Mwezi gwa 7

Ebintu byoshi Yezu ajijire n’okuderha, ciru n’omu bisomerine byage byoshi, ayerekine n’obwimana entanya z’Ishe n’oku Ishe aciyumva. (Yn. 14:9) Bici rhwakaciyigiriza kugerera ebisomerine Yezu ajiraga? Yezu n’Ishe baba barhuzigire bwenene. Erhi Yezu ali hanw’igulu, ayerekine obuzigire bunji oku bantu omu kukolesa obuhashe bwage bw’okujira ebisomerine ly’arhabala abakag’ilibuka. Mango maguma, mihurha ibirhi yamulakira oku ayirhabale. (Mt. 20:30-34) Olo lwandiko luyerekine oku Yezu “ayibêra obwonjo” anayifumya. Oluderho lw’Ecigiriki lwahindwirwe “ayibêra obwonjo” lukolesibwe aha luyerekine obwonjo bunji bwenene ayumvagya omu kandalala. Obo bwonjo bunji bwa ntyo buyerekine obuzigire agwerhe kuli bene bantu, kandi bwamushumya alisa abantu bal’ishalisire anafumya omushomyo. (Mt. 15:32; Mk. 1:41) Rhwanayemera n’obwalagale oku Yehova, Nnâmahanga oba wa “lukogo lw’omurhima,” n’Omugala baba barhuzigire bwenene bananaciyumve kubi amango rhuli rhwalibuka. (Lk. 1:78; 1 Pt. 5:7) Bacifinjire bwenene okurhenzaho amazibu goshi gali galibuza bene bantu! w23.04 buk. 3 cif. 4-5

Rhwanajira okwirhu koshi lyo rhuyaka okusoma n’okuyumvirhiza entanya mbi bantu banji bajira mw’er’igulu lya Shetani. Rhwanayunjuza entanya nyinja omu bukengere bwirhu omu kusoma n’okuyiga Ebibliya. Kandi, okukaja oku ntimanano n’omu mukolo gw’amahubiri nako kwanarhurhabala rhulange entanya zirhu. Na Yehova arhulaganyize oku arhakaleka rhurhangulwe kulusha oku rhwakahash’ilembera. (1 Kr. 10:12, 13) Ngasi muguma wirhu ashinganine akasalira bwenene kulusha embere lyo rhubêra bishwekerezi kuli Yehova muli zino nsiku nzinda ndarhi. Yehova alonzize ‘rhukamuhira kw’omurhima’ erhi kumuyigulira omurhima kugerera isala. (Enna. 62:8) Okakuza Yehova n’okumuvuga omunkwa kw’ebi ajira byoshi. Okamuhûna akurhabale ly’oba n’oburhwali bw’okujira omukolo gw’amahubiri. Okamusemberera akurhabale okulwisa amazibu goshi wakaba ogwerhe n’okuhagalika ngasi nshumi z’okujira ebintu bibi. Orhalekaga akantu koshi-koshi erhi omuntu yeshi-yeshi arhume orhasalira Yehova ngasi mango. w23.05 buk. 7 cif. 17-18

Bulya gurhi rhuja oku ntimanano z’ecigamba? Burhangiriza, lyo rhukuza Yehova. (Enna. 26:12; 111:1) Kandi rhunaje oku ntimanano z’ecigamba lyo rhuhânana omurhima muli zino nsiku ndarhi. (1 Ts. 5:11) Erhi rhuhira okuboko enyanya n’okuhâna ishuzo, rhunahikirize eyo mihigo yombi. Cikone, hali bintu bibirhi byakarhuma kwaba kuzibu kuli rhwe okuhâna amashuzo. Rhwanayumva ehy’oboba erhi rhulonza okuhâna ishuzo, erhi kandi rhwanaba rhugwerhe irala linji ly’okushuza, cikone rhurhahâbwe obulyo bw’okujira ntyo kanji-kanji nk’oku rhwakalonzize. Bici byakarhurhabala lyo rhuhima ago mazibu? Paolo adesire oku rhushinganine rhusegeze obwenge bwirhu oku ‘kuhânana omurhima.’ Erhi rhwakahugûkwa oku abandi bali oku ntimanano banahâbwa omurhima ciru kugerera enderho zirhu nsungunu ziyerekine obuyemere bwirhu, rhurhakaciyoboha bwenene okulonza okushuza. N’erhi akaba rhurhahâbirwi obulyo bw’okushuza kanji-kanji, rhwanashagaluka bulya abandi omu cigamba nabo baba n’obulyo bw’okuhâna amashuzo.​—1 Pt. 3:8. w23.04 buk. 20 cif. 1-3

Mwami ali amaderha oluderho! Abayahudi bal’igwasirwe mpira omu Babiloni myaka 70 ntya, bal’ikola bagwerhe oluhuma lw’okugaluka omu cihugo cabo, e Israheli. (Ezr. 1:2-4) Yehova yene wakahikirizize oko. Abababiloni barhakag’ilikûla abantu bakag’igwarha mpira. (Iz. 14:4, 17) Ecihugo c’e Babiloni cali camahimwa, n’omurhegesi muhyahya abwira Abayahudi oku bakola bagwerhe oluhuma lw’okucirhengamwo. Ngasi Muyahudi yeshi, ci bwenene ebirhwe by’emilala, bal’igwasirwe barhôle omuhigo: erhi barhenga e Babiloni erhi bayibêra. Ogo muhigo gurhakabire mulembu okurhôla. Bayahudi banji bal’ikola bashosi bwenene barhakahashire okujira ogo mubalamo. Na bulya banji baburhiragwa eyo Babiloni, nta cindi cihugo bal’imanyire. Bakag’ibona oku ecihugo c’e Israheli ciri cihugo ca bashakuluza babo. Bibonekine oku Bayahudi baguma na baguma bal’ikola bagwerhe buhirhi bunji omu Babiloni, na muli ntyo bakabwine oku kuli kuzibu okuleka enyumpa zabo nyinja erhi emikolo yabo n’okugend’ilama omu cihugo barhamanyiri. w23.05 buk. 14 cif. 1-2

