Yezu Amafûla Lazaro

Yezu al’igwerhe bîra basharhu ba hofi-hofi bal’ilamire e Betaniya. Mw’abo bîra basharhu hali Lazaro na bali babo babirhi, Mariya na Marta. Lusiku luguma erhi Yezu ali olundi lunda lw’e Yordani, Mariya na Marta bamurhumira ogu mwanzi: ‘Lazaro alwazire bwenene. Wekasinga oyishe duba!’ Cikone Yezu arhagendaga ho n’aho. Ashub’ibêra zindi nsiku ibirhi emunda ali n’enyuma z’aho abwira abanafunzi bage ntya: ‘Muyishe rhuje e Betaniya. Lazaro agwishire, nankola naj’imuzusa.’ Entumwa zage zaderha ntya: ‘Akaba Lazaro agwishire, oko kwamurhabala aciyumve bwinja.’ Yezu ababwira ntya n’obwalagale: ‘Lazaro anafîre.’

Erhi Yezu ahika e Betaniya, Lazaro ali amayusa nsiku ini ali omu nshinda. Ehitu hy’abantu bal’iyishire lyo barhuliriza Marta na Mariya. Erhi Marta ayumva oku Yezu ayishire, alibirhira emunda ali. Marta aderha ntya: “Nyakasane, ocibaga hano, mushinja wani arhankafîre.” Yezu amubwira ntya: ‘Mushinja wawe ashubilama. Marta, k’oyemire oko?’ Marta aderha ntya: ‘Nyemire oku ayish’ifûka omu mango g’obufûke.’ Yezu amubwira ntya: ‘Nie bufûke nie na buzine.’

Enyuma z’aho Marta ashimba Mariya anamubwira ntya: ‘Yezu ali hano.’ Mariya alibirhira emunda Yezu ali, n’ehitu hy’abantu hyamukulikira. Afukama aha magulu ga Yezu, anaja alaka bwenene. Aderha ntya: ‘Nyakasane, ocibaga hano, mushinja wirhu arhankafîre!’ Yezu abona kunganaci Mariya ali ababala, na Yezu naye arhondera alaka. Erhi abantu babona emirenge ya Yezu, baderha ntya: ‘Neci Yezu al’isimire Lazaro wa!’ Cikone bantu baguma na baguma baja badosanya ntya: ‘Carhumire arharhabala omwîra wage?’ Gurhi Yezu ajijire enyuma z’aho?

Yezu aja ebwa nshinda, yaliko ibuye linenene. Arhegeka ntya: ‘Mukule er’ibuye.’ Marta aderha ntya: ‘Cikone akola agwerhe nsiku ini abishirwe! Omubiri gwage gwaba gukola guli gwabaya.’ Ciru akaba ntyo, bakûla er’ibuye kw’eyo nshinda, na Yezu asalira ntya: ‘Larha, mvuzire omunkwa bulya onanyumve. Manyire oku onanyumve, cikone ndesire n’izu linene lyo aba bantu bamanya oku we wantumaga.’ Enyuma z’aho ayakuza ntya n’izu linene: “Lazaro, huluka!” Akantu k’okusomeza kajirikana: Lazaro arhenga omu nshinda, erhi omubiri gwage gubohirwe n’ebitambara. Yezu aderha ntya: “Shwekuli ye mumuleke agende.”

Bantu banji babonaga ebyo baba n’obuyemere muli Yezu. Cikone abandi bagenda baj’ibwira Abafarizeyi. Kurhondera olo lusiku, Abafarizeyi bakalonza okuniga Lazaro na Yezu. Muguma egarhi k’entumwa zage 12, wakag’ihamagalwa Yuda Iskariyoti, agenda bwifulikwe emunda Abafarizeyi bali anabadosa ntya: ‘Nsaranga inga mwampa erhi nakamurhabala lyo mugwarha Yezu?’ Bayemera okumuha nsaranga 30, na Yuda arhondera alonza obulyo bw’okuhira Yezu omu maboko g’Abafarizeyi.