K’ocikengire?

Ka wacihanganyire okusoma enimero z’Ilabiro ly’Akalalizi z’ogu mwaka? Ololage erhi wanashuzagya kw’aga madoso:

Luhembo luhi rhwaba nalo erhi rhwakaciha akasanzi k’okuganiza Yehova, okumuyumvirhiza, n’okurhanya okubimuyerekire?

Rhwanakarhôla emihigo minja, rhwanaba balimu binja, obuyemere bwirhu bwanasêra bwenene, n’obuzigire bwirhu kuli Yehova bwanayushuka bwenene.​—w22.01, buk. 30-31.

Gurhi okuciyigiriza okulangalira Yehova na bene bantu akolesa lyo barhulongoza kwakarhurhabalamwo?

Kano ko kasanzi k’okuciyigiriza okulangalira enjira ya Yehova y’okujira ebintu omu kurhaba n’akarhinda lugenda obulongozi n’emihigo erhôzirwe n’abagula. Omu kasanzi k’amalibuko madârhi, rhwayish’iba babidu okurhumikira ciru rhwakahâbwa obulongozi bubonekine nka buhyahya, buzibu okurhumikira, erhi burhayumvikini.​—w22.02, buk. 4-6.

Bici malahika alonzagya okuderha erhi abwira Zakariya lugenda “olukamba lw’enivo luli omu maboko ga [Guvernere] Zorobabeli”? (Zak. 4:8-10)

Eco cibonekerezi cayemezize abakozi ba Nnâmahanga oku, ciru akaba ehekalu yakag’ibonekana oku eri ya lugero kuli bantu baguma na baguma, yakayunjwire yakanahikirizize ebi Yehova al’ilonzize ebe.​—w22.03, buk. 16-17.

Gurhi rhwakabamwo “lwiganyo . . . omu nderho”? (1 Tm. 4:12)

Rhunaganire n’olukogo n’obukenge amango rhuli omu mukolo gw’amahubiri, rhunayimbe n’omurhima goshi, rhunahâne amashuzo oku ntimanano ngasi mango, rhunaderhe okuli n’omu njira y’okuyubaka abandi, na kandi rhunayake enderho zoshi z’ebijaci.​—w22.04, buk. 6-9.

Bulya gurhi ebimanyiso by’ebiryanyi bini (mami) biganirirwe omu Daniyeli cigabi ca 7 byoshi biyerekine ciryanyi ciguma omu lwandiko lw’Amafulûlo 13:1, 2?

Eciryanyi ciganirirwe omu citabu c’Amafulûlo cigabi ca 13 cirhashushanyizi burhegesi buguma bone erhi bwami, nka Roma. Cikone, eco ciryanyi cishushanyize amarhegesi goshi g’epolitike makulu gamakarhegeka bene bantu.​—w22.05, buk. 9.

Njira ehi y’obulagirire rhwakayerekanamwo oku rhulangalire obushinganyanya bwa Nnâmahanga?

Erhi akaba muntu mulebe anarhujacire, anarhugayisize, erhi kurhugokeza, rhunacihangane rhuleke okubîka oburhe n’akarhinda omu murhima gwirhu; rhunaleke ebintu omu maboko ga Yehova. Ayish’ikûla amazibu goshi gadwirhwe n’ecaha.​—w22.06, buk. 10-11.

Bici mwene wirhu ohabirwe olukengwa lw’okusalira oku ntimanano y’ecigamba ashinganine akengere?

Isala lirhashinganini likakolesibwa omu kuhâna amahano erhi omu kujira amatangazo. Arhashinganini aderhe “binji,” ci bwenene oku murhondero gw’entimanano. (Mt. 6:7)​—w22.07, buk. 24-25.

Gurhi ‘abajizire amabi bafûkiremwo olubanja’? (Yn. 5:29)

Barhayish’itwirwe olubanja lubi, kushimbana n’ebijiro bajiraga embere bâfe. Ebijiro byabo erhi lugenzi lwabo lwayish’ilabirizibwa enyuma z’okufûka kwabo.​—w22.09, buk. 18.

Nderho zihi z’okuhâna omurhima mwene wirhu Joseph Rutherford aderhaga oku ntimanano nkulu y’omu Mwezi gwa 9, 1922?

Oku ntimanano nkulu yajiragwa omu Cedar Point, Ohio, États-Unis, aderha ntya: “Omwami ali arhegeka! Mugwerhe omukolo gw’okumanyisa ngasi muntu lugenda oko. Co cirhumire, muyalize, muyalize, muyalize, Omwami n’Obwami bwage!”​—w22.10, buk. 3-5.

Kushimbana n’ecitabu ca Izaya cigabi ca 30, njira zihi isharhu Nnâmahanga arhurhabalamwo lyo rhulembera amazibu girhu?

Eco cigabi ciyerekine oku anajire ntyo omu (1) kuyumvirhiza bwinja amasala girhu n’okugashuzako, omu (2) kurhuha obulongozi, na kandi (3) omu kurhuha emigisho muli gano mango n’omu mango gayisha.​—w22.11, buk. 9.

Bulya gurhi rhwanaderha oku enderho ziri omu Ennanga 37:10, 11, 29 zahikirire omu mango ga mira na kandi zahikirira omu mango gayisha?

Enderho za Daudi ziyerekine ehali nyinja zali omu cihugo c’e Israheli, kwa lwiganyo amango g’oburhegesi bwa Salomoni. Yezu aganirire eparadizo y’amango gayisha anagalukira enderho ziri omu mulongo gwa 11. (Mt. 5:5; Lk. 23:43)​—w22.12, buk. 8-10, 14.