Yezu Amagaluka Empingu

Yezu arhimanine n’abanafunzi bage e Galilaya. Abaha irhegeko ly’obulagirire bwenene: ‘Mugende mujire abanafunzi kurhenga oku bantu b’omu bihugo byoshi. Mubayigirize ebintu namuyigirizize, munababatize.’ Enyuma z’aho abalaganya ntya: ‘Mukengere oku naba haguma na ninyu ensiku zoshi.’

Omu nsiku 40 zakulikiraga okufûka kwa Yezu, abonekire amagana g’abanafunzi bage omu Galilaya n’omu Yeruzalemu. Abayigiriza amasomo g’obulagirire anajira bisomerine binji. Enyuma z’aho Yezu arhimanana n’abanafunzi bage obuzinda, oku Ntondo y’Emizeti. Aderha ntya: ‘Mumanye mwankarhenga e Yeruzalemu. Mugendekere mwalindirira ebi Larha alaganyagya.’

Entumwa zage zirhahugûkagwa ebi alonzagya okuderha. Zamudosa ntya: ‘K’okola waba Mwami w’e Israheli?’ Yezu aderha ntya: ‘Akasanzi Yehova ahebireho k’okunjira Mwami karhacihika. Hano hofi-hofi mwahâbwa obuhashe bw’iroho litagatifu, mwananaba bahamirizi bani. Mugende muhubiri omu Yeruzalemu, omu Yudea, omu Samariya, n’omu maeneo ga kulî bwenene g’igulu.’

Enyuma z’aho Yezu ahêkwa emalunga n’ebitu byamubwikira. Abanafunzi bage bagendekera bagalamira emalunga, cikone ali erhi anagenzire, arhanacikag’ibonekana.

Abanafunzi barhenga oku Ntondo y’Emizeti banaja e Yeruzalemu. Ngasi mango bakarhimanana omu cumpa c’enyanya ca nyumpa nguma, bananakashenga. Bakag’ilinga oku Yezu abaha obundi bulongozi.