Orhabale Abandi lyo Balembera omu Mango g’Amazibu

1. Kanji-kanji gurhi Yehova ashuzamwo amasala g’abakozi bage bishwekerezi?

K’OMANYIRE oku Yehova anakukolesa ly’ashuza isala ly’obushiru lya muntu mulebe? Anakukolesa ciru akaba oli mugula, murhabazi w’abagula, painiya, erhi muhubiri omu cigamba. Anakukolesa ciru akaba oli musole erhi mushosi erhi ciru akaba oli mwene wirhu erhi mwali wirhu. Amango muntu mulebe ozigira Yehova ali amuhûna oburhabale, kanji-kanji Nnâmahanga wirhu anakolese abagula erhi abandi bakozi bage bishwekerezi lyo baba “burhulirize” kuli oyo muntu. (Kl. 4:11) Luli lukengwa lunene okukolera Yehova na bene wirhu na bali birhu mw’eyo njira! Rhwanahasha okujira ntyo amango hali endwala y’okuyahukira, obuhanya bucilerha bone, erhi amango rhuli rhwalibuzibwa.

ORHABALE ABANDI OMU MANGO G’ENDWALA Y’OKUYAHUKIRA

2. Bulya gurhi nkaba kwanaba kuzibu okurhabala abandi omu mango g’obulwalwa bw’okuyahukira?

² Ecahira erhi ndwala y’okuyahukira yanarhuma kwaba kuzibu kuli rhwe okurhabalana rhwene na nnene. Kwa lwiganyo, rhwanalonza okulambagirira abîra birhu, cikone nkaba okujira ntyo kwanaba kuhira obuzine bwirhu omu mazibu. Rhwanalonza okulalika bantu balebe bagwerhe amazibu g’okupata ensaranga lyo rhushangira ebiryo haguma, cikone nkaba oko nako kwanaba kurhahashikini. Rhwanalonza okurhabala abandi, cikone oko kwanaba kuzibu erhi akaba abantu b’omulala gwirhu bali balibuka. Ciru akaba ntyo, rhulonzize okurhabala bene wirhu na bali birhu, na Yehova anashagaluke erhi rhujira oku rhwakanahasha lyo rhubarhabala. (Mig. 3:27; 19:17) Bici rhwakajira?

3. Bici olwiganyo lw’abagula b’omu cigamba ca Desi lurhuyigirizize? (Yeremiya 23:4)

³ Ebi abagula bakajira. Akaba oli mugula, ocihangane omanye ebibuzi bwinja. (Osome Yeremiya 23:4.) Desi, mwali wirhu rhwaganiriraga omu cigabi c’embere adesire ntya: “Ensiku zoshi, abagula b’omu cikundi cirhu c’amahubiri bakag’icilunga haguma na nani na haguma n’abandi omu mukolo gw’amahubiri n’omu mango g’okucishagalusa haguma.”b Ebyo abagula bakag’ijira byoshi byarhumire kwaba kulembu kuli bo okurhabala Desi enyuma z’okurhondera kw’endwala y’e COVID-19 n’erhi afîrwa na bantu baguma na baguma b’omu mulala gwage enyanya z’eyo ndwala.

4. Bulya gurhi abagula bahashire okurhabala Desi, n’isomo lihi oko kuyigirizize abagula?

⁴ Desi adesire ntya: “Bulya naliyosire manyire oku abagula baba bîra bani, kwali kulembu kuli nie okubabwira gurhi nakag’iciyumva n’ebyakag’impangayisa.” Isomo lihi oko kwakayigiriza abagula? Mukashibirira abali idako ly’obulanzi bwinyu embere amazibu garhibuke. Obe mwîra wabo. Erhi akaba hali endwala y’okuyahukira erhumire orhakabalambagirira ly’obaganiza busu oku busu, okabaganiza kugerera ezindi njira. Desi adesire ntya: “Hali amango abagula banji bali lubero bakag’impamagala erhi kuntumira emesaje omu lusiku lo n’olo. Amandiko bakag’insomera gakag’impuma oku murhima ciru akaba nal’imanyire ago mandiko bwinja.”

