Abanafunzi Bamahâbwa Iroho Litagatifu

Nsiku ikumi enyuma za Yezu okugaluka empingu, abanafunzi bage bahâbwa iroho litagatifu. Kwali oku lusiku lukulu lw’Epentekoste y’omu mwaka gwa 33 K.K.K., n’abantu bal’irhenzire omu maeneo gali lubero bayisha e Yeruzalemu kw’olo lusiku lukulu. Hali hofi banafunzi ba Yezu 120 bal’irhimanine haguma omu cumpa c’enyanya ca nyumpa ndebe. Buzira kulangalira, akantu k’okusomeza kajirikana. Kantu kalebe kali nka muliro kakabonekana oku irhwe lya ngasi mwanafunzi, banarhondera baderha omu ndimi ziri lubero. Izu liri nka lya mpusi nnene lyayumvikana mw’eyo nyumpa yoshi.

Ebigolo byali e Yeruzalemu byarhengaga omu gandi maeneo byayumva ely’izu byanalibirhira mw’eyo nyumpa lyo bilaba ebyabire. Basomerwa bwenene okuyumva abanafunzi bali baderha ezo ndimi. Baderha ntya: ‘Aba bantu bali b’e Galilaya. Gurhi babiremwo n’obuhashe bw’okuderha endimi zirhu?’

Enyuma z’aho Petro n’ezindi ntumwa bayimanga embere z’abantu. Petro aganirira abantu lugenda gurhi Yezu anigagwa na gurhi Yehova amufûlaga. Petro aderha ntya: ‘Bunola Yezu akola ali empingu ekuboko kulyo kwa Mungu, anarhuhîre iroho litagatifu arhulaganyagya. Co carhumire mwabona n’okuyumva ebi bisomerine.’

Enderho za Petro zahuma abo bantu oku murhima bwenene, banadosa ntya: “Bici rhushinganine rhujire?” Petro ababwira ntya: ‘Muciyunjuze ebyaha binyu munabatizibwe omw’izino lya Yezu. Ninyu mwahâbwa engalo y’iroho litagatifu.’ Mw’olo lusiku, hofi bantu 3 000 babatizibwa. Kurhondera olo lusiku, abanafunzi bagendekera bayushuka duba-duba bwenene omu Yeruzalemu. Kugerera oburhabale bw’iroho litagatifu, entumwa zarhondeza bigamba binji bwenene lyo zihasha okuyigiriza abanafunzi ebintu byoshi Yezu azirhegekaga.