Mashanja Manji Gamamanya Kristu

Entumwa zarhumikire irhegeko lya Yezu ly’okuyaliza omwanzi mwinja omw’igulu lyoshi. Omu mwaka gwa 47 K.K.K., bene wirhu b’e Antiyokiya barhuma Paolo na Barnaba lyo bagend’ihubiri. Abo bahubiri babirhi b’obushiru babalama omu Aziya Nsungunu yoshi (emanyikine ene nka cihugo c’e Turquie), omu maeneo g’e Derbe, e Listra, n’e Ikoniya.

Paolo na Barnaba bakag’ihubiri abantu boshi, abe mugale erhi mukenyi, abe musole erhi muntu mukulu. Bantu banji bayemera okuli lugenda Kristu. Erhi Paolo na Barnaba bali bahubiri guvernere w’e Kipro wakag’ihamagalwa Serjiyo Paolo, mulozi muguma alonza okubayimanza lyo baleka okuhubiri. Paolo abwira oyo mulozi ntya: ‘Yehova arhali haguma na nawe.’ Ho n’aho, oyo mulozi aba muhurha. Erhi Guvernere Serjiyo Paolo abona oko, aba mwemezi.

Paolo na Barnaba bakag’ihubiri ngasi hoshi, nyumpa oku yindi, omu bibuye, omw’ibarabara, n’omu masinagogi. Erhi bafumya mulume muguma w’e Listra wali cirema, abantu babonaga eco cisomerine barhanya oku bali bamungu banalonza okubaharamya. Cikone Paolo na Barnaba babahanza, banaderha ntya: ‘Muharamye Mungu yene! Rhuli bantu kone.’ Enyuma z’aho Bayahudi balebe bayisha banashumya olubaga lyo luhagalika Paolo. Abo bantu bamubanda amabuye, bamukula omu vile, banamuleka ali hofi afê. Cikone, Paolo acir’izine! Ho n’aho bene wirhu bayisha bali murhabala, banamugalula omu vile. Buzinda, Paolo agaluka e Antiyokiya.

Omu mwaka gwa 49 K.K.K., Paolo ajira ogundi mubalamo. Enyuma z’okugaluka ly’abona bene wirhu b’omu Aziya Nsungunu, ayaliza omwanzi mwinja ciru kuhika omu maeneo ga kulî g’e Bulaya. Aja e Atene, e Efezi, e Filipi, e Tesalonika, n’omu gandi maeneo. Sila, Luka, n’omusole gwakag’ihamagalwa Timoteyo bagenda na Paolo mw’ogo mubalamo. Bakola haguma lyo barhondeza ebigamba n’okubirhabala bizibuhe. Paolo ayusa mwaka muguma n’enusu e Korinti, ly’azibuhya bene wirhu b’eyo munda. Akahubiri, okuyigiriza, anayandikira bigamba binji amaruba. Na kandi akag’ijira omukolo gw’okuluka amahema. Enyuma za kasanzi kalebe, Paolo agaluka e Antiyokiya.

Buzinda, omu mwaka gwa 52 K.K.K., Paolo ajira omubalamo gwa kasharhu, anagurhonderera omu Aziya Nsungunu. Abalama omu maeneo ga kulî g’e mwenè nk’e Filipi n’enyuma z’aho aja e Korinti. Paolo ayusize myaka minji omu Efezi ali ayigiriza, okufumya abantu, n’okuzibuhya ecigamba. Na kandi akag’ijira ehotuba z’abantu boshi ngasi lusiku omw’isomo. Bantu banji bakag’iyumvirhiza banashanja olugenzi lwabo. Buzinda, enyuma z’okuhubiri omwanzi mwinja omu bihugo binji, Paolo aja e Yeruzalemu.