5. Gurhi abagula bakamanyamwo ebi bene wirhu na bali birhu balagirireko, n’okuba burhabale kuli bo?

⁵ Enjira nguma yakakurhabala ly’omanya ebi bene winyu na bali binyu balagirireko kuli kubadosa amadoso garhakababonesa nshonyi. (Mig. 20:5) Ka bagwerhe ebiryo, obufumu, n’ebindi bintu by’obulagirire? Ka bali omu kanga kakarhuma baheza akazi kabo erhi ciru enyumpa yabo? Ka balagirire oku burhabale bwirhu lyo bamanya gurhi bakapatamwo oburhabale bw’ecihugo nkaba ogo mupango guliho? Desi ahabirwe oburhabale n’ababo bemezi. Cikone obuzigire abagula bamuyeresire n’okumuha omurhima omu kukolesa Ebibliya byo byamurhabire bwenene. Adesire ntya: “Abagula bakag’isalira haguma na nani. Ciru akaba ntakengiri bwinja ebi bakag’iderha, nkengire gurhi nakag’iciyumva. Yali njira Yehova akag’imbwiramwo erhi, ‘Ndi haguma nawe.’”​—Iz. 41:10, 13.

6. Bici bantu banji b’omu cigamba bakajira lyo barhabala abandi? (Olole enfoto.)

⁶ Ebi abandi bakajira. Rhumanyire oku abagula bashinganine bashibirire bene wirhu na bali birhu omu cigamba. Cikone Yehova arhuhûnyire rhweshi rhukahânana omurhima n’okurhabalana. (Gl. 6:10) Ciru rhwakajira kantu kasungunu kone lyo rhurhabala muntu mulebe olwazire, oko kwanamuha omurhima bwenene. Omwana anarhumira mwene wirhu erhi mwali wirhu akarte erhi kumucapira kantu kalebe. Nkaba mwene wirhu erhi mwali wirhu ociri musole anagendera mwali wirhu hantu halebe erhi kuj’imugulira ebintu alagirireko. Abandi omu cigamba banaba n’obuhashe bw’okuyendera muntu mulebe olwazire ebiryo n’okumuhekera byo. Kobinali, erhi endwala yakaba elumîre hoshi, ngasi muntu omu cigamba anaba alagirire oku kuhabwa omurhima. Nkaba rhwanabêra kasanzi kasungunu enyuma z’entimanano lyo rhuganira na bene wirhu na bali birhu, abe busu oku busu erhi kugerera e vidéoconférence. N’abagula nabo baba balagirire oku kuhabwa omurhima. Bahamirizi baguma na baguma bayandikire abagula amaruba g’okubavuga omunkwa enyanya z’okuba na binji bwenene bya kujira omu mango g’endwala y’okuyahukira. Kuba kwinja bwenene erhi rhwakajira ecirhu cigabi lyo ‘rhushibirizanya n’okuzibuhanya’!​—1 Ts. 5:11, Mashi Bible.

ORHABALE ABANDI OMU MANGO G’OBUHANYA BUCILERHA BONE

7. Mazibu gahi obuhanya bwakalerhera abantu?

⁷ Obuhanya bwanashanja akalamo k’omuntu buzira kulaliza. Abahikirwe n’obuhanya banaheza ebirugu byabo, enyumpa zabo, ciru n’abazigirwa babo. Bene wirhu na bali birhu nabo banahikirwa n’obuhanya. Bici rhwakajira lyo rhubarhabala?

8. Bici abagula n’ebirhwe by’emilala bakajira embere obuhanya bucilerha bone burhibuke?

⁸ Ebi abagula bakajira. Mwe bagula, murhabale bene winyu na bali binyu babe bacirheganyize embere obuhanya bucilerha bone buhike. Mujire okwinyu koshi ly’abantu boshi omu cigamba bamanya ebi bakajira lyo bacira na gurhi bakaganizamwo abagula. Margaret, rhwaganiriraga omu cigabi c’embere, adesire ntya: “Abagula birhu bajira ecigabi c’amalagirire g’ecigamba, barhurhonda oku akasanzi k’emiliro erhenga omu muzirhu karhacihwa. Baderha oku abarhegesi bakahiraho irhegeko lidesire oku rhuyake aha mwabirhwe erhi oku akanga kakaba kadarhi bwenene, rhugwasirwe rhugende buzira kulegama.” Bahabirwe obo burhonde omu kasanzi kashinganine bulya erhi hagera migobe irhanu, omuliro mudarhi bwenene gurhenga omu muzirhu gwayaka. Omu nterekêro y’omulala, ngasi irhwe ly’omulala anagalukira ebi ngasi muntu omu mulala akajira. Erhi we n’abana bawe mwakaba mucirheganyize, mwanahasha okurhulirira erhi obuhanya bucilerha bone bwakarhibuka.

