Korneliyo Amahâbwa Iroho Litagatifu

Omu Kaisariya, mwali mukulu muguma w’abasoda Muroma wakag’ihamagalwa Korneliyo. Ciru akaba arhali Muyahudi, Abayahudi bakag’imukenga. Akag’irhabala abakenyi n’abantu bali omu bulagirire. Korneliyo agwerhe obuyemere muli Yehova anakag’imushenga ngasi mango. Lusiku luguma, malahika abonekera Korneliyo anaderha ntya: ‘Mungu anayumvirhe amasala gawe. Orhumage abalume omu vile y’e Yopa emunda Petro ali, banamubwire ayishe emunda oli.’ Ho n’aho, Korneliyo arhuma balume basharhu omu vile y’e Yopa yali oku bilometre hofi 50 olunda lw’emukondwe.

Mw’ako kasanzi, erhi Petro ali e Yopa, abona ecibonekerezi. Abona ensimba Abayahudi barhal’iyemerirwe okulya, anayumva izu lyamubwira oku azilye. Petro alahira, anaderha ntya: ‘Nta lusiku nsag’irya enyama erhaciri omu kalamo kani.’ Ely’izu lyamubwira ntya: ‘Omanye wakaderha oku ezi nsimba zirhaciri. Mungu anazicesize.’ Ely’izu lyashub’ibwira Petro ntya: ‘Hali balume basharhu bali embuga. Ogende haguma nabo.’ Petro aja embuga anadosa abo balume bici bibadwirhe. Bamushuza ntya: ‘Omukulu w’abasoda Baroma ohamagalwa Korneliyo ye warhurhumaga. Oshinganine oje emwage e Kaisariya.’ Petro abwira abo balume balale aha mwage obo budufu. Olusiku lwakulikiraga, ye n’abandi bene wirhu balebe b’e Yopa, bagenda haguma n’abo balume e Kaisariya.

Erhi Korneliyo abona Petro, afukama embere zage. Cikone Petro aderha ntya: ‘Yimuka! Ndi muntu akawe. Mungu anambwizire nyishe emwawe, ciru akaba Abayahudi barhaja omu nyumpa z’Abantu b’Amashanja. Wekasinga ombwirage ecarhumaga warhuma oku nyishe.’

Korneliyo abwira Petro ntya: ‘Hamagera nsiku ini kurhenga nshenzire Mungu, na malahika ambwira oku ntume bagend’ikuhamagala. Wekasinga orhuyigirize emyanzi ya Yehova.’ Petro aderha ntya: ‘Nabwine oku Mungu arhajira kabôlo. Anayemere ngasi muntu olonzize okumuharamya.’ Petro abayigiriza bintu binji lugenda Yezu. Enyuma z’aho Korneliyo n’abantu bali haguma naye bahâbwa iroho litagatifu banabatizibwa boshi.