Yezu Ali Alambagira oku Mishi

Arhali kufumya abantu kone n’okubafûla byone Yezu agwerhe obuhashe bw’okujira, cikone kandi agwerhe obuhashe oku mpusi n’oku nkuba. Erhi Yezu ayus’isalira oku ntondo, alangira Enyanja y’e Galilaya anabona elimo omulaba. Entumwa zage zali omu bwarho, zanakag’ivugama bwenene erhi omulaba guli omu nyanja. Yezu ayandagala arhondera alambagira oku mishi anayerekera emunda obwarho bwabo bwali. Erhi entumwa zibona omuntu oli walambagira oku mishi, zayoboha bwenene. Cikone Yezu ababwira ntya: ‘Nie ono. Mumanye mwankayoboha.’

Petro aderha ntya: ‘Nyakasane, akaba kobinali we oyo, ombwire nkushimbe.’ Yezu abwira Petro ntya: ‘Oyishe.’ Muli oko Petro arhenga omu bwarho erhi omulaba guli omu nyanja, arhondera alambagira oku mishi ayerekera emunda Yezu ali. Cikone erhi Petro ahika hofi n’aha Yezu ali, alaba omulaba anayoboha. Ayumva akola ali azika. Petro ayama ntya: ‘Nyakasane, ontabale!’ Yezu amugwarha okuboko, anaderha ntya: ‘Bici byarhumire waba n’akarhinda? Ngahi obuyemere bwawe buli?’

Yezu na Petro baja omu bwarho, na ho n’aho, omulaba gwahwa. Ka wanarhanya gurhi entumwa zaciyumvirhe? Zaderha ntya: “Okunali, oli Mwene Nnâmahanga.”

Arhali ago gone mango Yezu abire n’obuhashe oku misi y’igulu. Agandi mango, erhi Yezu n’entumwa zage bali baja olundi lunda lw’enyanja, Yezu aja enyuma omu bwarho anaja iro. Erhi aba ali iro, omulaba mudarhi gwaja omu nyanja. Ogo mulaba gwakakweba amishi omu bwarho, n’oko kwarhuma obwarho boshi bwabumba mishi. Entumwa zatula Yezu, zanakayama ntya: ‘Mwigiriza, kufâ kuno! Orhurhabale!’ Yezu azuka anabwira enyanja ntya: “Hulika!” Ho n’aho, omulaba n’enyanja byarhulirira. Yezu adosa entumwa ntya: ‘Ngahi obuyemere bwinyu buli?’ Bakabwirana ntya: “Empusi n’enyanja bidwirhe byamuyumva.” Entumwa zayiga oku erhi zakalangalira Yezu loshi-loshi, nta kantu zakayoboha ciru n’ehitya.