Akanwa ka Nnâmahanga karhuhîre omurhima rhugendekere rhwayerekana oborhere bw’obulembedu, obwonjo n’obuzigire. Olwandiko lwa Luka 21:19 ludesire ntya: “Bulêmbezi [erhi bulembedu] bwinyu mwacizemwo obuzine bwinyu!” Olwandiko lw’Abakolosi 3:12 ludesire ntya: “Mucihundikire . . . obwonjo.” N’olwandiko lwa 1 Abatesalonika 4:9, 10 ludesire ntya: “Nyamuzinda yêne wammuyigirizagya okuzigirana mwêne na nnene, . . . Rhummuhunyire nti muyushûle okuja embere, bene wirhu.” Ago mandiko goshi gayandikiragwa abanafunzi bal’ibamakayerekana obulembedu, obwonjo, n’obuzigire. Cikone, bal’igwasirwe baciyigirize okugendekera bayerekana ago morhere. Nirhu rhugwasirwe rhujire ntyo. Lyo ohasha okujira ntyo, olole gurhi Abakristu b’omu myaka igana mirhanzi bayerekinemwo ago morhere. Buzinda wabona gurhi wakayigamwo olwiganyo lw’abo banafunzi, n’okuyerekana oku ocirheganyize oku malibuko madarhi. Muli ntyo, hano amalibuko madarhi garhondera, wayish’iba waciyigirizize gurhi wakalemberamwo na kandi wayish’ihiga okugendekera walembera. w23.07 buk. 3 cif. 4, 8

Rhube rhuli b’omu bashige amavurha erhi b’omu “bindi bibuzi,” rhushinganine rhubêre omu “njira ntagatifu” bulya enarhulongoze omu paradizo y’ekiroho na kandi yayish’irhuhisa oku migisho y’Obwami omu mango gayisha. (Yn. 10:16) Kurhangira omu mwaka gwa 1919 Kano Kasanzi Kirhu (K.K.K.), emiliyoni y’abalume, abakazi, n’abana barhenzire omu Babiloni Mukulu, ko kuderha amadîni goshi g’obunywesi, banarhondire okulambagira mw’eyo njira y’olwiganyo. Erhi Abayahudi barhenga e Babiloni, Yehova abakulira ebihanzo byali omu njira. (Iz. 57:14) Gurhigi lugenda ‘enjira ntagatifu’ ya muli gano mango girhu? Omu magana g’emyaka embere z’omwaka gwa 1919, Yehova akolesize abalume bal’imukenzire lyo barhabala okurheganya enjira y’okurhenga omu Babiloni Mukulu. (Oshushanye na Izaya 40:3.) Bajijire omukolo gw’obulagirire gw’okurheganya ibarabara ly’ekiroho, lyo buzinda bahashisa abantu b’emirhima minja barhenge omu Babiloni Mukulu n’okuja omu paradizo y’ekiroho, hantu enterekêro ecîre ya Yehova yagalulagwa. w23.05 buk. 15-16 cif. 8-9

Yehova alonzize rhumukolere n’omwishingo n’obulonza. (2 Kr. 9:7) Co cirhumire, ka rhwanacihangana okuhikira omuhigo gwirhu gw’ekiroho erhi akaba rhurhayumvirhi irala linji ly’okujira ntyo? Orhanye oku lwiganyo lwa Paolo. Adesire ntya: “Ndi nakolesa omubiri gwani buzibu zibu nnangulibuzize bwenene.” (1 Kr. 9:25-27, Mashi Bible) Paolo akag’iciseza okujira ebintu binja ciru n’amango akag’iciyumva arhagwerhi irala ly’okubijira. Ka Yehova akag’ishagalukira ebi Paolo akag’ijira? Neci! Na Yehova amuhemba enyanya z’obushiru bwage. (2 Tm. 4:7, 8) Ko n’oko, Yehova anashagaluke erhi abona rhuli rhwacihangana okuhikira omuhigo gwirhu ciru n’amango rhurhayumvirhi irala ly’okujira ntyo. Anashagaluke bulya ciru akaba ensiku zoshi nkaba rhurhajira ntyo enyanya z’obuzigire bwirhu kuli ogo mukolo, amanyire oku rhunabe rhuli rhwajira ntyo enyanya z’obuzigire bwirhu kuli ye. Nk’oku Yehova agishaga Paolo, nirhu agisha obushiru bwirhu. (Enna. 126:5) N’erhi rhwakabona gurhi Yehova ali arhugisha, rhwanacib’irhondera okuyumva irala linji ly’okuhikira omuhigo gwirhu. w23.05 buk. 29 cif. 9-10

