z’aho acishoga banafunzi 70 anabarhuma babirhi babirhi lyo bagend’ihubiri omu Yudeya moshi. Bayigiriza abantu ba ngasi lubero lugenda Obwami bwa Mungu. Erhi abo banafunzi bagaluka, bagwerhe irala ly’okubwira Yezu ebi bacibwinire. Nta kantu Shetani akajijire kakayimanzize omukolo gw’okuhubiri.

Yezu arhôla emipango ly’abanafunzi bage bagendekera bajira ogo mukolo gw’obulagirire bwenene ciru n’enyuma z’okugaluka kwage empingu. Ababwira ntya: ‘Muyalize omwanzi mwinja omw’igulu lyoshi. Muyigirize abantu lugenda Akanwa ka Mungu, munababatize.’