Yezu Amabonekera Abadubi b’Ensamaki

Kasanzi kasungunu enyuma za Yezu okubonekera entumwa zage, Petro ahiga okugend’iduba ensamaki omu Nyanja y’e Galilaya. Tomasi, Yakobo, Yowane, n’abandi banafunzi bagenda haguma naye. Bayusa obudufu boshi bali baduba cikone barhagwarhaga ciru n’ensamaki nguma.

Erhi buca sezi olusiku lwakulikiraga, balangira omulume oyimanzire ebulambo. Oyo mulume abayakuza banali oku nyanja, ababwira erhi: ‘Ka hali ensamaki mwagwasire?’ Bamubwira ntya: “Nanga!” Oyo mulume ababwira ntya: “Mukwebe orhweshe rhwinyu ebwa kuboko kwinyu kulyo.” Erhi bajira ntyo, orhweshe rhwabo rhwabumba nsamaki nyinji bwenene, barhanahashaga okurhukûla omu mishi. Ho n’aho Yowane ahugûkwa oku oyo mulume anali Yezu, anaderha ntya: “Nyakasane oyo!” Ho n’aho, Petro acikweba omu mishi anayerekera ebulambo. Abandi banafunzi bamukulikira banali omu bwarho.

Erhi bahika ebulambo, babona omugati n’ensamaki biri oku ciko. Yezu ababwira balerhe oku nsamaki badubaga lyo baziyushula kw’ebi balya. Enyuma z’aho ababwira ntya: ‘Muyishe mulye.’

Erhi bayusa balya, Yezu adosa Petro ntya: ‘K’oba onzigire kulusha okuduba?’ Petro aderha ntya: ‘Neci, Nyakasane, omanyire oku mba nkuzigire.’ Yezu aderha ntya: ‘Olisagye ebibuzi byani.’ Yezu ashub’idosa ntya: ‘Petro, k’oba onzigire?’ Petro aderha ntya: ‘Nyakasane, omanyire oku mba nkuzigire.’ Yezu aderha ntya: “Yabula ebibuzi byani.” Yezu amudosa obwa kasharhu. Petro agaya bwenene. Aderha ntya: ‘Nyakasane, oba omanyire ngasi kantu. Omanyire oku mba nkuzigire.’ Yezu aderha ntya: “Olise abana-buzi bani.” Buzinda Yezu abwira Petro ntya: “Ogendekere wanshimba.”