Entumwa Paolo ashushanyize abantu barhakayokoka olusiku lwa Yehova n’abaja iro. Barhaba bahugûsirwe ebiri byajirikana erhi oku akasanzi kali kagera. Co cirhumire, barhahugûkwa ebintu by’obulagirire biri byajirikana erhi oku bashinganine bajire lugenda ebyo bintu. Ene bantu banji bali iro omu hali y’ekiroho. (Rm. 11:8) Barhayemera ebimanyiso biyerekine oku rhuli rhwalama omu “nsiku nzinda” n’oku amalibuko madarhi gali hofi bwenene. (2 Pt. 3:3, 4) Cikone, amahano garhuhûnyire rhube masu gali gagendekera gaba ga bulagirire bwenene ngasi lusiku. (1 Ts. 5:6) Co cirhumire, rhugwasirwe rhugendekere rhwarhulirira n’okurhanya bwinja. Bulya gurhi? Lyo rhurhag’icihira omu by’epolitike by’ene erhi omu bintu biyerekire olubaga. Oku olusiku lwa Yehova lugendekire lwayegerera ko rhwanagendekera rhwashumikwa rhucihire mw’ebyo. Ciru akaba ntyo, rhurhashinganini rhucihangayise bwenene lugenda oku rhwajira. Iroho lya Nnâmahanga lyanarhurhabala rhugendekere rhwarhulirira n’okulanga enkengero zirhu lyo rhurhôla emihigo minja.​—Lk. 12:11, 12. w23.06 buk. 10 cif. 6-7

Bici orhanyako erhi oyumva izino Samusoni? Nkaba onarhanye lugenda omulume wagwerhe emisi yago-yago. Na ntyo kobinali. Cikone Samusoni arhôzire omuhigo mubi gwanamulerhera mazibu manji. Ciru akaba ntyo, Yehova asegize obwenge oku buyemere bwa Samusoni anayemera buyandikwe omu Bibliya oku bunguke bwirhu. Yehova akolesize Samusoni ly’ahikiriza ebintu by’okusomeza n’okurhabala olubaga lwage al’icishozire lw’Abaisraheli. Magana g’emyaka enyuma z’okufâ kwa Samusoni, Yehova alongozize entumwa Paolo n’iroho lyage litagatifu ly’eyandika izino lya Samusoni omu mubalè gw’abalume bagwerhe obuyemere bwago-bwago. (Hb. 11:32-34) Olwiganyo lwa Samusoni lwanarhuha omurhima. Akag’icikubagira Yehova, ciru n’omu mango ali omu kanga kazibu. Olwiganyo lwage lwanarhuha omurhima n’okurhuyigiriza agandi masomo g’obulagirire. w23.09 buk. 2 cif. 1-2

Rhwanazibuhya obulembedu bwirhu omu kukasalira Yehova kanji-kanji n’okumubwira ebiri byarhuhangayisa byoshi. (1 Ts. 5:17) Nkaba nta mazibu madarhi oli walwisa buno. Ciru akaba ntyo, k’onalonze obulongozi bwa Yehova ngasi mango erhi akaba oli burhe, ohwerirwe, erhi orhamanyiri oku wajira? Erhi akaba ene onahûne Nnâmahanga oburhabale ngasi mango ly’olwisa amazibu gawe ga ngasi lusiku, orhayish’irhindire okujira ntyo hano olwisa amazibu madarhi omu mango gayisha. Ago mango wayish’iyemera n’obwalagale oku amanyire bwinja-bwinja amango akakurhabala na gurhi akakurhabalamwo. (Enna. 27:1, 3) Rhwayish’ihasha okulembera amalibuko madarhi erhi akaba rhunalembere amazibu gali garhuhikira ene. (Rm. 5:3) Bulya gurhi rhwakaderha ntyo? Bene wirhu banji babwine oku ngasi irhangulo ly’obuyemere balembire lyabarhabire lyo balembera agandi mazibu. Obulembedu bwabarhabire baba Bakristu binja, bwanazibuhya obuyemere bwabo oku Yehova ali mubidu okubarhabala ananalonzize okujira ntyo. Obuyemere nabo, bwabarhabire balembere agandi mazibu.​—Yk. 1:2-4. w23.07 buk. 3 cif. 7-8

Obwirhohye bwa Yehova n’obwonjo bwage binamushumye abe wa lugero. Kwa lwiganyo, Yehova ayerekine obwirhohye amango ali hofi ashereze abantu bagalugalu b’omu Sodoma. Kugerera bamalahika bage, Yehova arhegeka omulume mushinganyanya Loti oku ayakire omu eneo y’entondo. Loti ayoboha okuja eyo munda. Muli ntyo ayinginga Yehova oku amuyemerere ye n’omulala gwage bayakire e Sowari, vile nsungunu Yehova al’ihizire okushereza. Yehova akasegize oku kuhika Loti ajire ebi anamurhegekaga byoshi. Lubero n’oko, ayemera ebi Loti amuhûnaga ciru akaba okujira ntyo kwakarhumire arhashereza evile y’e Sowari. (Murh. 19:18-22) Magana g’emyaka enyuma z’aho, Yehova ayumviza Abaninawi obwonjo. Arhuma omulebi Yona ayalagaze obushereze bwal’iyegerire bw’eyo vile n’abantu bagalugalu bal’ilamiremwo. Cikone erhi Abaninawi baciyunjuza, Yehova abayumviza obwonjo, arhanacisherezagya eyo vile.​—Yon. 3:1, 10; 4:10, 11. w23.07 buk. 21 cif. 5

