Yezu Amafumya Omuntu Olusiku lw’Esabato

Abafarizeyi bal’ishombire Yezu banakag’ilonza ebyakarhuma bamushweka. Baderha oku arhashinganini afumye omuntu olusiku lw’Esabato. Lusiku luguma lw’Esabato, Yezu arhimana omulume muhurha wajaga ahûna-hûna omw’ibarabara. Abwira abanafunzi bage ntya: ‘Mulole gurhi obuhashe bwa Yehova bwarhabalamwo oyu mulume.’ Yezu atwira okw’idaho acanga amurhi gage omu katulo byaba bijondo, anabishiga oku masu g’oyo mulume wali muhurha. Yezu abwira oyo mulume ntya: ‘Jaga ocishuke omw’iriba lya Silowe.’ Oyo mulume ajira ntyo, n’enyuma z’aho abona n’amasu gage oburhangiriza omu kalamo kage.

Abantu bagaya. Baderha ntya: ‘K’arhali olya mulume oyu wajaga akahûna-hûna, nisi erhi amushushire kone?’ Oyo mulume aderha ntya: ‘Nie olya mulume waburhagwa muhurha!’ Abantu bamudosa ntya: ‘Bulya gurhigi orhaciri muhurha?’ Erhi abahugûlira gurhi byamuberire, bamuheka emw’Abafarizeyi.

Oyo mulume abwira Abafarizeyi ntya: ‘Yezu anashizire ebijondo oku masu gani amanambwira ngend’ibishuka. Namajira nk’oku anambwiraga, na nie ono oyu nkola ndi nabona.’ Abafarizeyi baderha ntya: ‘Erhi akaba Yezu ali abuka abantu olusiku lw’Esabato, kuli kuderha oku emisi yage erharhenziri emwa Mungu.’ Cikone abandi bakaderha ntya: ‘Erhi akaba emisi yage erhal’irhenzire emwa Mungu, arhankabire n’obuhashe bw’okufumya abantu.’

Abafarizeyi bahamagala ababusi b’oyo mulume banabadosa ntya: ‘Gurhi byaberire omwana winyu obu akola ali abona?’ Ababusi b’oyo mulume bayoboha bulya Abafarizeyi bali badesire oku ngasi muntu wanahire obuyemere bwage muli Yezu ayish’ifukuzibwa omu sinagogi. Muli oko baderha ntya: ‘Rhurhamanyiri. Mumudose mwene.’ Abafarizeyi badosa oyo mulume madoso manji bwenene kuhika ababwira ntya: ‘Namubwizire ebi manyire byoshi. Bulya gurhi mugendekire mwandosa amadoso?’ Abafarizeyi bagaya bwenene, banakweba oyo mulume embuga.

Yezu arhimana oyo mulume, anamudosa ntya: ‘K’ogwerhe obuyemere muli Masiya?’ Oyo mulume aderha ntya: ‘Nanaba n’obuyemere muli ye erhi nakamanya ye ndi.’ Yezu amubwira ntya: ‘Nie Masiya.’ Ebyo Yezu ajiraga byali binja bwenene. Arhali kufumya kone afumize oyo mulume cikone kandi amurhabire abe n’obuyemere.