Wanaba n’Omurhûla omu Mango g’Amazibu

1. “Omurhûla gwa Nyamuzinda” byo bici, na gurhi rhwakayunguka omu kuba nago? (Abafilipi 4:6, 7)

HABA murhûla mulebe abantu b’er’igulu barhaba bamanyire ciru n’ehitya. Ogo go ‘murhûla gwa Nyamuzinda,’ k’okuderha oburhulirize omuntu aba nabo enyanya z’okuba n’obwîra bwinja haguma na Larha wirhu w’omu mpingu. Amango rhugwerhe omurhûla gwa Nyamuzinda, rhunaciyumve rhuli omu bulanzi. (Osome Abafilipi 4:6, 7.) Rhunashagalukire okuba n’obwîra bwa hofi-hofi haguma n’abantu bamuzigira. Na kandi rhunashagalukire obwîra bwa hofi-hofi haguma na “Nyamuzinda w’omurhûla.” (1 Ts. 5:23) Erhi rhwakaba rhumanyire Larha wirhu, rhumulangalire, rhunali rhwamurhumikira, omurhûla gwage gwanarhuliriza omurhima gwirhu guhangayisire amango rhuli omu kanga kazibu.

2. Bulya gurhi rhwanayemera n’obwalagale oku byanahashikana rhube n’omurhûla gwa Nyamuzinda?

² Ka kobinali byanahashikana rhube n’omurhûla gwa Nyamuzinda amango rhuli omu mazibu, nk’obulwala bw’okuyahukira, obuhanya bucilerha bone, akavulindi egarhi k’abantu bone na nnene, erhi amango rhuli rhwalibuzibwa? Ago mazibu goshi ganarhuyobohya. Ciru akaba ntyo, Yezu ahîre abanafunzi bage er’ihano: “Muhire omurhima omu nda, murhanayobohaga.” (Yn. 14:27) Eby’okushagalusa kuli kubona oku bene wirhu na bali birhu banakakulikira er’ihano lya Yezu. Kugerera oburhabale bwa Yehova, banahashe okuba n’omurhûla ciru akaba bali balwisa amazibu madarhi.

OKU RHWAKABA N’OMURHÛLA OMU KASANZI K’ENDWALA Z’OKUYAHUKIRA

3. Gurhi endwala y’okuyahukira yakarhuma rhwabula omurhûla?

³ Endwala y’okuyahukira yanashanja hofi ngasi kantu omu kalamo kirhu. Orhanye oku mazibu endwala y’e COVID-19 yadwirhire bantu banji. Omu raporo nguma, bantu banji omu bantu bajiriragwako obusagasi bal’igwerhe amazibu g’okuj’iro omu mango g’eyo ndwala. Eyo ndwala yayushwire omubalè gw’abantu bagwerhe amahangayiko, abavunisire omurhima, abanywa amamvu kulusha olugero, abakolesa amafumu g’okucilalusa, abajira obuminya omu mulala, n’abalonza okuciniga. Erhi akaba omu eneo yinyu muli endwala y’okuyahukira, gurhi wakajira ly’orhag’ihangayika bwenene onashagalukire omurhûla gwa Nyamuzinda?

4. Bulya gurhi okumanya obulebi bwa Yezu lugenda ensiku nzinda kunarhulerhere omurhûla?

⁴ Yezu alebire oku omu nsiku nzinda, hakabire ebyahira erhi ndwala z’okuyahukira, hantu “hanji.” (Lk. 21:11) Gurhi okumanya ntyo kwakarhulerhera omurhûla? Rhurhasomerwa erhi endwala z’okuyahukira zirhondera. Rhunahugûkwe oku ebintu biri byajirikana nk’oku Yezu anaderhaga. Co cirhumire, rhushinganine okurhumikira ihano Yezu ahaga abantu balamire omu nsiku nzinda. Aderha ntya: “Mumanye murhayobohaga.”​—Mt. 24:6.

5. (a) Nk’oku olwandiko lw’Abafilipi 4:8, 9 ludesire, bici rhwakahûna omu masala girhu omu mango g’obulwala bw’okuyahukira? (b) Gurhi okuyumvirhiza obusomi bw’Ebibliya buli arejistré kwakakurhabalamwo?