Bici rhwakaciyigiriza kugerera olwiganyo lwa Yowasi? Ali nka murhi gugwerhe emizi erhajiri omw’idaho bwenene guyimangire oku mutungo. Erhi omutungo, ko kuderha Yehoyada aba arhacihali n’obugoma buzuka, Yowasi akulumba. Olo lwiganyo luyerekine oku rhurhashinganini rhuyobohe Nnâmahanga mpu bulya kone abantu b’omu mulala gwirhu n’abandi b’omu cigamba bali barhuyeresa olwiganyo rhwakakulikira. Lyo rhugendekera rhwaba n’emisi y’ekiroho, rhugwasirwe rhugendekere rhwacihâna emwa Nnâmahanga n’okugendekera rhwamuyoboha, omu kuyiga ngasi mango, okurhanya bwenene, n’okusalira. (Yer. 17:7, 8; Kl. 2:6, 7) Kobinali Yehova arharhuhûna binji bwenene. Ebi arhuhûnyire biyerekinwe kwa bofofi omu lwandiko lw’Omuhanûzi 12:13, ludesire ntya: “Orhinye [oyobohe] Nyamuzinda onashimbe amarhegeko gage, bulya gwo mukolo gwa ngasi muntu.” Erhi rhwakayoboha Nnâmahanga, rhwanaba n’obuhashe bw’okulwisa amarhangulo garhuhikira omu mango gayisha n’okuba n’oburhwali. Nta kantu koshi-koshi kayish’ihasha okushereza obwîra bwirhu haguma na Yehova. w23.06 buk. 18-19 cif. 17-19

Omulongo gwa 5 gurhondire n’ezi nderho zikulikire: “Olya wali otamire oku ntebe aderha, erhi.” (Maf. 21:5a) Ezo nderho zo ntangiriza omu kasharhu kone Yehova aganire omu citabu c’Amafulûlo kugerera ebibonekerezi. Arhali malahika erhi ciru Yezu orhuhîre eyo myanzi y’okurhuyemeza n’obwalagale, cikone Yehova yene orhuhîreyo! Ebyo biyerekine oku rhwanalangalira bwenene ebi adesire enyuma z’aho. Bulya gurhi rhudesire ntyo? Bulya Yehova ‘arhankarhebana.’ (Tt. 1:2) Ezo nderho ziyerekine oku ebi rhusomire omu citabu c’Amafulûlo 21:5, 6 kobinali byahikirira. Rhuganirirage oluderho “Loli.” Oluderho lw’Ecigiriki lwahindwirwe “loli” lukolesibwe kanji-kanji omu citabu c’Amafulûlo. Mahugûlo maguma gayerekine oku olo luderho lunakolesibwe omu “kukengeza omuntu oli wasoma oku asegeze obwenge bwage oku byaderhwa enyuma z’aho.” Bici Nnâmahanga adesire enyuma z’aho? Aderha ntya: “Byoshi namabijira bihyahya.” Kobinali, Yehova ali aganira lugenda empindulo zaba omu mango gayisha. Cikone kuli ye eco ciragane ciri c’okuli canahikirira, co cirhumire adesire omu njira eyerekine nk’ezo mpindulo ziri nk’ezahikirire.​—Iz. 46:10. w23.11 buk. 3 cif. 7-8

Entumwa Petro agendekire alwisa obuzamba bwage. Rhuganirire nyiganyo nsungunu. Erhi Yezu ahugûla gurhi akalibuzibwemwo n’okufâ ly’ahikiriza obulebi bw’Ebibliya, Petro amukalihira. (Mk. 8:31-33) Kabirhi koshi-koshi, Petro n’ezindi ntumwa bakag’ija kadali lugenda owali mukulu egarhi kabo. (Mk. 9:33, 34) Omu budufu buzinda embere z’okufâ kwa Yezu, ho n’aho buzira kurhanya Petro atwa mulume muguma okurhwiri. (Yn. 18:10) Obo budufu bo n’obo, Petro arhondera okuyoboha anahakana kasharhu koshi-koshi omwîra wage Yezu. (Mk. 14:66-72) Oko kwarhuma Petro alaka bwenene. Yezu arhalekaga entumwa yage yal’ivunisire omurhima. Enyuma z’okufûka kwage, aha Petro obulyo bw’okucib’imuyereka oku amuzigire. Yezu abwira Petro akole n’obwirhohye nka lungere w’ebibuzi byage. (Yn. 21:15-17) Petro ayemera okujira ogo mukolo. Ali e Yeruzalemu olusiku lwa Pentekoste anali egarhi k’Abakristu barhanzi bashigagwa amavurha kugerera iroho litagatifu. w23.09 buk. 22 cif. 6-7

Entumwa Petro yayinginzire ababo bagula ntya: “Muyabule obuso bwa Nyamuzinda.” (1 Pt. 5:1-4) Akaba oli mugula, rhumanyire oku oba ozigire bene winyu na bali binyu onaba olonzize okubayabula. Ciru akaba ntyo, hali amango wakaciyumva nk’ogwerhe binji bya kujira erhi orhamire bwenene orhakanahasha okuhikiriza ogo mukolo. Gurhi wakajira? Obwire Yehova oku oli waciyumva. Petro ayandisire ntya: “Owahirwe omukolo gw’oburhumisi, agukole n’emisi ya Nnâmahanga.” (1 Pt. 4:11) Bene winyu na bali binyu banaba bali balwisa amazibu garhakahwa mw’er’igulu. Cikone okengere oku Yezu Kristu, “lungere w’abangere,” anabarhabala kulusha oku wakajiramwo ntyo. Anajira ntyo ene n’omw’igulu lihyahya. Ebi Nnâmahanga ahûnyire abagula kone kuli kuzigira bene wabo na bali babo, okubayabula, n’‘okuba lwiganyo lw’obuso.’ w23.09 buk. 30 cif. 13-14

