Rhulunge Cirongozi Wirhu Yezu Okuboko

1. Bici Yehova alonzize ene?

ENE, Nnâmahanga alonzize omwanzi mwinja gw’Obwami guyalizibwe omw’igulu lyoshi. (Mk. 13:10; 1 Tm. 2:3, 4) Ogo guli mukolo gwa Yehova, kunali kwa bulagirire bwenene okubona acishozire Omugala muzigirwa oku agulongoze. Rhwanayemera n’obwalagale oku bulya Yezu y’eri warhulongoza, omukolo gw’amahubiri gwahikirizibwa nk’oku Yehova alonzize embere obuzinda buhike.​—Mt. 24:14.

2. Bici rhwaganirira mw’eci cigabi?

² Mw’eci cigabi, rhwaganirira gurhi Yezu ali akolesa “mushizi mwirhonzi na mwikubagirwa” ly’arhuha ebiryo by’ekiroho n’okupanga abanafunzi bage lyo bajira akampanye kanene bwenene k’amahubiri karhasag’ijirwa bundi. (Mt. 24:45) Rhwabona n’ebi ngasi muguma wirhu akajira ly’alunga Yezu na mushizi mwirhonzi okuboko.

YEZU ALI ALONGOZA OMUKOLO GW’AMAHUBIRI

3. Buhashe buhi Yezu ahâbirwe?

³ Yezu ali alongoza omukolo gw’amahubiri. Bici byakarhuyemeza ntyo n’obwalagale? Kasanzi kasungunu embere Yezu agaluke empingu, abuganana na banafunzi bage balebe bishwekerezi oku ntondo nguma y’e Galilaya. Ababwira ntya: “Nahîrwe obuhashe bwoshi e mpingu n’en’igulu.” Oyumve ebindi adesire enyuma z’aho: “Mugendage omu mashanja goshi, mugajire babe baganda [banafunzi].” (Mt. 28:18, 19, Mashi Bible) K’okuderha oku obuhashe Yezu ahâbirwe, bulimwo n’obuhashe bw’okulongoza omukolo gw’amahubiri.

4. Bulya gurhi rhwakayemera n’obwalagale oku Yezu acigendekire alongoza omukolo gw’amahubiri?

⁴ Yezu adesire oku omukolo gw’okuhubiri n’okujira abanafunzi gwakajijirwe omu “mashanja goshi” n’oku akabire haguma n’abanafunzi bage “ensiku zoshi, kuhika oku buzinda bw’igulu.” (Mt. 28:20, Mashi Bible) Ezo nderho ziyerekine n’obwalagale oku omukolo gw’amahubiri gwakagendekire gwalongozibwa na Yezu kuhika muli gano mango girhu.

5. Gurhi rhuli rhwarhabala okuhikiriza olwandiko lw’Ennanga 110:3, NWT?

⁵ Yezu arhayobohaga mpu harhabe bakozi banji omu mango ga buzinda. Al’imanyire oku ezi nderho z’obulebi z’omwandisi w’ennanga zakahikirire: “Olubaga lwawe lwanacihâne n’obulonza omu lusiku lw’omurhwe gwawe.” (Enna. 110:3, NWT) Akaba nawe oli wajira omukolo gw’amahubiri, k’okuderha oku oli walunga Yezu na mushizi mwirhonzi okuboko, onali warhabala omu kuhikiriza obo bulebi. Ogo mukolo guli gwagendekera, cikone hali amazibu.

6. Mazibu maguma gahi abahubiri b’Obwami bali barhimanana nago ene?

⁶ Mazibu maguma abahubiri b’Obwami bali barhimanana nago, kuli kuhagalikwa. Abagoma, ebirongozi by’amadîni n’abantu b’epolitike babwizire bantu banji emyanzi y’obunywesi lugenda omukolo gwirhu. Erhi abantu b’omu mulala gwirhu, abantu rhumanyine nabo, n’abirhu banafunzi bakarhebwa n’eyo myanzi y’obunywesi, banarhushumya rhuleke okukolera Yehova, n’okuleka okujira omukolo gw’amahubiri. Omu bihugo biguma na biguma, abashombanyi birhu banahagalika bene wirhu omu kubayobohya, okubarhera, okubagwarha, erhi cirhu kubahira omu prizo. Ebyo bijiro birhakarhusomeza. Yezu alebire ntya: “Mwashombwe na boshi erhi izino lyani lirhuma.” (Mt. 24:9) Okubona oku rhushombirwe n’abantu, kurhuyemezize n’obwalagale oku rhuyemirwe na Yehova. (Mt. 5:11, 12) Shetani ye shumya abantu barhuhagalike. Cikone Yezu ye gwerhe misi minji bwenene kulusha Ibilisi! Kugerera oburhabale bwa Yezu, omwanzi mwinja guli gwahikira abantu b’amashanja goshi. Rhulole ebiyerekine ntyo.