9. Mukolo guhi abagula bakajira embere obuhanya bucilerha bone burhibuke n’enyuma z’aho?

⁹ Akaba oba oyimangire ecikundi c’amahubiri, orhalindaga obuhanya burhibuke ly’ohûna enimero z’etelefone n’eadresi z’abantu boshi b’omu cikundi cawe. Ojire eliste y’enimero n’eadresi zabo, n’erhi omuntu akashanja enimero erhi adresi yage, orhayibagiraga okushanja ebyo oku liste yawe. Erhi obuhanya bucilerha bone bwakarhibuka, wanahasha okuhamagala ngasi muhubiri ly’omanya ebi alagirireko. Ho n’aho, wanarhumira omuratibu w’embaraza y’abagula eyo myanzi, naye anaganira na mwangalizi w’omuzunguko. Erhi abo bene wirhu boshi bakakola haguma, banahâna oburhabale omu njira nyinja. Erhi omuliro guzima, mwangalizi w’omuzunguko Margaret alimwo ajijire nsa 36 arhahunga, bulya akag’ilongoza emikolo abagula bakag’ijira lyo bamanya aha bene wirhu na bali birhu hofi 450 bali n’okushibirira amalagirire gabo. (2 Kr. 11:27) Muli ntyo, ngasi mwene wirhu erhi mwali wirhu wal’ilagirire oku hantu h’okulama ahabwa ecihando.

10. Bulya gurhi abagula bashinganine babone omukolo gw’okulanga ebibuzi oku guli gwa bulagirire? (Yowane 21:15)

¹⁰ Abagula bajira omukolo gw’okuha bene wirhu na bali birhu omurhima kugerera Ebibliya n’okurhabala abagwerhe amahangayiko. (1 Pt. 5:2) Omu mango g’obuhanya, bashinganine barhang’imanya erhi ngasi mwene wirhu na mwali wirhu anacizire, anagwerhe ebiryo, emishangi, n’ecihando. Cikone omu myezi minji enyuma z’aho, bene wirhu na bali birhu bacizire banaba balagirire oku burhabale bw’ekiroho n’oku kuhabwa omurhima. (Osome Yowane 21:15.) Mwene wirhu Harold oba muguma w’omu Komite y’Etawi anarhimanine na bene wirhu na bali birhu banji bahikirwe n’obuhanya, adesire ntya: “Binahûne kasanzi kanji ly’abantu baciyumva bwinja. Banacib’irhondera okulama akalamo kabo nk’oku byali embere z’aho, cikone banagendekera bakengera abazigirwa babo bafîre enyanya z’obo buhanya, akantu kabo k’engulo ndarhi, erhi akanga kadarhi bageziremwo. Okukengera ebyo kwanabalerhera amababale kanji-kanji. Okuciyumva ntyo kurhali kubula obuyemere bulya kwanahikira ngasi muntu.”

11. Malagirire gahi abantu b’emilala bakagendekera baba nago?

¹¹ Abagula banakolese ihano ly’Ebibliya lidesire oku ‘rhulake haguma n’abali balaka.’ (Rm. 12:15) Abacizire obuhanya banaba balagirire oku kuyemezibwa n’obwalagale oku Yehova na bene wabo na bali babo bacigendekire babazigira. Abagula banarhabala abantu b’omu milala lyo bagendekera bakenga eprograme yabo y’ebintu by’ekiroho, ehiziremwo okusalira, okuyiga Ebibliya, okuja oku ntimanano, n’okujira omukolo gw’amahubiri. Kandi abagula banaha ababusi omurhima barhabale abana babo lyo basegeza obwenge oku bintu birhakasherezibwa n’obuhanya boshi-boshi. Mwe babusi, mukengeze abana binyu oku ensiku zoshi Yehova agendekera aba Mwîra wabo n’oku akabarhabala ngasi mango. Munabahugûlire oku ensiku zoshi bagendekera baba n’omulala gw’omw’igulu lyoshi gwa bene wirhu na bali birhu baba babidu okubarhabala.​—1 Pt. 2:17.