Rhugwasirwe rhuyake okukakulikira entanya za bene bantu. Erhi rhwakabona ebintu nk’oku bene bantu babibona, nkaba rhwanaleka Yehova n’amakanuni gage. (1 Kr. 3:19) “Obushinganyanya [obwenge, NWT] bwa mw’eri igulu” kanji-kanji bunashumye abantu lyo barhag’irhumikira Nnâmahanga. Bakristu balebe b’omu Pergamu n’omu Tiyatira bayahukirwa n’entanya abantu bakag’iharamya ensalamu n’okujira eby’enshonyi ba mw’ezo vile bagwerhe. Yezu ahîre ebyo bigamba byombi amahano mazibuzibu enyanya z’okulekerera olugenzi lw’eby’enshonyi. (Maf. 2:14, 20) Ene, abantu barhuzungulusire banarhushumika lyo rhuyemera entanya mbi. Abantu b’omu mulala gwirhu n’abantu rhuba rhumanyine nabo banalonza okurhuyemeza oku rhujira olwimango ludarhi n’okurhushumika rhuvune amarhegeko ga Yehova. Kwa lwiganyo, banalonza okurhuyeresa oku okuhikiriza irala lirhu kurhali kubi n’oku amakanuni g’Ebibliya g’olugenzi gakola ga mîra. Hali amango rhwakarhanya oku obulongozi Yehova arhuha burhayumvikini n’obwalagale. Ciru hali amango rhwakalonza rhujire “kulusha ebyayandisirwe.”​—1 Kr. 4:6. w23.07 buk. 16 cif. 10-11

Mariya, nnina wa Yezu al’ilagirire oku misi. Arhal’iciheruka; cikone al’igwasirwe abe izimi. Arhal’igwerhe bumanye omu kulera abana, cikone al’igwasirwe ashibirire omwana-rhabana wakabire Masiya. Na bulya arhalisag’ibonana n’omulume yeshi-yeshi, gurhi akahugûliremwo Yozefu wakag’imusheba ebyo byoshi? (Lk. 1:26-33) Gurhi Mariya ahâbirwemwo emisi? Ahûnyire abandi oburhabale. Kwa lwiganyo, ahûnyire malahika Gabriyeli amuhugûlire binji lugenda ogo mukolo ahâbagwa. (Lk. 1:34) Kasanzi kasungunu enyuma z’aho, abalamira omu ‘cishagala [lugo] ciguma cali omu ntondo’ z’e Yuda ly’alambagirira Elizabeti, muntu w’omu mulala gwage. Elizabeti avuga Mariya omunkwa analongozibwa n’iroho litagatifu lya Yehova ly’aganirira bulebi bulebe bw’okuhâna omurhima lugenda oyo mugala wa Mariya wali omu nda. (Lk. 1:39-45) Mariya aderha oku Yehova “ajijire emikolo y’obuhashe n’emisi y’okuboko kwage.” (Lk. 1:46-51, Mashi Bible) Yehova ahîre Mariya emisi kugerera Gabriyeli na Elizabeti. w23.10 buk. 14-15 cif. 10-12

Omubalè musungunu gw’abanafunzi ba Kristu gwashîzirwe amavurha kugerera iroho litagatifu, bananashagalukire obwîra bwago-bwago haguma na Yehova. Abo bantu 144 000 bayish’ikola nka bakuhani omu mpingu haguma na Yezu. (Maf. 14:1) Ahatagatifu h’omw’ihema ly’entimanano hashushanyize ehali yabo y’okuburhwa kugerera iroho litagatifu nka bana ba Nnâmahanga amango baciri hanw’igulu. (Rm. 8:15-17) Ahatagatifu Bwenene h’omw’ihema ly’entimanano hashushanyize empingu, hantu Yehova alama. “Erido” yal’igabire Ahatagatifu n’Ahatagatifu Bwenene eshushanyize omubiri gwa Yezu gw’obunya-nyama gwakarhumire arhaja omu mpingu nka Kuhani Mukulu Bwenene w’ehekalu y’ekiroho. Omu kuhâna obuzine bwage bwa mwene muntu nterekêro ly’acungula bene bantu, Yezu ayigulire Abakristu bashige amavurha obuzine bw’empingu. Nabo bashinganine baleke omubiri gwabo gw’obunya-nyama lyo bahâbwa oluhembo lwabo lw’empingu.​—Hb. 10:19, 20; 1 Kr. 15:50. w23.10 buk. 28 cif. 13

Gideoni ashuza n’obutudu erhi Abaefraimu bamuderha kubi. (Bac. 8:1-3) Arhabashuzagya n’obukali. Ayerekana obwirhohye omu kuyumvirhiza ebi bakag’iciduduma lugenda ye, anabaganiza omu njira y’olukogo n’oko kwarhuma barhulirira. Abagula b’obwenge banayige olwiganyo lwa Gideoni omu kuyumvirhiza bwinja n’okushuza n’obutudu erhi bakaderhwa kubi. (Yk. 3:13) Omu kujira ntyo, banarhabale okugendekeza omurhûla omu cigamba. Erhi Gideoni akuzibwa enyanya z’okuhima Abamidyani, asegeza obwenge kuli Yehova. (Bac. 8:22, 23) Gurhi abalume bahizirweho bakayigamwo olwiganyo lwa Gideoni? Bashinganine bakaha Yehova obukuze kw’ebi bali bahikiriza. (1 Kr. 4:6, 7) Kwa lwiganyo, erhi omugula akakuzibwa enyanya z’obuhashe bwage bw’okuyigiriza, anaderha oku enyigirizo zirhenzire omu Kanwa ka Nnâmahanga n’oku rhweshi rhunayigirizibwe n’ikubuliro lyage. Mango oku gandi, abagula bashinganine bakarhanya lyo bamanya erhi bali bacisegezako obwenge okurhalusire olugero. w23.06 buk. 4 cif. 7-8

