Yezu Amalisa Ebihumbi by’Abantu

Kasanzi kasungunu embere za Pasaka y’omu mwaka gwa 32 K.K.K., entumwa zagaluka kurhenga omu mukolo gw’amahubiri. Balirhamire bwenene, muli oko Yezu abahira omu bwarho abaheka e Betisayida, lyo bajirhamuka. Cikone erhi obwarho buyegerera ebulambo, Yezu abona ebihumbi by’abantu bakag’ibakulikira eyo. Ciru akaba Yezu al’ilonzize abe yene haguma n’entumwa zage, ayegereza abo bantu n’olukogo. Afumya abalwala bali egarhi kabo anarhondera abayigiriza. Yezu ayusa omulegerege goshi ali abayigiriza lugenda Obwami bwa Mungu. Erhi biba bijingo, entumwa zage zamuyegera zanamubwira ntya: ‘Abantu bakola bashalisire. Obaleke bacigendere baj’ilonza ebi balya.’

Yezu aderha ntya: ‘Kurhali kwa bulagirire bagende. Mubahe ebi balya.’ Entumwa zamudosa ntya: ‘K’olonzize rhujibagulira omugati?’ Ntumwa nguma yakag’ihamagalwa Filipo, yaderha ntya: ‘Ciru rhwakaba na nsaranga nyinji, rhurhakahash’igula emigati yayenera aba bantu boshi.’

Yezu adosa ntya: ‘Biryo binganaci rhugwerhe?’ Andreya ashuza ntya: ‘Rhugwerhe migati irhanu na nsamaki ibirhi nsungunu. Biri bisungunu bwenene.’ Yezu aderha ntya: ‘Munderhere eyo migati n’ezo nsamaki.’ Abwira abantu batamale oku byasi banajire ebigusho bya bantu 50 n’ebya bantu 100. Yezu arhôla eyo migati n’ezo nsamaki, alaba emalunga, anashenga. Enyuma z’aho Yezu aha entumwa zage ebyo biryo, n’entumwa zage zabigabira abantu. Balume 5 000, abakazi n’abana boshi balya kuhika bayigurha. Enyuma z’aho entumwa zarhologola ebyasigalaga byoshi, lyo harajiraga ebyafa busha. Bayunjuza ntanda 12 z’ebiryo! Eco cali cisomerine cinja bwenene, k’arhali ko?

Abantu basomerwa bwenene kuhika balonza okujira Yezu abe mwami wabo. Cikone Yezu al’imanyire oku arhali ako ko kasanzi Yehova al’ilonzize abe mwami. Muli oko abwira abantu bagende anabwira entumwa zage baje olundi lunda lw’Enyanja y’e Galililya. Entumwa zaja omu bwarho bwabo, na Yezu agenda yene omu ntondo. Bulya gurhi? Bulya al’ilonzize abe n’akasanzi k’okushenga Ishe. Ciru akaba Yezu agwerhe binji by’okujira, ngasi mango akag’icihiriraho akasanzi k’okusalira.