Oshagalukire Akazi Kawe

1-3. (a) Gurhi bantu banji bakola baciyumva lugenda akazi kabo? (b) Madoso gahi rhwashuzakwo mw’eci cigabi?

OMW’IGULU lyoshi, abantu bali bakola bwenene lyo bahikiriza amalagirire gw’omulala gwabo. Bantu banji barhacisima akazi kabo na bantu banji bakola bagenda ebwa kazi barhanagwerhi bushagaluke. Erhi akaba ntyo ko biyosire omu kalamo kawe, gurhi wakajira ly’ocib’iciyumva oshagalukire akazi kawe? Bici byakakurhabala obe n’entanya njinja lugenda akazi kawe?

² Yehova arhubwîzire ntya: “Okulya n’okunywa, okuciha ehisanzi omu mirimo, eri ngalo ya Nyamuzinda.” (Omuhanûzi 3:13) Yehova arhulemire rhunagwerhe amalagirire n’irala ly’okukola. Alonzize emikolo yirhu erhulerhere obushagaluke.​—Osome Omuhanûzi 2:24; 5:18.

³ Bici byakarhurhabala lyo rhushagalukira akazi kirhu? Kazi kayosire gurhi Omuhamirizi wa Yehova ashinganine alahire? Gurhi rhwakajira lyo rhuba n’olugero ekarhi k’akazi kirhu n’enterekêro rhuha Yehova? Mukolo muci guli gwa bulagirire omu kalamo kw’Omukristu?

BANYAKAZI BABIRHI BAKULU

4, 5. Entanya za Yehova ziba zihi okubiyerekire akazi?

⁴ Yehova asima okukola. Ntya kwo rhusomire omu Omurhondêro 1:1: “Aha murhondêro, Nyamuzinda alêma empingu n’igulu.” Enyuma z’okulema igulu na ngasi kantu kabamwo, Nnamahanga abona biri “binja bwenene.” (Omurhondêro 1:31) Lulema wirhu ashagalukira ebi ali amajira.​—1 Timoteyo 1:11.

⁵ Yehova arhasag’ileka okukola kuhika ene. Yezu aderha ntya: “Oku Larha anali adwirhe akola, erhi nani kwo n’okwo.” (Yowane 5:17) Yehova agendekire ajira ebintu binja. Rhurhamanyiri ngasi kantu ali ajira, cikoki rhumanyire bintu biguma na biguma muli byo. Kwa lwiganyo, ali acishoga abantu bayish’irhambula haguma n’Omugala Yezu Kristu omu Bwami bwage. (2 Abakorinti 5:17) Rhuyushûle okuderha oku Yehova anashibirire bene bantu analonzize okubalongoza. Kugerera omukolo gw’amahubiri guli gwajirwa omw’igulu lyoshi emiliyoni y’abantu eri yacihangana okumumanya, banagwerhe obulangalire bw’okulama emyaka n’emyaka omw’igulu paradizo.​—Yowane 6:44; Abaroma 6:23.

6, 7. Yezu ali mukozi wa gurhi?

⁶ Yezu azigira akazi bwenene ak’Ishe. Embere ayishe hanw’igulu, Yezu âli “mukozi wabulenga bunji,” wa Nnamahanga. Ashangîre oku mukolo gw’okulema ngasi kantu empingu nah’igulu. (Emigani 8:22-31; Abakolosi 1:15-17) Erhi aba ali hanw’igulu, agendekire akola bwenene. Omu busole bwage, aciyigiriza omukolo g’okubinja empahu n’okuyubaka enyumpa. Yezu al’imanyikine bwenene kugerera akazi kage, bulya abantu bakag’imuhamagala “mubinji.”​—Marko 6:3.

⁷ Ciru akaba ntyo, omukolo Yezu ajijire bwenene omu kalamo kage, gwâli mukolo gwa kuyalagaza omwanzi mwinja gw’Obwami n’okuyigiriza abantu bahugûkwe bwinja Yehova ye ndi. Ajijire myaka isharhu n’enusu ali ajira ogo mukolo, na mw’ako kasanzi akakola bwenene; akag’irhondêra ogo mukolo mucera-cera n’okuguyusa bijingo bwenene. (Luka 21:37, 38; Yowane 3:2) Yezu akag’ilambagira amagana g’ebilometre omw’ibarabara liyunjwire katulo ly’aba na bantu banji b’okubwira oku myanzi y’Obwami.​—Luka 8:1.