7. Bici biyerekine n’obwalagale oku olwandiko lw’Amafulûlo 14:6, 7 luli lwahikirizibwa?

⁷ Agandi mazibu rhurhimanana nago omu mukolo gw’amahubiri kuli kubona oku bantu banji banaderhe endimi ziri lubero n’olu rhumanyire. Omu mafulûlo Yezu ayeresagya entumwa Yowane, alebire oku omu nsiku zirhu, omwanzi mwinja gwakahimire eco cihanzo. (Osome Amafulûlo 14:6, 7.) Omu njira zihi? Rhuli rhwajira okwirhu koshi lyo rhurhabala bantu banji bayumve omwanzi mwinja gw’Obwami. Ene, abantu omw’igulu lyoshi banasoma emyanzi eyimangire oku Bibliya eri oku site jw.org, bulya eyo site egwerhe emyanzi omu ndimi zirhalusire 1000! Embaraza Eri Yalongoza yayemire oku ecitabu cirhu c’obulagirire bwenene c’okuyigirigizamwo cidesire, Oshagalukire Akalamo Ensiku n’Amango! cihindulwe omu ndimi 700 na kulusha! Kandi ebiryo by’ekiroho biri byahânwa kugerera oku mavideo g’okurhabala ebihuli n’ebicapo omu mandishi g’emihurha. Rhuli rhwacibonera oku obulebi bw’Ebibliya buli bwahikirizibwa. Abantu “b’amashanja ga ngasi lulimi” bali bayiga okuderha “olulimi lucîre” lw’okuli kw’Ebibliya. (Zak. 8:23; Sof. 3:9, NWT) Ebyo byoshi biri byahikirizibwa kugerera obuhashe bwa cirongozi wirhu Yezu Kristu.

8. Bici omukolo gwirhu gw’okuhubiri guli gwahikiriza?

⁸ Ene, bantu 8 000 000 na kulusha b’omu bihugo 240 bali omw’ikubuliro lya Yehova, na ngasi mwaka, amakumi g’ebihumbi by’abantu bali babatizibwa. Cikone eby’obulagirire bwenene kulusha eyo mibalè, gali morhere g’ekiroho erhi “muntu muhyahya” abo banafunzi bahyahya bali baba nago. (Kl. 3:8-10) Bantu banji balesire olugenzi lubi, obuminya, akabôlo, n’okuzigira ecihugo cabo okurhalusire olugero. Obulebi buli omu Izaya 2:4 buli bwahikirizibwa; barhaciri ‘baciyigiriza okulwa amatumu [ivita].’ Rhuli rhwayerekana oku rhuli rhwakulikira obulongozi bwa Yezu Kristu, omu kucihangana okuyambala obumuntu buhyahya n’omu kurhabala abandi baje omw’ikubuliro lya Yehova. (Yn. 13:35; 1 Pt. 2:12) Bulya gurhi ebyo byoshi biri byahikirira? Bulya Yezu ali arhuha oburhabale rhulagirireko.

YEZU AHIZIREHO OMUSHIZI

9. Nk’oku biyerekinwe omu Mateyo 24:45-47, bici Yezu alebire oku byakabire omu mango ga buzinda?

⁹ Osome Mateyo 24:45-47, NWT. Yezu alebire oku omu mango ga buzinda, akahizireho ‘omushizi mwirhonzi na mwikubagirwa’ ly’ahâna ebiryo by’ekiroho. Co cirhumire rhwanalangalira oku oyo mushizi ali akola muli gano mango girhu. Na ntyo kobiri. Yezu ali akolesa ecigusho cisungunu c’abalume bashîge amavurha lyo baha olubaga lwa Nnâmahanga n’abantu basimisibwe n’okuli ebiryo by’ekiroho omu “mango gakwanine.” Abo balume barhacibona nka bo barhambo b’obuyemere bw’abandi. (2 Kr. 1:24) Lubero n’oko, baba bamanyire oku Yezu Kristu ye “murhegesi na nnawabo” w’abantu bage.​—Iz. 55:4, Mashi Bible.