⁵ Endwala y’okuyahukira yanarhulerhera ebihamba n’oboba bunji. Ntyo ko byahikiraga mwali wirhu ohamagalwa Desi.b Erhi mwishe, muzala wage, na dogtere wage boshi bafâ n’e COVID-19, akayoboha oku naye agwarhwa n’eyo ndwala anayiyahukize nnina wal’ikola mugikulu. Kandi akayoboha oku aheza akazi kage enyanya z’eyo ndwala, n’oko kwakarhuma acidosa gurhi akapatamwo ebiryo n’ensaranga z’okulipira enyumpa. Ahikira aha akayoboha bwenene enyanya z’ebyo bintu n’oko kwarhuma akabula iro budufu. Cikone Desi acib’iba n’omurhûla. Bici byamurhabire? Akashenga Yehova amurhabale ly’arhulirira n’okuba n’entanya nyinja. (Osome Abafilipi 4:8, 9.) Akayumvirhiza gurhi Yehova ali “amuganiza” kugerera obusomi bw’Ebibliya buli arejistré. Adesire ntya: “Amazu garhulirire g’abantu basomaga gakarhuliriza ebihamba byani n’okunkengeza olukogo lwa Yehova.”​—Enna. 94:19.

6. Gurhi okujira ifunzo lyawe wene n’okuja oku ntimanano z’ecigamba kwakakurhabalamwo?

⁶ Kobinali, obulwala bw’okuyahukira bwanashanja bintu biguma na biguma rhuba rhukomire okujira, cikone orhayemeraga burhume waleka okujira ifunzo lyawe wene erhi okuja oku ntimanano. Emyanzi eganirire ebyahikire abantu omu kalamo eri omu bicapo birhu n’omu mavideo yakukengeza oku bene winyu na bali binyu bali bagendekera okubêra bishwekerezi ciru akaba bali bahikirwa n’ago mazibu. (1 Pt. 5:9) Entimanano zanakurhabala oyunjuze entanya nyinja ziyimangire oku Mandiko omu bukengere bwawe. Kandi zanakurhabala obe n’obulyo bw’okuha abandi omurhima n’okuguhabwa nawe wene. (Rm. 1:11, 12) Okurhanya gurhi Yehova arhabiremwo abakozi bage amango bal’ilwazire, amango bal’iyobohire, erhi amango bakag’iciyumva kahumba, kwanazibuhya obuyemere bwawe n’okukuyemeza n’obwalagale oku nawe akurhabala.

7. Bici olwiganyo lw’entumwa Yowane lwakakuyigiriza?

⁷ Ojire okwawe koshi ly’okaganira na bene winyu na bali binyu. Hali amango endwala y’okuyahukira yakarhuma rhurhakayegera abirhu bakozi ba Yehova. Omu kasanzi ka ntyo, nkaba wanaciyumva nk’oku entumwa Yowane yaciyumvagya. Al’ilonzize okubona omwîra wage Gayo busu oku busu. (3 Yn. 13, 14) Ciru akaba ntyo, Yowane al’imanyire oku muli kasanzi kalebe, arhakahashir’ibonana na Gayo. Muli ntyo, Yowane ajira oku akanahashire; ayandikira Gayo amaruba. Erhi akaba birhahashikini ngasi mango okubonana na bene winyu na bali binyu busu oku busu, ocihangane okabaganiza kugerera etelefone, evideo, erhi kubarhumira emesaje. Erhi wakagendekera okuganira n’abinyu bemezi, orhakaciciyumva oli kahumba bwenene wananaciyumva oli omu murhûla. Okaganiza abagula, bwenene amango oli waciyumva ogwerhe amahangayiko, onayemere bakuhe omurhima omu njira y’obuzigire.​—Iz. 32:1, 2.

OKU RHWAKABA N’OMURHÛLA AMANGO G’OBUHANYA BUCILERHA BONE

8. Gurhi okuhikirwa n’obuhanya bucilerha bone kwakarhuma wabula omurhûla?

⁸ Erhi akaba wahikirwe n’obuhanya bw’okuyunjulira kw’amishi, omusisi gw’idaho, erhi muliro, nkaba wahangayisire bwenene kasanzi karhali kanyi. Erhi akaba abazigirwa bawe bafîre enyanya z’obo buhanya, erhi ebirugu byawe byasherera, nkaba waciyumvirhe obabîre, waheza obulangalire, erhi ciru kuyumva oburhe. Oko kurhali kuderha oku oba ozigire eby’en’igulu erhi oku orhagwerhi buyemere. Wahikirwe n’akanga kazibu, na bantu baguma na baguma banakurhanyiza oku wajira okurhashinganini. (Ayu. 1:11) Cikone, ciru wakahikirwa n’akanga k’okuvuna omurhima, wanaba n’omurhûla. Bici byakakurhabala?