8, 9. Bulya gurhi Yezu al’isimire akazi kage bwenene?

⁸ Okukolera Nnamahanga kuli Yezu, byâli nka biryo. Akag’ijira ogo mukolo n’obushiru n’emisi yoshi. Nsiku nguma na nguma Yezu akag’ikola guhika abule ciru akasanzi kw’okulya. (Yowane 4:31-38) Akag’ilonza obulyo bw’okurhabala abandi baciyigirize binji lugenda Ishe. Co carhumaga abwîra Yehova erhi: “Nakukuzize en’igulu; nayukirîze omukolo wampaga mpu njire.”​—Yowane 17:4.

⁹ Biyumvikine oku Yehova na Yezu banakole bwenene, na kugerera okwo kukola kwabo kuzibu-zibu, banahikire aha babà n’obushagaluke n’okurhimûkwa omu kazi kabo. Nirhu rhulonzize “okushusha Nnamahanga,” na kandi rhulonzize rhushimbe “enshando za Yezu.” (Abefezi 5:1; 1 Petro 2:21) Co cirhuma nirhu rhunakajira okwirhu koshi lyo rhukola.

GURHI RHUSHINGANINE RHUBONE AKAZI KIRHU?

10, 11. Bici byakakurhabala obe n’entanya nyinja lugenda akazi?

¹⁰ Rhuli bakozi ba Yehova, rhunakole bwenene lyo rhuhikiriza amalagirire gw’omulala gwirhu. Rhunalonze rhurhimûkwe omu kazi kirhu, cikoki kurhaba kulembu okujira ntyo ensiku zoshi. Bici rhwakajira erhi akaba akazi kirhu karharhusimisizi?

¹¹ Obe n’entanya nyinja. Nkabaga rhurhakahasha rhwahindûla akazi kirhu erhi rhukole hisungunu, cikoki rhwanahindûla oku rhubona ebintu. Okumanya oku Yehova ali arhuyumva, kwanarhurhabala. Kwa lwiganyo: Yehova ahunyîre omukulu w’omulala ajire okwage koshi ly’ahikiriza amalagirire gw’omulala gwage. Ebibliya edesire oku orhahikiriza amalagirire gw’omulala gwage erhi ali ‘mubi kulusha orhagwerhi buyemere.’ (1 Timoteyo 5:8) Erhi wakaba we mukulu w’omulala, oshinganine okole bwenene ly’omulala gwawe guba n’ebi gulagirireko. Ozigire erhi orhazigire akazi, omanye oku erhi wakahikiriza amalagirire gw’omulala, Yehova anashagaluka bwenene.

12. Obunguke bw’okuba mukozi mwikubagirwa buli buhi?

¹² Obe mukozi mwikubagirwa. Erhi wakaba mukozi mwikubagirwa kwakurhabala oshagalukire akazi kawe. (Emigani 12:24; 22:29) Hali migisho minji erhi omuntu akaba mwikubagirwa omu kazi kage. Ba bose banji banakashagalukira abakozi bikubagirwa bulya barhazimba nsaranga, birugu bya kazi ciru n’akasanzi. (Abefezi 4:28) Akantu kw’obulagirire bwenene kuli kumanya oku Yehova anabone obwikubagirwa bwirhu. Rhwanaba “n’ezamiri nyinja” bulya rhumanyire oku rhwashagalwire Nnamahanga.​— Abahabraniya 13:18, NWT; Abakolosi 3:22-⁠24.

13. Obundi buguke bw’okuba mwikubagirwa omu kazi buli buhi?

¹³ Ohugûkwe oku olugenzi lwinja lwanaha Yehova obukuze. Erhi rhwakahugûkwa bwinja oku obo bw’obunguke rhwakaba nabo, oko kwanashub’irhushumya rhurhimukwe n’akazi kirhu. (Tito 2:9, 10) Ciru byanahikira aha olugenzi lwirhu lwinja lwahuma oku wirhu munyakazi naye arhondêre aciyigiriza Ebibliya.​—Osome Emigani 27:11; 1 Petro 2:12.

KAZI KAHI NSHINGANINE NCISHOGE?

14-16. Bici rhukwanine rhurhanyeko nka rhukola rhwacishoga akazi rhwakola?