10. Omu bitabu biri kw’ezi nfoto, citabu cihi cakurhabire ly’orhondera okulambagira omu njira ehêsire ebwa buzine bw’ensiku n’amango?

¹⁰ Kurhenga omu mwaka gwa 1919, mushizi mwirhonzi arheganyize bitabu binji biri lubero ly’aha abantu basimisibwe n’okuli obulyo bw’okuyiga okuli kurhenga omu Kanwa ka Nnâmahanga. Omu mwaka gwa 1921, acapisize ecitabu La Harpe de Dieu ly’arhabala abasimisibwe n’okuli bayige enyigirizo z’omusingi z’Ebibliya. Enyuma za kasanzi kalebe, haba obulagirire bw’okucapisa ebindi bitabu. Citabu cihi cakurhabire ly’omanya n’okuzigira Larha wirhu w’omu mpingu? Ka cali citabu “Que Dieu soit reconnu pour vrai!,” Kweli Iongozayo Kwenye Uzima wa Milele, Unaweza Kuishi Milele Katika Paradiso Duniani, Ujuzi Uongozao Kwenye Uhai Udumuo Milele, Biblia Inafundisha Kabisa Nini?, Bici Ebibliya Erhuyigiriza?, erhi citabu cirhu cihyahya, Oshagalukire Akalamo Ensiku n’Amango! Ebyo bitabu byoshi, byarheganyizibwe lyo birhurhabala rhujire abanafunzi. Byo rhwanal’ilagirireko amango byacapisibagwa.

11. Bulya gurhi rhweshi rhulagirire oku biryo by’ekiroho?

¹¹ Arhali abantu bahyahya basimisibwe n’okuli bone balagirire oku biryo bizibu by’ekiroho. Rhweshi rhubilagirireko. Entumwa Paolo yayandisire ntya: “Ebiryo bizibu biba bya bantu bakola bakulu.” Paolo acib’iyushula omu kuderha oku okukolesa ebi rhuli rhwayiga kurhenga omu Bibliya, kwanarhurhabala “lyo rhukamanya ebinja n’ebibi.” (Hb. 5:14, Mashi Bible) Bulya muli zino nsiku olugenzi lwa bantu banji luli lubi bwenene, kwanaba kuzibu okurhumikira amakanuni ga Yehova. Cikone, Yezu ali ajira rhube n’ebiryo by’ekiroho rhulagirireko lyo rhuba n’emisi. Ebyo biryo biri byarhenga omu Bibliya, Kanwa ka Nnâmahanga. Mushizi mwirhonzi na mwikubagirwa ali arheganya ebyo biryo n’okurhugabira byo, kugerera obulongozi bwa Yezu.

12. Aka Yezu, gurhi rhwahîremwo izino lya Nnâmahanga olukengwa?

¹² Aka Yezu, rhwahîre izino lya Nnâmahanga olukengwa lishinganine. (Yn. 17:6, 26) Kwa lwiganyo, omu mwaka gwa 1931, rhwarhôzire izino liyimangire oku Mandiko, ly’Abahamirizi ba Yehova. Omu kujira ntyo, rhwayerekine oku izino lya Nnâmahanga liri lya bulagirire kuli rhwe. (Iz. 43:10-12) Na kurhangira omu Mwezi gwa 10 gw’ogo mwaka, izino lya Nnâmahanga liba liyandike oku cijalada c’embere ca ngasi nimero y’eyi gazeti. Na kandi, empindûlo y’Ebibliya ehamagalwa Biblia—Tafsiri ya Ulimwengu Mupya, yagalwire izino lya Nnâmahanga ngasi hoshi lishinganine okuba omu Kanwa kage. Oko kuli lubero bwenene n’ebi amakanisa gacihamagala ga Cikristu gajijire omu kukûla izino Yehova omu mpindûlo zabo nyinji z’Ebibliya!

