Omukazi ah’Iriba

Enyuma za Pasaka, erhi Yezu n’abanafunzi bage bali bagaluka e Galilaya bagera e Samariya. Erhi bahika hofi n’evile y’e Sikara, Yezu ayimanga ahantu hakag’ihamagalwa iriba lya Yakobo. Erhi aba ali arhamukira aho, abanafunzi bage baja omu vile lyo baj’igula ebiryo.

Mukazi muguma ayish’idoma amishi ah’iriba. Yezu amubwira ntya: “Mpa nani amishi nywe.” Oyo mukazi aderha ntya: ‘Bulya gurhi oli wanganiza? Ndi mukazi Musamariya. Abayahudi barhaganiza Abasamariya.’ Yezu abwira oyo mukazi ntya: ‘Ocimanyage nie indi, wali wampuna amishi, nanal’inakuha amishi g’obuzine.’ Oyo mukazi amudosa ntya: ‘Bici olonzize okuderha? Orhagwerhi ciru ecirugu c’okudomeramwo.’ Yezu aderha ntya: ‘Ngasi muntu wanywa amishi namuha, ntamango akacifa ayumvirhe enyorha.’ Oyo mukazi aderha ntya: “Waliha, mpa nani kw’ago mishi.”

Enyuma z’aho Yezu amubwira ntya: ‘Genda ohamagale balo ayishe hano bw’iriba.’ Oyo mukazi amushuza ntya: ‘Ntajira mulume.’ Yezu aderha ntya: ‘Odesire okuli. Wamakaheruka karhanu, na buno olamire n’omulume orhali balo.’ Oyo mukazi aderha ntya: ‘Mbwine oku oli mulebi. Abantu b’eno munda baba bayemire oku rhwanaharamiza Mungu kw’eyi ntondo, cikone Abayahudi bohe banaderhe oku e Yeruzalemu yone rhwakaharamiza. Nyemire oku amango Masiya anayishe, ayish’irhuyigiriza gurhi rhwakaharamya.’ Enyuma z’aho Yezu aderha kantu kalebe arhalisag’ibwira ciru n’omuntu muguma. Aderha ntya: ‘Nie Masiya.’

Oyo mukazi alibirha aja omu vile y’emwabo anabwira Abasamariya ntya: ‘Ntanyize oku nabwine Masiya. Amanyire ngasi kantu kanyerekire. Muyishe mucilabire!’ Bakulikira oyo mukazi ebw’iriba banayumvirhiza enyigirizo za Yezu.

Abasamariya balalika Yezu abêre omu vile yabo. Ayusa nsiku ibirhi ali ayigiriza eyo munda, na bantu banji baba n’obuyemere muli ye. Abantu babwira oyo mukazi Musamariya ntya: ‘Enyuma z’okuyumvirhiza oyu mulume, rhukola rhumanyire oku kobinali ye wayokola igulu.’