¹⁴ Ebibliya erhahanyiri entondekanye y’amakazi Omukristu ashinganine akole erhi ak’arhashinganini akole. Cikoki, amakanuni g’Ebibliya ganarhurhabala rhurhôle emihigo minja omu kasanzi rhukola rhwacishoga akazi. (Emigani 2:6) Kuli kwinja okurhanya kw’ago makanuni onali wacidosa aga madoso gali omu bifungo bikulikire.

¹⁵ K’aka kazi karhuma najira akantu Yehova abona oku kali kabi? Rhwaciyigirizize lugenda ebijiro Yehova ashomba; nk’obushambo n’obunywesi. (Olubungo 20:4; Ebijiro by’Entumwa 15:29; Abefezi 4:28; Amafulûlo 21:8) Rhukwanine rhube masu rhurhayemeraga akazi kahagalisire amakanuni ga Yehova.​—Osome 1 Yowane 5:3.

¹⁶ K’aka kazi kalunzire okuboko enkomêdu Yehova ahanzize? Kwa lwiganyo, erhi bakakuha akazi omu lubitaro kw’okukayegereza abakazi bayish’ikula amazimi, gurhi wakajira? Kurhali kubi okukola akazi kw’okuyegereza abantu oku lubitaro, cikoki omanyire entanya za Yehova lugenda okukula izimi. Ciru akaba arhali we wakula er’izimi, kw’orhakaciyumva oku wajijire kubi?​—Olubungo 21:22-⁠24.

17. Bici byakarhurhabala rhurhôle emihigo esimisize Nnamahanga?

¹⁷ Erhi rhwakaleka amakanuni ga Nnamahanga garhulongoze, rhwanahikira aha ‘rhwakomereza obwenge bwirhu okumanyîrira ecinja n’ecibi.’ (Abahabraniya 5:14) Ocidose ntya: ‘Gurhi okuyemera kwani aka kazi kwakahumako abandi? K’aka kazi karhuma naleka omulala gwani ngend’ilama kuli nago? Mazibu maci okuyemera akazi ka ntyo, kwakalerhera omulala gwani?’

“ORHANYE LY’OMANYA EBINTU BY’OBULAGIRIRE BWENENE”

18. Bulya gurhi agandi mango kuba kuzibu okuhira enterekêro rhuha Yehova oku nafasi ntanzi?

¹⁸ Bulya rhulamire “amango mazibu okulembera,” agandi mango rhunayabirwe okuhira enterekêro rhuha Yehova oku nafasi ntanzi omu kalamo kirhu. (2 Timoteyo 3:1, NWT) Okuba n’akazi n’okukabêrana kurhali kulembu. Rhukwanine rhushibirire omulala gwirhu, cikoki rhumanyire oku enterekêro yirhu eshinganine ebe oku nafasi ntanzi omu kalamo kirhu. Rhurhakaleka ebintu by’omubiri birhôle enafasi ntanzi omu kalamo kirhu. (1 Timoteyo 6:9, 10) Gurhi rhwakamanya “ebintu by’obulagirire” na kandi mw’ako kasanzi rhube rhunali rhwahikiriza amalagirire gw’omulala gwirhu?​—Abafilipi 1:10.

19. Gurhi okulangalira Yehova, kwakarhurhabala rhube n’olugero lugenda akazi?

¹⁹ Olangalire Yehova loshi. (Osome Emigani 3:5, 6) Rhumanyire oku Nnamahanga ayishi ebi rhuba rhulagirirekwo anaba arhushibirire bwenene. (Ennanga 37:25; 1 Petro 5:7) Akanwa kage karhubwizire ntya: “Okulama kwinyu kurhalongozibagwa n’obuzigire bw’ensaranga; murhimûkwe n’ebi mugwerhe. Bulya adesire erhi: ‘Ntakakuleka nta kanakulîkirira.’ (Abahabraniya 13:5, NWT) Yehova arhalonzizi rhucibulise omurhula omu kucidosa gurhi rhwakajira lyo rhuhikiriza amalagirire gw’omulala gwirhu. Omu kanga kanji, Yehova ayerekîne oku agwerhe obuhashe bw’okuhikiriza amalagirire g’abakozi bage. (Mateyo 6:25-32) Rhube n’akazi erhi rhurhabe nako, rhunaciyigirize Akanwa ka Nnamahanga, rhunayalagaze omwanzi mwinja gw’Obwami n’okuja oku ntimanano ngasi mango.​—Mateyo 24:14; Abahabraniya 10:24, 25.

