K’Ocirheganyize ‘Okuyima Igulu’?

K’OCIRHEGANYIZE OKURHEGEKA IGULU?

Erhi Yehova aha bene bantu irhegeko oku ‘babumbe igulu banalirhegeke,’ ayerekine oku igulu lyoshi lyakahikire aha lyaba paradizo. (Murh. 1:28) Abayish’ilama ensiku n’amango hanw’igulu bagwasirwe bayish’irhumikira er’irhegeko Nnâmahanga ahânaga aha murhondero. Igulu lirhakaba paradizo ho n’aho bulya obustani bw’e Edeni burhacihaba. Hayish’iba binji bya kujira lyo rhucêsa amaeneo gasherezibwe ene. Ogo gwayish’iba mukolo munji bwenene!

Oko kurhukengezize omukolo Abaisraheli bal’igwasirwe bajire erhi barhenga e Babiloni. Ecihugo cabo cajijire myaka 70 cirhalimwo muntu. Cikone Izaya ali erhi alebire oku kugerera oburhabale bwa Yehova, bakabire n’obuhashe bw’okucib’iyinjihya ecihugo cabo. Obo bulebi bwal’idesire ntya: “Irungu lyage alijira aka Edeni, n’idaho lyûmu alihindula ishwa lya Nyakasane [Yehova, NWT].” (Iz. 51:3) Yehova arhabire Abaisraheli bajira ecihugo cabo cacib’iba cinja. Ko n’oko, kugerera oburhabale bwage, abantu bayish’iyima igulu bahasha okulirhegeka. Ciru n’ene wanayerekana oku olonzize okuyish’ijira k’ogo mukolo.

Njira nguma wakayerekanamwo ntyo kuli kujira oku wakanahasha koshi ly’enyumpa yawe n’ah’olama hagendekera haba hacîre hanapanzirwe bwinja. Wanajira ntyo ciru akaba abalungu bawe barhashibirira eby’obusafi. Kandi wanajira ntyo omu kurhabala oku mukolo gw’okucêsa Enyumpa y’Entimanano n’Enyumpa y’Entimanano Nkulu. Erhi akaba akanga kawe kakuyemerire, kandi wanayunjuza efomu y’okuba volontere ly’orhabala oku mukolo gw’okuhâna oburhabale omu eneo yinyu omu mango g’obuhanya. Oko kwanayerekana oku olonzize okurhabala bene winyu na bali binyu amango hali obulagirire. Ocidose ntya: ‘Ka nanayiga bulenga bulebe nakayish’ikolesa erhi Yehova akantabala mbe omu bantu bayish’iyima igulu?’

K’OCIRHEGANYIZE OKUHIKIRIZA AMALAGIRIRE G’ABANTU BAYISH’IFÛKA?

Erhi Yezu afûla mwali wa Yairo, ho n’aho aderha oku bahe oyo mwana akantu k’okulya. (Mk. 5:42, 43) Nkaba gurhakabire mukolo muzibu okushibirira oyo mwana-nyere w’emyaka 12. Cikone orhanye omukolo munji byayish’ihûna okujira hano Yezu ahikiriza eciragane cage cidesire oku “abali omu nshinda boshi barhengemwo bamayumva izu lyage.” (Yn. 5:28, 29) Ciru akaba Ebibliya erhadesiri binji lugenda obufûke, rhwanarhanya oku abantu bayish’ifûka bayish’iba balagirire oku burhabale bwirhu lyo bapata ebiryo, ahantu h’okulama, n’emishangi. Ka wanayerekana ciru n’ene oku ocirheganyize okuyish’irhabala? Alaga madoso maguma na maguma wakarhanyako.