12. Bici abandi bakajira lyo barhabala oku mukolo gw’okuhâna oburhabale omu mango g’obuhanya? (Olole enfoto.)

¹² Ebi abandi bakajira. Erhi obuhanya bwakahikira abantu omu eneo eri hofi n’ah’olama, odose abagula gurhi wakarhabalamwo. Nkaba wanahandisa abayasire aha mwababwe erhi bavolontere bali bayubakira abantu enyumpa. Nkaba wanaba n’obuhashe bw’okulerhera abahubiri ebiryo n’ebindi bintu balagirireko. Erhi obuhanya bwakahikira abantu omu eneo eri kuli n’aha olama, kandi wanahâna oburhabale. Omu njira nci? Omu kusalira enyanya z’abahikirwe n’obuhanya. (2 Kr. 1:8-11) Wanalunga okuboko omukolo gw’okuhâna oburhabale omu kuhâna ensaranga ly’orhabala okugendekeza omukolo gw’omw’igulu lyoshi. (2 Kr. 8:2-5) Erhi akaba ogwerhe obuhashe bw’okubalamira omu eneo yahikirwe n’obuhanya ly’oj’ihâna oburhabale, odose abagula oku wajira ly’oba volontere. Erhi wakayemererwa okuba volontere, nkaba banakukomereza ly’okolesibwa ahantu n’akasanzi bakulagirireko bwenene.

ORHABALE BENE WIRHU NA BALI BIRHU LYO BALEMBERA OKULIBUZIBWA

13. Mazibu gahi bene wirhu na bali birhu bali balwisa omu bihugo omukolo gwirhu guhanzibwemwo?

¹³ Omu bihugo omukolo gwirhu guhanzibwemwo, okulibuzibwa kunarhume akalamo kaba kazibu bwenene. Ahanyuma n’oko kulibuzibwa, bene wirhu na bali birhu bagwerhe n’amazibu g’okupata ensaranga, banalwale, bananafîrwe n’abazigirwa babo. Cikone bulya omukolo gwirhu guhanzibwe, abagula banayabirwa okurhenga aha mwababwe erhi okuj’iganiza bene wirhu na bali birhu balagirire oku kuhabwa omurhima. Oko kwahikire mwene wirhu Andrei, rhwaganiriraga omu cigabi c’embere. Mwali wirhu muguma w’omu cikundi cage c’amahubiri agwerhe amazibu g’okupata ensaranga. Buzinda omutuga alimwo gwajira e aksida. Aberwa kanji-kanji arhakanacihashire okuja oku kazi. Ciru akaba emikolo yirhu yal’ihanzibwe omu cihugo cabo hanali eyi ndwala y’okuyahukira, bene wirhu na bali birhu bajira okwabo koshi lyo bamurhabala, na Yehova akag’ibona byoshi.

14. Gurhi abagula bakaba lwiganyo lwinja lugenda okulangalira Yehova?

¹⁴ Ebi abagula bakajira. Andrei akasalira n’okujira ebi akanahashire. Gurhi Yehova ashuzizemwo amasala gage? Yehova akolesa abandi bene wirhu na bali birhu bal’igwerhe obuhashe bw’okujira binji lyo barhabala oyo mwali wirhu. Baguma mulibo bakamuhêka omu mituga yabo ly’aja emwa munganga. Abandi bakamuha oburhabale bw’ensaranga. Yehova abashumya lyo bajira ebi bakanahashire, anagisha obushiru boshi bakag’ijira lyo barhabala oyo mwali wirhu. (Hb. 13:16) Mwe bagula, amango bigabi bilebe by’omukolo gwirhu bihanzibwe, mukabwira abandi bahâne oburhabale. (Yer. 36:5, 6) Na kulusha byoshi, mukalangalira Yehova. Anamurhabala lyo muhikiriza amalagirire ga bene wirhu na bali birhu.