9. Bici Yezu adesire ly’arhurheganya oku mahanya gacilerha gone?

⁹ Okengere ebi Yezu alebaga. Bantu baguma na baguma ba mw’er’igulu banarhanye oku obuhanya bucilerha bone burhakabahikira omu kalamo, cikone rhwehe rhumanyire oku amahanya gayushuka muli kano kasanzi kirhu, na maguma na maguma ganarhuhikira. Yezu abwizire abanafunzi bage oku haba ‘emisisi minene y’idaho’ n’agandi mahanya gacilerha gone embere obuzinda buhike. (Lk. 21:11) Kandi alebire oku “amabi gayish’iyushûka,” n’oko kuli kwahikirira ene. Kwa lwiganyo, rhuli rhwabona ebijiro bigalugalu, obuminya, n’obunizi. (Mt. 24:12) Yezu arhaderhaga ciru n’ehitya oku ago mahanya gakajire gahikira abantu Yehova alahire bone. Kobinali, bakozi ba Yehova banji bishwekerezi bahikirwe n’amahanya gacilerha gone. (Iz. 57:1; 2 Kr. 11:25) Yehova arhakajira ecisomerine ly’arhulanga n’amahanya goshi, cikone arhuha ngasi byoshi rhulagirireko lyo rhugendekera rhwaba n’omurhûla.

10. Bulya gurhi okucirheganya embere z’akasanzi enyanya z’obuhanya bucilerha bone kuyerekine oku rhugwerhe obuyemere? (Emigani 22:3)

¹⁰ Omu kanga kahûnyire okujira duba-duba, kwanaba kulembu kuli rhwe okugendekera rhwarhulirira erhi akaba rhwacirheganyize embere z’akasanzi. Cikone, k’okucirheganya embere z’akasanzi kuyerekine oku rhurhagwerhi obuyemere muli Yehova? Nanga ciru n’ehitya. Okucirheganya embere z’akasanzi lugenda obuhanya kuyerekine oku rhugwerhe obuyemere omu buhashe bwage bw’okurhushibirira. Bulya gurhi rhudesire ntyo? Akanwa ka Nnâmahanga karhurhonzire rhukacirheganya embere z’akasanzi lugenda amahanya gacilerha gone gakarhuhikira. (Osome Emigani 22:3.) Kandi kugerera emyanzi eba omu magazeti girhu, entimanano z’ecigamba, n’amatangazo gajirwa omu kasanzi kashinganine, ikubuliro lya Nnâmahanga linarhukengeze kanji-kanji oku rhukacirheganya lugenda akanga kahûna okujira duba-duba.c Ka rhuba rhulangalire Yehova? Akaba neci, rhwanarhumikira ago mahano buno, embere obuhanya bucilerha bone buhike.

11. Bici olwiganyo lwa Margaret lukuyigirizize?

¹¹ Rhuganirire ebyahikiraga mwali wirhu muguma ohamagalwa Margaret. Abarhegesi bamuhûna oku arhenge omu nyumpa yage erhi omuliro gurhenga omu muzirhu guyâka omu eneo yabo. Bulya bantu banji bwenene bakag’iyaka ca ligumiza, hali mituga minji bwenene omu njira n’omuntu arhabonaga aha agera. Omugi mwiru gwal’iyunjwire ngasi hoshi, na Margaret arhahashaga okurhenga omu mutuga gwage omu kasanzi kalebe. Ciru akaba ntyo, acira bulya al’icirheganyize embere z’akasanzi. Omu hishoho hyage, agwerhe akarte ajaga akolesa ly’abona erindi ibarabara ageramwo. Ciru embere z’aho arhanzir’igera n’omutuga gwage mw’er’ibarabara ly’amanya aha akagera omu kanga kahûnyire okujira duba-duba. Bulya Margaret aliyosire ecirheganyize, acira obo buhanya.

