Yezu Amacesa Ehekalu

Omu mango g’enkuba nzindikiriza y’omwaka gwa 30 K.K.K., Yezu aja e Yeruzalemu. Bantu banji bal’iyishire omu vile y’e Yeruzalemu oku lusiku lukulu lwa Pasaka. Oku Pasaka abantu bakag’ihâna ensimba nterekêro oku hekalu. Bantu baguma na baguma bakag’ikûla ensimba emwababwe, n’abandi bakag’izigulira e Yeruzalemu.

Erhi Yezu ahika omu hekalu, abona abantu bali bagulizamwo ensimba. Bakag’ilongeza ensaranga omu nyumpa y’okuharamizamwo Yehova! Gurhi Yezu ajijire? Aluka omuzareti anahulusamwo ebibuzi n’enkafu zali omu hekalu. Akulumbya ameza g’abantu bakag’ikâba ensaranga anabulagira ebikoroti byabo okw’idaho. Yezu abwira abakag’iguza engûku ntya: ‘Mukule ebi bintu muno! Mumanye mwakajira enyumpa ya Larha ebe nyumpa ya kugulizamwo!’

Abantu bali ebwa hekalu basomerwa enyanya z’ebi Yezu ajiraga. Abanafunzi bage bakengera obulebi bwal’ibuyerekire Masiya bwali budesire ntya: ‘Nayish’iba na bushiru bunji enyanya z’enyumpa ya Yehova.’

Enyuma z’aho, omu mwaka gwa 33 K.K.K., Yezu ashub’icesa ehekalu obwa kabirhi. Arhalekaga ciru n’omuntu muguma abulire enyumpa y’Ishe obukenge.