15. Gurhi rhwakagendekezamwo ecinyabuguma cirhu c’Ecikristu omu mango rhuli rhwalibuzibwa?

¹⁵ Ebi abandi bakajira. Amango omukolo gwirhu guhanzibwe, byanahûna rhukarhimana na bene wirhu na bali birhu omu bikundi bisungunu-ngunu. Co cirhumire kulusha agandi mango goshi, kuli kwa bulagirire rhube n’omurhûla egarhi kirhu. Rhukalwisa Shetani ahali h’okulwisanya rhwene na nnene. Orhakag’isegeza obwenge oku magosa ga bene wirhu na bali birhu, kandi okajira okwawe koshi ly’oyusa okurhayumvikana haguma n’abandi buzira kulegama. (Mig. 19:11; Ef. 4:26) Okaba mubidu okurhabala abandi. (Tt. 3:14) Oburhabale abandi bahaga oyo mwali wirhu wali omu bulagirire bwalerhire ecikundi cabo c’amahubiri obunguke. Baba bîra, nka bantu ba mulala muguma.​—Enna. 133:1.

16. Nk’oku olwandiko lw’Abakolosi 4:3, 18 luyerekine, gurhi rhwakarhabalamwo bene wirhu na bali birhu bali balibuzibwa?

¹⁶ Ebihumbi bya bene wirhu na bali birhu bali bakolera Yehova ciru akaba oburhegesi bw’ecihugo cabo buhanzize bigabi bilebe by’omukolo gwirhu. Baguma mulibo bali omu prizo erhi buyemere bwabo burhuma. Rhwanasalira enyanya zabo, enyanya z’emilala yabo, n’enyanya za bene wirhu na bali birhu bali bayerekana oburhwali lyo babaha oburhabale bw’omubiri, bw’ekiroho, n’okubahalira oku kagombe ciru akaba oko kwanarhuma nabo bashwekwa.c (Osome Abakolosi 4:3, 18.) Orhayibagiraga ciru n’ehitya oku amasala gawe ganabarhabala bwenene!​—2 Ts. 3:1, 2; 1 Tm. 2:1, 2.

17. Gurhi mwakacirheganyamwo buno lugenda okulibuzibwa?

¹⁷ We n’omulala gwawe mwanacirheganya buno lugenda okulibuzibwa. (Ebj. 14:22) Orhakag’ibona omu bwenge bwawe ebintu bibi byoshi byakamuhikira. Ahali h’okujira ntya, ozibuhye obwîra bwawe haguma na Yehova onarhabale abana bawe nabo bajire ntyo. Erhi mango malebe wakaciyumva ohangayisire, obwîre Nnâmahanga ebiri omu murhima gwawe byoshi. (Enna. 62:7, 8) Omu mulala, mukaganirira ebyakarhuma mwalangalira Yehova byoshi.d Nkʼoku binaba okubiyerekire obuhanya bucilerha bone, okucirheganya kwawe n’okulangalira Yehova kwanarhuma abana bawe baba n’oburhwali n’omurhûla.

18. Kalamo kahi rhwaba nako omu mango gayisha?

¹⁸ Omurhûla gwa Nyamuzinda gunarhume rhwaciyumva rhuli omu bulanzi. (Fl. 4:6, 7) Kugerera ogo murhûla, Yehova anarhulirize omurhima gwirhu ciru rhwakahikirwa n’endwala z’okuyahukira, amahanya gacilerha gone, n’okulibuzibwa. Anakolese abagula bakola bwenene lyo barhulanga. Kandi arhuhire rhweshi olukengwa lw’okurhabalana rhwene na nnene. Omurhûla rhugwerhe ene gwarhurhabala rhucirheganye okulwisa amazibu garhuhikira omu mango gayisha, ciru n’“amalibuko [madarhi].” (Mt. 24:21) Muli ago mango, byayish’ihûna rhujire okwirhu koshi lyo rhurhag’iheza omurhûla gwirhu n’okurhabala abandi nabo bajire ntyo. Enyuma z’ago malibuko madarhi, rhurhakacihikirwa n’amazibu garhulerhera amahangayiko. Rhwayish’ihikira aha rhwashagalukira akalamo Yehova al’ilonzize rhube nako, k’okuderha kalamo ka murhûla gw’okunali na gw’ensiku n’amango.​—Iz. 26:3, 4.