12. Bulya gurhi rhurhumikira amarhegeko g’okurhulanga rhuhabwa?

¹² Lyo barhulanga n’okuyusa akavulindi, abarhegesi banarhuhûna rhurharhenganga omu mwabirhwe, rhurhenge omu eneo yirhu, erhi rhurhumikire agandi marhegeko g’obulagirire. Bantu baguma na baguma barhaba babidu okurhumikira ago marhegeko erhi banaderhe oku bajira ntyo agandi mango bulya barhalonzizi okusiga ebirugu byabo. Gurhi Abakristu bohe bajira? Ebibliya erhubwizire ntya: “Mukaz’iyumva ngasi murhegesi w’en’igulu erhi Nyakasane orhuma: akaba mwami, mumukengere obukulu bwage; akaba murhambo, bulya barhumirwe naye.” (1 Pt. 2:13, 14) Kandi ikubuliro lya Nnâmahanga linarhuhe obulongozi lyo lirhulanga. Rhunakengezibwe kanji-kanji oku rhuhe abagula enimero zirhu z’etelefone n’eadresi zirhu lyo bamanya aha rhuli omu kanga kahûnyire okujira duba-duba. Ka wajijire ntyo? Rhwanahabwa obulongozi budesire oku rhubêre omu eneo yirhu, rhurhengemwo, oku rhwahabwamwo oburhabale, erhi lugenda gurhi na mangaci rhwakaha abandi oburhabale. Erhi rhwakabula burhumikira obo bulongozi, rhwanahira obuzine bwirhu n’obuzine bw’abagula omu mazibu. Okengere oku abo balume bishwekerezi banarhulange. (Hb. 13:17) Margaret adesire ntya: “Nyemire n’obwalagale oku okukulikira obulongozi bw’abagula n’obw’ikubuliro kwayokwire obuzine bwani.”

13. Bici byarhabire Bakristu banji bayasire aha mwababwe bagendekere baba n’omwishingo n’omurhûla?

¹³ Bene wirhu na bali birhu banji bayasire aha mwababwe enyanya z’obuhanya bucilerha bone, ivita, erhi enyanya z’akavulindi egarhi k’abantu bone na nnene, bajijire okwabo koshi lyo bakomera akanga kabo kahyahya n’okurhondera bajira binji ho n’aho omu mikolo y’eciteokrasi. Ak’Abakristu b’omu myaka igana mirhanzi bashandabanaga eyi n’eyi erhi kulibuzibwa kurhuma, abo bene wirhu na bali birhu banagendekere “bayigiriza akanwa ka Nnâmahanga.” (Ebj. 8:4) Okuhubiri kunabarhabale basegeze obwenge bwabo oku Bwami bwa Nnâmahanga ahali h’okubusegeza oku kanga kazibu balimwo. Okujira ntyo kwabarhabire bagendekere baba n’omwishingo n’omurhûla.

OKU RHWAKABA N’OMURHÛLA AMANGO RHULI RHWALIBUZIBWA

14. Gurhi okulibuzibwa kwakarhuma rhurhaba n’omurhûla?

¹⁴ Amango rhuli rhwalibuzibwa, rhwanaheza bintu binji birhuma rhwaba n’omurhûla. Rhunaciyumve rhugwerhe omwishingo rhunarhimusirwe amango rhugwerhe oluhuma lw’okurhimanana haguma, okuhubiri buzira cihanzo, n’okuhikiriza emikolo yirhu ya ngasi lusiku buzira kuyoboha oku barhushweka. Erhi rhwakanyagwa oluhuma lw’okujira ebyo byoshi, rhwanakaciyumva rhuhangayisire omu kuyoboha gurhi byaba buzinda. Okuciyumva ntyo kurhali kubi. Cikone, rhugwasirwe rhube masu. Yezu ayerekine oku okulibuzibwa kwakarhumire abanafunzi bage basarhala. (Yn. 16:1, 2) Gurhigi rhwakagendekera rhwaba n’omurhûla amango rhuli rhwalibuzibwa?