Erhi akaba rhurhahâbirwi ebi rhwahûnaga omw’isala, nkaba rhwanacidosa ntya: ‘Ka ndi nasalira lugenda akantu kashinganine?’ Kanji-kanji rhunarhanye oku rhumanyire ebiri binja bwenene kuli rhwe. Cikone nkaba ebintu rhuhûna birhakarhulerhera obunguke kasanzi kanji. Erhi akaba rhuli rhwasalira lugenda mazibu malebe, nkaba hanaba akantu kinja bwenene kakamala ago mazibu kulusha aka rhuli rhwahûna. N’ebintu biguma na biguma rhuhûna, nkaba byanaba birhapatini n’obulonza bwa Yehova. (1 Yn. 5:14) Kwa lwiganyo, rhuganirire olwiganyo lw’ababusi bashenganga Yehova ly’omwana wabo agendekera abêra omu okuli. Er’isala lyabonekana nka lishinganine. Cikone, ntaye Yehova asêza muli rhwe oku amukolere. Alonzize ngasi muguma muli rhwe, kuhiramwo n’abana birhu, acishoge okumuharamya. (Lush. 10:12, 13; 30:19, 20) Co cirhumire, ababusi bashinganine bakahûna Yehova abarhabale lyo bahuma oku murhima gw’omwana wabo ly’ashumibwa okuzigira Yehova n’okuba mwîra wage.​—Mig. 22:6; Ef. 6:4. w23.11 buk. 21 cif. 5; buk. 23 cif. 12

Bulya gurhi okurhuliriza abandi eba njira y’obulagirire bwenene y’okubayeresa obuzigire bwirhu? Nk’oku citabu ciguma cihugûla Ebibliya ciyerekine, enderho ‘kurhuliriza’ Paolo akolesagya zihugwîre “kuyimanga aha burhambi bwa muntu mulebe n’okumuha omurhima amango ali alwisa amazibu madarhi.” Muli ntyo, rhunarhabale owirhu mwemezi oli walibuka ayimange n’okugendekera alambagira omw’ibarabara liyerekire ebwa buzine. Na ngasi mango erhi rhurhuliriza mwene wirhu erhi mwali wirhu rhunamuyerese oku rhumuzigire. (2 Kr. 7:6, 7, 13) Haba olushangi lwa hofi-hofi egarhi k’obwonjo n’oburhulirize. Omu njira nci? Omuntu w’obwonjo anashumibwe ly’arhuliriza abandi ananalonze okubarhabala omu malibuko gabo. Oku murhondero rhunayumve obwonjo, buzinda rhuhâne oburhulirize. Rhulole gurhi Paolo ayerekine oku obwonjo Yehova ajira kuli bene bantu bunamushumye abarhulirize. Paolo ayerekine oku Yehova ye “Larha w’obwonjo na Nyamuzinda wa ngasi burhulirize.”​—2 Kr. 1:3. w23.11 buk. 9-10 cif. 8-10

Abanafunzi ba Kristu boshi bashinganine bamanye oku banahikirwa n’amalibuko. Rhuganirire olwiganyo lw’entumwa Paolo. Abwizire Abakristu Batesalonika ntya: “Amango rhwaciri haguma, rhwamubwira bulya nti rhukol’ilibuka, kwo byanayishirig’iba.” (1 Ts. 3:4, Mashi Bible) Ayandikira n’Abakristu Bakorinti ntya: “Bene wirhu, rhurhalonzizi muhabe amalibuko rhwabwine. . . . Ciru rhurhâli rhucilangalire nti rhwabêramwo omuka.” (2 Kr. 1:8; 11:23-27) Abakristu b’ene nabo bashinganine bamanye oku banahikirwa n’amalibuko omu njira ndebe. (2 Tm. 3:12) K’amalibuko gakola gakuhikire enyanya z’okuba n’obuyemere muli Yezu, n’okumukulikira? Nkaba abîra bawe n’abantu b’omulala gwawe banakushekere. Nkaba ciru bakujirire omu njira y’obukali. K’omuhigo gwawe gw’okuba mwikubagirwa omu bintu byoshi gwakudwirhire amazibu ebwa kazi? (Hb. 13:18) K’okola ohagalisirwe n’oburhegesi bw’ecihugo cinyu enyanya z’okuganirira abandi obulangalire bwawe? Paolo adesire oku rhwanashagaluka ciru rhwakahikirwa na malibuko gahi. w23.12 buk. 10-11 cif. 9-10

Yakobo alembire mazibu manji. Bagala babirhi ba Yakobo, ko kuderha Simoni na Levi, babonesa omulala gwabo nshonyi banacafula izino lya Yehova. Kandi, Raheli, muka Yakobo muzigirwa, afâ erhi aburha omwana wabo wa kabirhi. N’enyanya z’ishali lidarhi, Yakobo ahamira omu cihugo c’e Misri erhi anakola mushosi. (Murh. 35:16-19; 37:28; 45:9-11, 28) Ciru akaba ago mazibu goshi gahikire Yakobo, arhahezagya obuyemere muli Yehova n’omu biragane byage. Na Yehova ayeresire Yakobo oku al’imuyemire. Kwa lwiganyo, Yehova agishire Yakobo omu kumuha buhirhi bunji. Kandi orhanye kunganaci Yakobo avuzire Yehova omunkwa bwenene erhi acib’ibuganana n’omugala Yozefu amalaga myaka minji ali arhanya mpu afîre! Obwîra bwa hofi-hofi Yakobo agwerhe haguma na Yehova bo bwamurhabire ly’ahash’ilembera ago mazibu. (Murh. 30:43; 32:9, 10; 46:28-30) Erhi rhwakagendekera rhwaba n’obwîra bwa hofi-hofi haguma na Yehova, nirhu rhwanahash’ilembera erhi amazibu rhurhal’irhanyizeko gakarhuhikira. w23.04 buk. 15 cif. 6-7

