Yezu Amafûka

Enyuma z’okufâ kwa Yezu, mulume muguma mugale wakag’ihamagalwa Yozefu ahûna Pilato oluhusa lw’okukûla omubiri gwa Yezu oku murhi. Yozefu aboha omubiri gwa Yezu omu bitambara binja agushîgako amalashi anaguhira omu nshinda mpyahya. Ahira ibuye linenene na lizirho oku muhango gw’eyo nshinda. Bakuhani babwira Pilato ntya: ‘Rhuyobohire oku hayish’iba mwanafunzi mulebe wa Yezu wayish’irhôla omubiri gwage, buzinda akaderhe oku Yezu anafûsire.’ Muli oko Pilato ababwira ntya: ‘Muhamike omuhango gw’eyo nshinda munahireko abalanzi.’

Nsiku isharhu enyuma z’aho, bakazi balebe balamukira ebwa nshinda banarhimana erhaciliko lir’ibuye. Malahika muguma walimw’eyo nshinda, abwira abo bakazi ntya: ‘Mumanye mwankayoboha. Yezu anafûsire. Gendi muj’ibwira abanafunzi bage oku bamurhimane e Galilaya.’

Mariya Magdalena alibirha ly’aj’ibona Petro na Yowane. Ababwira ntya: ‘Hali omuntu wahêsire omubiri gwa Yezu!’ Petro na Yowane balibirhira ebwa nshinda. Erhi babona oku nta kantu kali omu nshinda, bagaluka emwababwe.

Erhi Mariya agaluka ebwa nshinda, abona bamalahika babirhi balimwo anababwira ntya: ‘Ntamanyiri ngahi bahêsire Nnawirhu.’ Buzinda abona mulume muguma, anarhanya oku oyo mulume ali mulanzi, abwira oyo mulume ntya: ‘Wekasinga, ombwire ngahi wamuhizire.’ Cikone erhi oyo mulume aderha erhi “Mariya!” ho n’aho amanya oku anali Yezu. Mariya aderha ntya n’izu linene: “Mwigiriza!” anamuhobera. Yezu abwira Mariya ntya: ‘Genda aj’ibwira balumuna bani oku wambwine.’ Ho n’aho, Mariya alibirha aj’ibona abanafunzi anababwira oku anabwine Yezu.

Enyuma z’aho mw’olo lusiku, banafunzi babirhi bakag’ilambagira kurhenga e Yeruzalemu kuja e Emausi. Mulume muguma akalambagira haguma nabo anabadosa bici bali baganirira. Baderha ntya: ‘K’orhamanyiri oku hamagera nsiku isharhu kurhenga abakuhani banizire Yezu? Buno bakazi baguma na baguma bakola bali baderha oku anafûsire!’ Oyo mulume abadosa ntya: ‘Ka murhaba muyemire abalebi? Abalebi bali erhi badesire oku Kristu akafîre n’oku akafûsire.’ Agendekera abahugûlira Amandiko. Erhi bahika e Emausi, abo banafunzi babwira oyo mulume agende haguma nabo. Erhi biba bijingo n’erhi oyo mulume ayus’ishenga embere balye, bahugûkwa oku anali Yezu. Enyuma z’aho ahera.

Ho n’aho abo banafunzi babirhi balibirhira omu nyumpa entumwa zalimwo e Yeruzalemu banabwira ezo ntumwa ebi bacibwinire. Erhi baba bali mw’eyo nyumpa, Yezu ababonekera boshi. Oku murhondero, entumwa zirhayemeraga oku Yezu oyo ozibonekire. Enyuma z’aho Yezu aderha ntya: ‘Mulabe enfune zani; mumpumeko. Byali erhi byayandisirwe oku Kristu akafûsire.’