15. Bulya gurhi rhurhashinganini rhuyobohe okulibuzibwa? (Yowane 15:20; 16:33)

¹⁵ Akanwa ka Nnâmahanga karhubwizire ntya: “Ngasi boshi balonza okulama omu bukombêdu [bwishwekerezi kuli Nnâmahanga, NWT] muli Kristu Yezu, babone amalibuko.” (2 Tm. 3:12) Mwene wirhu muguma ohamagalwa Andrei agwerhe amazibu g’okuyemera ezo nderho erhi omukolo gwirhu guyus’ihanzibwa omu cihugo cabo. Akarhanya ntya: ‘Omu cihugo cirhu muli Bahamirizi ba Yehova banji bwenene. Gurhi abarhegesi b’ecihugo bakarhushwekamwo rhweshi?’ Ahali h’okulerhera Andrei omurhûla, ezo ntanya zakarhuma ahangayika ngasi mango. Abandi bene wirhu na bali birhu baleka ebintu omu maboko ga Yehova, barhanakag’ilonza okuciyemeza oku birhakahashikana bashwekwe. Bal’imanyire oku byanahashikana bashwekwe, cikone oko kurhakag’ibahangayisa bwenene aka Andrei. Muli ntyo Andrei ahiga okuba n’entanya ziri nk’ezabo analangalira Nnâmahanga. Enyuma za kasanzi kasungunu, acib’iba n’omurhûla, n’ene agwerhe omwishingo ciru akaba haciri mazibu manji. Nirhu byanaba ntyo kuli rhwe. Ciru akaba Yezu arhubwizire oku rhwalibuzibwa, kandi arhuyemezize n’obwalagale oku rhwanahash’ibêra bishwekerezi.​—Osome Yowane 15:20; 16:33.

16. Amango rhuli rhwalibuzibwa, bulongozi buhi rhushinganine rhurhumikire?

¹⁶ Amango omukolo gwirhu guhanzibwe goshi-goshi erhi bigabi bilebe byago, rhwanahabwa obulongozi kurhenga oku biro by’etawi na kugerera abagula. Obo bulongozi buba bwa kurhulanga, bwa kurhurhabala lyo rhugendekera rhwapata ebiryo by’ekiroho, n’okurhurhabala rhugendekere rhwajira omukolo gw’amahubiri nk’oku byakanahashikana. Ojire okwawe koshi ly’orhumikira obo bulongozi ciru akaba orhahugûsirwi bwinja bulya gurhi rhubuhabirwe. (Yk. 3:17) Kandi, erhi abantu barhashinganini okumanya emyanzi eyerekire bene wirhu na bali birhu erhi eyerekire ecigamba bakakuyenja, orhahiraga okabafululira eyo myanzi.​—Muh. 3:7.

17. Ak’entumwa omu myaka igana mirhanzi, bici rhuhizire okujira?

¹⁷ Ecirhumire ciguma cirhuma Shetani alwisa abantu ba Nnâmahanga kuli kubona “barhaleka obuhamirizi [kuli] Yezu.” (Maf. 12:17) Orhalekaga Shetani n’igulu lyage bakuyobohye. Okuhubiri n’okuyigiriza ciru akaba rhuli rhwahagalikwa kunarhulerhere omwishingo n’omurhûla. Omu myaka igana mirhanzi erhi abarhegesi Bayahudi babwira entumwa oku zileke okuhubiri, abo Bakristu bishwekerezi bacishoga okurhumikira Nnâmahanga. Bagendekera okujira omukolo gw’amahubiri, n’ogo mukolo gwabalerhera omwishingo. (Ebj. 5:27-29, 41, 42) Kobinali, amango bigabi bilebe by’omukolo gwirhu bihanzibwe, rhugwasirwe rhube masu lyo rhuhubiri. (Mt. 10:16) Cikone erhi rhwakajira okwirhu koshi lyo rhuhubiri, rhwanaba n’omurhûla gurhenga omu kushagalusa Yehova n’omu kuganirira abandi omwanzi guyokola obuzine.

“NNÂMAHANGA ORHUHA OMURHÛLA ABÊRA HAGUMA NA NINYU”

18. Ndi wakarhuha omurhûla gw’okunali?

¹⁸ Oyemere n’obwalagale oku ciru n’omu kasanzi kazibu bwenene, rhwanaba n’omurhûla. Omu kasanzi kantyo, rhugwasirwe rhukengere oku omurhûla rhulagirireko guli murhûla gwa Nnâmahanga, k’okuderha, omurhûla Yehova yene akahâna. Omulangalire amango hali endwala y’okuyahukira, obuhanya bucilerha bone, erhi amango rhuli rhwalibuzibwa. Obe mwishwekerezi okw’ikubuliro lyage. Okarhanya oku kasanzi kinja bwenene kayisha. Erhi wakajira ntyo, ‘Nnâmahanga orhuha omurhûla abêra haguma na nawe.’ (Fl. 4:9) Omu cigabi cikulikire, rhwaganirira gurhi rhwakarhabalamwo abirhu Bakristu bali balwisa amazibu lyo baba n’omurhûla gwa Nyamuzinda.