YEZU ABA APANZIRE ABANAFUNZI BAGE

13. Bici bikuyemezize n’obwalagale oku Yezu ali akolesa “mushizi mwirhonzi na mwikubagirwa” ene? (Yowane 6:68)

¹³ Kugerera “mushizi mwirhonzi na mwikubagirwa,” Yezu arhondezize ikubuliro lyago-lyago hanw’igulu lyo ligendekeza enterekêro ecîre. Gurhi ociyumva lugenda er’ikubuliro? Nkaba onaciyumve ak’entumwa Petro yabwiraga Yezu ntya: “Emwa ndi rhwaja? Wegwerhe ebinwa by’obuzine bw’ensiku n’amango.” (Yn. 6:68) Gurhi ngasi muguma wirhu akabire ene, nk’arhamanyaga ikubuliro lya Yehova? Kugerera er’ikubuliro, Yezu ali ajira rhulisibwe bwinja omu hali y’ekiroho. Na kandi, ali arhukomereza lyo rhuhikiriza bwinja omukolo gw’amahubiri. Ananali arhurhabala rhuyambale “omuntu muhyahya,” lyo rhushagalusa Yehova.​—Ef. 4:24.

14. Bunguke buhi wabire nabo omukuba omw’ikubuliro lya Yehova omu kasanzi k’obu bulwala bw’e COVID-19?

¹⁴ Yezu ali arhuha obulongozi bwinja omu mango g’amazibu. Rhwabwine obunguke bw’obo bulongozi erhi obu bulwala bw’e COVID-19 burhondera. Omu mango bantu banji ba mw’er’igulu barhal’imanyire gurhi bajira, Yezu arhuhîre obulongozi bw’obwalagale lyo rhugendekera rhwaba n’amagala minja. Rhwahâbîrwe omurhima rhukayambala amaske amango rhuli haguma n’abandi bantu n’okurhayegera abandi. Abagula bakengezibwe oku, bagendekere baganira n’abantu boshi omu cigamba n’okumanya amalagirire gabo g’omubiri n’ag’ekiroho. (Iz. 32:1, 2) Rhwahâbirwe obundi bulongozi n’okuhâbwa omurhima kugerera eraporo z’Embaraza Eri Yalongoza.

15. Bulongozi buhi rhwahâbirwe lugenda gurhi rhwakajira entimanano zirhu n’omukolo gw’amahubiri omu kasanzi k’obu bulwala bw’okuyahukira, na bunguke buhi obo bulongozi bwarhudwirhire?

¹⁵ Omu kasanzi k’obu bulwala bw’okuyahukira, kandi rhwahâbirwe obulongozi bw’obwalagale lugenda oku rhwakajira entimanano zirhu z’ecigamba n’omukolo gwirhu gw’amahubiri. Buzira kulegama, rhwarhondera okujira entimanano zirhu z’ecigamba, n’entimanano zirhu nkulu kugerera e vidéoconférence. Rhwanarhondera okuhubiri kugerera amaruba n’etelefone. Yehova agishire obushiru bwirhu. Tawi nyinji zahânyire eraporo ziyerekine oku omubalè gw’abahubiri babo gwayushusire. Kobinali, hali eby’okuhâna omurhima banji bacibwinire muli kano kasanzi.​—Olole ecisanduku cidesire, “Yehova Ali Agisha Omukolo Gwirhu gw’Amahubiri.”

16. Bici rhwakayemera n’obwalagale?

¹⁶ Nkaba hali baguma na baguma barhanyize oku ikubuliro lirhalusire olugero omu kuba masu lugenda obu bulwala bw’okuyahukira. Cikone, kanji-kanji byabonekine n’obwalagale oku obulongozi rhwahâbirwe bwali bwa bwenge. (Mt. 11:19) N’erhi rhurhanya gurhi Yezu ali alongoza abantu bage omu njira y’obuzigire, oko kunarhuyemeze n’obwalagale oku ciru mazibu gahi gakarhuhikira omu mango gayisha, Yehova n’Omugala muzigirwa baba haguma na nirhu.​—Osome Abahabraniya 13:5, 6.

17. Gurhi oli waciyumva enyanya z’okukola idako ly’obulongozi bwa Yezu?

¹⁷ Okukola idako ly’obulongozi bwa Yezu kuli kwarhulerhera migisho minji bwenene! Rhuli omw’ikubuliro lirhagabikinimwo enyanya z’enkomêdu, amashanja, n’endimi ziri lubero. Rhuli rhwalisibwa bwinja omu njira y’ekiroho rhunali rhwakomerezibwa bwinja-bwinja lyo rhuhikiriza omukolo gwirhu gw’amahubiri. Ngasi muguma wirhu ali ayigirizibwa oku akayambalamwo omuntu muhyahya, rhunali rhwayiga okuzigirana rhwene na nnene. Rhugwerhe ebirhumire byoshi by’okucidinira Cirongozi wirhu, Yezu!