Erhi batangaza oku mwangalizi w’omuzunguko alambagirira ecigamba cinyu, k’onabe mubidu okumulalika lyo mushangira ebiryo haguma? Erhi bene wirhu na bali birhu bali omu mukolo gwago-gwago gw’akasanzi koshi bakarhenzibwa oku Beteli n’okurhumwa baj’ikolera omu cigamba kandi erhi mwangalizi w’omuzunguko akarhenga omu mukolo gwage gw’omuzunguko, ka wanabarhabala lyo bapata ahantu h’okulama? Erhi akaba entimanano y’e eneo erhi yago-yago yajirwa omu eneo yinyu, ka wanaba volontere ly’orhabala oku mukolo embere n’enyuma z’eyo ntimanano nkulu erhi ly’oyegereza ebigolo byayisha kw’eyo ntimanano?

K’OCIRHEGANYIZE OKUYIGIRIZA ABANTU BAYISH’IFÛKA?

Kushimbana n’olwandiko lw’Ebijiro by’Entumwa 24:15, rhulangalire oku emiliyoni y’abantu yayish’ifûka. Banji mulibo bayish’iba bantu barhabaga n’obulyo bw’okumanya Yehova embere bafê. Bayish’ihabwa obo bulyo enyuma z’okufûka kwabo.a Abakozi ba Yehova bishwekerezi bagwerhe obumanye bunji bayish’irhabala oku mukolo gw’okuyigiriza guli nk’ogo. (Iz. 11:9) Charlotte, wajijire omukolo gw’amahubiri omu Bulaya, omu Amérique du Sud, n’omu Afrique, ali alindirira okujira ntyo. Adesire ntya n’obushagaluke: “Ndi nalindirira okuyigiriza abantu omu mango g’obufûke. Erhi nsoma omwanzi guganirire muntu mulebe walamaga mira, kanji-kanji nantanye ntya: ‘Acibage oyu muntu al’imanyire Yehova, akalamo kage karhakabire ntya.’ Ndi nalindirira okuyish’iganirira abantu bafûka lugenda Yehova na gurhi akalamo kabo kaba kinja bwenene bakamukolera.”

Ciru n’abakozi ba Yehova bishwekerezi bal’ilamire embere Yezu ayishe hanw’igulu bayish’iba na binji bya kuyiga. Orhanye kunganaci rhwayish’iba n’omwishingo n’olukengwa lw’okuhugûlira Daniyeli okuhikirizibwa kw’obulebi ayandikaga cikone arhal’ibuhugûsirwe. (Dan. 12:8) Erhi omwishingo rhwayish’iba nago omu kurhabala Ruti na Noemi bamanye oku omw’iburha lyabo mwo mwarhenzire Masiya. Gwayish’iba mwishingo munji okushangira mw’ogo mukolo gw’okuyigiriza omw’igulu lyoshi, buzira mazibu na buzira ebintu by’okuheka obwenge biri mw’er’igulu ly’ene!

Gurhi wakajira ene ly’oyerekana oku ocirheganyize ly’oyish’irhabala kw’ogo mukolo? Njira nguma y’obwalagale wakajiramwo ntyo kuli kukubûla obulenga bwawe bw’okuyigiriza n’okushangira ngasi mango oku mukolo gw’okuyigiriza guli gwajirwa omw’igulu lyoshi ene. (Mt. 24:14) Erhi akaba akanga kawe erhi emyaka yawe erhakuyemeriri okujira binji mw’ogo mukolo ene, obushiru bwawe bwanayerekana oku ocirheganyize okuyigiriza abantu bayish’ifûka.

Kuli kwinja okurhanya kw’aga madoso g’obulagirire: Ka kobinali oli walindirira okuyima igulu? K’oshagalukire bwenene obulangalire rhugwerhe bw’okurhegeka igulu, okuhikirigiza abantu bayish’ifûlwa amalagirire gabo, n’okubayigiriza? Wanayerekana oku ocirheganyize okujira ntyo omu kukolesa obulyo ogwerhe ene bw’okushangira oku mikolo eri nk’eyo wayish’ijira hano oyima igulu!