Olulanga lwa 23 luli lwimbo luyerekine n’obwalagale oku Yehova aba arhuzigire ananarhushibirire. Daudi, mwandisi w’olo lulanga, ayerekine obwîra bwa hofi-hofi bwali egarhi kage na Yehova ahamagalaga Lungere wage. Aciyumvirhe ali omu bulanzi omu kuleka Yehova amulongoze, ananal’imulangalire loshi-loshi. Daudi al’imanyire oku Yehova akamuyeresire obuzigire bwage ensiku zoshi z’akalamo kage. Bici byarhumaga aba n’obo bulangalire bunji? Daudi akag’iciyumva ashibirirwe bwinja bulya ngasi mango Yehova akag’imuha ebi al’ilagirireko byoshi. Kandi Daudi al’ishagalukire obwîra bwage haguma na Yehova anal’imanyire oku ayemirwe naye. Co cirhumire al’iyemire n’obwalagale oku ciru bici byakamuhikira omu mango gali embere, Yehova akagendekire ashibirira amalagirire gage goshi. Obulangalire bwa Daudi omu buzigire bwa Yehova bwal’igwerhe misi minji bwenene kulusha ngasi kantu kakamuyobohize bwanamulerhera omwishingo munji n’okurhimukwa.​—Enna. 16:11. w24.01 buk. 28-29 cif. 12-13

Kurhenga amango g’Ivita lya Kabiri ly’Igulu, abantu ba Yehova omu bihugo binji babire n’omurhûla n’oluhuma lw’olugero lyo bahikiriza omukolo gw’amahubiri. Kobinali, omukolo gw’amahubiri gwajijire amajambere. Ene, bene wirhu b’omu Mbaraza Eri Yalongoza bagendekire bayegemera obulongozi bwa Kristu. Baba balonzize obulongozi bali baha bene wabo na bali babo bubonekane oku burhenzire empingu. Nabo banakolese abangalizi b’omuzunguko n’abagula lyo baha ebigamba obulongozi. Abagula bashige amavurha n’abagula boshi b’ebigamba bali omu “kuboko kulyo” kwa Kristu. (Maf. 2:1) Kobinali, abo bagula barhaba bimana bananajire amagosa. Ak’entumwa, hali amango Musa na Yozwe nabo bajijire amagosa. (Mib. 20:12; Yoz. 9:14, 15; Rm. 3:23) Ciru akaba ntyo, Kristu ali alongoza bwinjinja mushizi mwirhonzi n’abagula bahizirweho anagendekera ajira ntyo. Co cirhumire, rhugwerhe birhumire binji by’okulangalira obulongozi rhuli rhwahâbwa kugerera abantu bahizirweho lyo barhulongoza. w24.02 buk. 23-24 cif. 13-14

Ene, rhwanashagalusa Yehova omu kugaganirira abandi lugenda ye omu njira eyerekine kunganaci rhumuvuzire omunkwa na kunganaci rhumuzigire. Amango rhuli omu mukolo gw’amahubiri, omuhigo gwirhu mukulu kuli kurhabala abantu bayegere Yehova n’okukabona Larha wirhu w’obuzigire nk’oku rhumubona. (Yk. 4:8) Rhunashagalukire okuyereka abantu gurhi Ebibliya eba eganirire Yehova omu kuyerekana obuzigire, obushinganyanya, obwenge bwage, emisi yage n’agandi morhere gage minja. Kandi rhunakuze Yehova n’okumushagalusa omu kujira okwirhu koshi lyo rhuyiga olwiganyo lwage. Erhi rhujira ntyo, abandi banabona oku rhuli lubero n’abandi bantu ba mwer’igulu libi nkaba bananacidosa bulya gurhi. (Mt. 5:14-16) Na ntyo, omu kalamo kirhu ka ngasi lusiku haguma nabo rhwanahasha okubahugûlira bulya gurhi rhujijire ebintu omu njira ndebe. N’oko kwanarhuma abantu b’emirhima minja bayegera Nnâmahanga wirhu. Erhi rhukuza Larha wirhu mw’ezo njira, rhunashagaluse omurhima gwage.​—1 Tm. 2:3, 4. w24.02 buk. 10 cif. 7

Ly’oba mulume Mukristu okuzire kiroho, oshinganine ociyigirize obulenga bwakakurhabala. Obo bulenga bwanakurhabala ly’oyemera mikolo milebe omu cigamba, ly’okola akazi kakakurhabala ocishibirire wene erhi kushibirira omulala, n’okuba n’obwîra bwinja haguma n’abandi. Kwa lwiganyo, ociyigirize okusoma n’okuyandika bwinja. Ebibliya edesire oku omuntu w’omwishingo onabêrwa ali muntu ogeza akasanzi ngasi lusiku omu kusoma Akanwa ka Nnâmahanga n’okukarhanyako bwenene. (Enna. 1:1-3.) Omu kusoma Ebibliya ngasi lusiku, anahikira aha amanya enjira ya Yehova y’okurhanya, n’oko kunamurhabale okurhanya bwinja n’okuyiga gurhi akakolesamwo amakanuni g’Amandiko omu kalamo kage. (Mig. 1:3, 4) Bene wirhu na bali birhu balagirire oku balume bagwerhe obuhashe bw’okuyigiriza n’okuhâna amahano kurhenga omu Bibliya. Erhi akaba wanasoma n’okuyandika bwinja, wanaba n’obuhashe bw’okurheganya ehotuba n’amashuzo gakarhabala abandi n’okuzibuhya obuyemere bwabo. Kandi wanaba n’obuhashe bw’okuyandika entanya z’obulagirire zakakurhabala okuzibuhya obuyemere bwawe we nnene n’okuha abandi omurhima. w23.12 buk. 26-27 cif. 9-11