20. Gurhi rhwakagendekera rhwalama akalamo karhahunyiri bintu binji?

²⁰ Amasu gawe galabe kantu kaguma kone. (Osome Mateyo 6:22, 23) Okulola kantu kaguma kone, kw’okuderha, kulama akalamo karhahunyîri binji ly’osegeza omukolo gwa Yehova omu kalamo kawe. Bwanaba buhwinja bunji erhi rhwakaleka ensaranga n’akalamo kinja birhume rhwashereza obwîra bwirhu haguma na Nnamahanga. Bici byakarhurhabala rhuhire ebintu by’obulagirire oku nafasi ntanzi? Rhukwanine rhujire okwirhu koshi rhuyake amadeni. Erhi akaba ogwerhe amadeni, orhôle emihigo yakakurhabala ogalipe. Erhi rhwakabula bwaba masu, lugenda ebirugu by’omubiri, byanahikira aha byarhurhôla kasanzi kanji na misi minji n’oko kwanarhuma rhwabula akasanzi k’okusalira, k’okuciyigiriza n’ak’okuhubiri. Rhurhakayemera ebirugu by’omubiri byashereza akalamo kirhu. Erhi rhwakabona “ecirhwalya n’ecirhwayambala,” rhunaciseze rhurhimukwe n’ebyo byone. (1 Timoteyo 6:8) Rhube rhulamire bwinja erhi kubi, rhukwanine rhulolereze bwinja akasanzi kirhu lyo rhumanya ebi rhwakajira lyo rhukolera Yehova bwenene.

21. Bulya gurhi rhukwanine rhucishoge bwinja eby’obulagirire?

²¹ Ocishoge bwinja ebi olagirirekwo. Rhushinganine rhukolese akasanzi kirhu, emisi yirhu n’ebirugu birhu by’omubiri n’obwenge. Erhi rhwakabula bwaba masu, amasomo n’ensaranga, byanahikira aha byarhurhôla akasanzi kirhu koshi. Yezu aderha ntya: “Mugendekerage . . . mwashokoza Obwami.” (Mateyo 6:33, NWT) Ebi rhucishoga, ebirhukomêra okujira, emikolo yirhu ya ngasi lusiku, n’emihigo yirhu byo biyerekana eby’obulagirire kuli rhwe.

OMUKOLO GW’OBULAGIRIRE RHUKWANINE RHUJIRE

22, 23. (a) Omukolo g’obulagirire gw’Omukristu w’okuli guba guhi? (b) Bici byarhurhabala rhuzigire akazi kirhu?

²² Omukolo gwirhu gw’obulagirire; kuli kukolera Yehova n’okuyalagaza omwanzi mwinja gw’Obwami. (Mateyo 24:14; 28:19, 20) Aka Yezu, rhulonzize rhujire okwirhu koshi ly’ogo mukolo guba gwa burhanzi omu kalamo kirhu. Bantu baguma na baguma muli rhwe, banaje omu gandi maeneo lyo bacirhabala abagwrehwe obulagirire bw’abahubiri. Abandi bali baciyigiriza olundi lulimi lyo bayigiriza abantu baderha olo lulimi Ebibliya. Oganire haguma n’abo bacihanganire okujira ntyo, obadose amadoso okubiyerekire ebi bajijîre lyo bahikira aho. Orhasomeragwa hano bakubwira oku akalamo kabo kayunjwîre bushagaluke bunji kulusha embere barhangire eyo mikolo.​—Osome Emigani 10:22.

²³ Ene, bantu banji muli rhwe bakwanine bakole kasanzi kanji bwenene, ciru n’akandi kasanzi banabe bagwerhe makazi manji caligumiza lyo babona erhi babona eci bakaha omulala gwabo lyo gulama. Yehova anabone ananashagalukire obushiru bwabo bw’okushibirira emilala yabo. Rhugendekere rhwayiga Yehova na Yezu omu kuba bakozi binja ciru akazi kirhu kakaba kakuhanga emishangi, kabuhinzi erhi kandi kazi koshi-koshi, omanye wakayibagira oku omukolo gwirhu gw’obulagirire kuli kukolera Yehova n’okuyalagaza omwanzi mwinja gw’Obwami bwage. Okujira ntyo kwanarhulerhera obushagaluke bunene.