Erhi wakaciyumva oyobohire, orhanye kw’ebi Yehova ajira omu mango gayisha amango Shetani aba arhaciriho. Onyesho nguma y’oku ntimanano y’e eneo y’omwaka gwa 2014 yayerekine ishe muguma w’omulala oli waganira n’omulala gwage gurhi olwandiko lwa 2 Timoteyo 3:1-5 lwakasomwa lubero erhi akaba eyo milongo elebire oku byayish’iba omu Paradizo: “Omu igulu lihyahya hanabe akasanzi k’omwishingo bwenene. Bulya abantu bayish’iba ba kuzigira abandi, ba kuzigira ebintu by’ekiroho, ba lugero, birhohye, ba kuha Nnâmahanga irenge, ba kurhumikira ababusi babo, ba kuvuga omunkwa, bishwekerezi, ba kuzigira emilala yabo bwenene, ba kulonza obumvikane, ba kuderha abandi bwinja ensiku zoshi, ba kucihasha, batûdu, ba kuzigira aminja, ba kucikubagirwa, ba kuyemera entanya z’abandi, birhohye omu bukengere, ba kuzigira Nnâmahanga ahali h’okuzigira amasîma g’igulu, ba kushumibwa n’obwishwekerezi bw’okunali kuli Nnâmahanga; ocishwekere oku bantu ba ntyo.” K’onaganirire abantu b’omulala gwawe erhi abinyu bemezi oku akalamo kayish’iba omw’igulu lihyahya? w24.01 buk. 6 cif. 13-14

Biba bya kuhuma oku murhima bwenene okumanya oku Yehova anashagalukire abakozi bage boshi! Ebibliya edesire ntya: “Nyamuzinda ashagaluka n’olubaga lwage.” (Enna. 149:4) Cikone, hali amango bantu baguma na baguma bavunika omurhima n’okucidosa ntya: ‘Ka kobinali Yehova ananshagalukire?’ Bantu banji baganirirwe omu Bibliya bakolire Yehova n’obwishwekerezi, hali amango babwine oku kwali kuzibu okuyemera oku Yehova al’ibashagalukire. (1 Sam. 1:6-10; Ayu. 29:2, 4; Enna. 51:11) Ebibliya eyerekine n’obwalagale oku abantu barhali bimana banayemerwa na Yehova. Omu njira nci? Rhushinganine rhube n’obuyemere muli Yezu n’okubatizibwa. (Yn. 3:16) Omu kujira ntyo, rhunayereke abantu boshi oku rhwahûngamire ebyaha birhu n’okulaganya Nnâmahanga oku rhwakajira obulonza bwage. (Ebj. 2:38; 3:19) Yehova anashagaluke erhi rhurhôla eyo mihigo yoshi y’okuba n’obwîra bwinja haguma naye. Erhi rhujira okwirhu koshi lyo rhugendekera rhwalama kushimbana n’eciragane rhwajiraga erhi rhucihâna emwa Yehova, anarhushagalukire n’okurhubona nka bîra bage.​—Enna. 25:14. w24.03 buk. 26 cif. 1-2

Rhwanayiga olwiganyo lw’abanafunzi ba Yezu omu kugendekera rhwahubiri ciru n’amango abarhegesi barhulahizize okujira ntyo. Rhwanayemera n’obwalagale oku Yehova arhurhabala lyo rhuhikiriza omukolo gwirhu gw’amahubiri. Co cirhumire okashenga Yehova oburhwali n’obwenge ciru n’oburhabale ly’olembera amango oli walwisa amazibu. Banji muli rhwe bali balwisa amazibu g’endwala erhi g’ekandalala, okufîrwa n’omuzigirwa wabo, akanga kazibu omu mulala, okulibuzibwa erhi gandi mazibu. N’ebintu nk’endwala z’okuyahukira n’amavita byarhumire kwaba kuzibu bwenene okulembera ago mazibu. Okabwira Yehova ebikuli emurhima byoshi. Okamubwira lugenda akanga kawe nk’oku wakanabwira omwîra wawe wa hofi-hofi. Oyemere n’obwalagale oku Yehova “akurhabala.” (Enna. 37:3, 5, Mashi Bible) Okushenga burhahusa kwanarhurhabala ‘rhurhadundaganaga omu mango g’amalibuko.’ (Rm. 12:12) Yehova aba amanyire ebi abakozi bage bali balembera, “anayumve emirenge yabo.”​—Enna. 145:18, 19. w23.05 buk. 5-6 cif. 12-15

Amango bihûnyire rhurhôle emihigo y’obulagirire, rhushinganine rhulonze okumanya “cici Nyakasane [Yehova] alonza” n’okujira kushimbana n’ebi alonza. (Ef. 5:17) Erhi rhubona amakanuni g’Ebibliya gakakola omu kanga kirhu, rhunabe rhukola rhumanyire entanya za Nnâmahanga lugenda ako kanga. Enyuma z’aho erhi rhukolesa ago makanuni, rhunarhôle emihigo minja.Omushombanyi wirhu Shetani, “olya mubi,” aba alonzize rhugeze kasanzi kanji rhuli rhwajira emikolo y’er’igulu, na ntyo rhubule akasanzi rhwakageza omu mukolo rhujirira Yehova. (1 Yn. 5:19) Omukristu anarhondera asegeza obwenge bwage oku nsaranga, amasomo, erhi akazi, ahali h’okubusegeza oku njira nyinji akakoleramwo Yehova. Erhi oko kwakahikira, anayerekana oku akola ali arhanya nk’oku abantu barhakolera Yehova barhanya. Okuderha okuli, ebyo bintu birhali bibi, cikone, birhashinganini birhôle enafasi ntanzi omu kalamo kirhu. w24.03 buk. 24 cif. 16-17