‘Ohamagale Abagula’

1. Gurhi Yehova ayerekinemwo oku ebibuzi byage biba bya ngulo ndarhi?

EBIBUZI bya Yehova biba bya ngulo ndarhi bwenene kuli ye. Ahânyire Omugala muzigirwa enyanya zabyo anahiraho abagula lyo bakabishibirira. (Ebj. 20:28) Kugerera obulongozi bwa Kristu, abagula banarhulirize n’okulanga ebyo bibuzi oku mazibu g’ekiroho gakabihikira. Kobinali Mungu alonzize ebibuzi byage bijirirwe omu njira y’olukogo.​—Iz. 32:1, 2.

2. Bandi Yehova ashibirira bwenene? (Ezekiyeli 34:15, 16)

² Yehova anashibirire bwenene abakozi bage boshi, n’omu njira yago-yago aba mubidu okubarhabala amango bali balibuka. Ciru akaba ntyo, aba alonzize rhuhûne oburhabale amango rhubulagirireko. Bantu baguma na baguma banaba bali balibuka enyanya z’okuba bajijire amagosa, na Yehova anakolese abagula lyo babarhabala. (Osome Ezekiyeli 34:15, 16.) Yehova arhaba alonzize kone rhumushenge ly’arhurhabala, cikone kandi rhuhûne ‘balungere erhi bigiriza’ b’omu cigamba oburhabale amango rhubulagirireko.​—Ef. 4:11, 12.

3. Gurhi rhweshi rhwakayungukamwo omu kuyiga lugenda omukolo gw’abagula?

³ Mw’eci cigabi, rhwayiga omupango Mungu ahizireho lyo rhukapata oburhabale bw’ekiroho kugerera abagula. Rhwashuza kw’aga madoso: Mangaci rhushinganine rhuhûne abagula oburhabale? Bulya gurhi rhushinganine rhujire ntyo? Na gurhi bakarhurhabalamwo? Byanahashikana oku obwîra bwirhu haguma na Yehova bucisezire mwa gano mango, rhurhanalagiriri oku burhabale bw’abagula. Cikone, eci cigabi carhurhabala rhube ba kuvuga omunkwa oku njira Yehova ali akolesamwo abagula na kandi carhurhabala okumanya bici rhwakajira amango rhulagirire oku burhabale bwabo.

MANGACI RHUSHINGANINE ‘RHUHAMAGALE ABAGULA’?

4. Bulya gurhi rhwanaderha oku olwandiko lwa Yakobo 5:14-16, 19, 20, Mashi Bible, luganirire endwala y’ekiroho? (Olole n’enfoto.)

⁴ Lugenda omupango gwa Mungu gw’okuhâna oburhabale bw’ekiroho, entumwa Yakobo erhondire ogo mwanzi omu kudosa ntya: “Ka hali owalwala muli mwe? Ahamagale abagula b’omurhwe gw’Abakristu [b’ecigamba].” (Osome Yakobo 5:14-16, 19, 20, Mashi Bible.) Emilongo eshokolire n’ekulikire ogo mulongo eyerekine oku Yakobo akag’iganirira endwala y’ekiroho. Kwa lwiganyo, Yakobo abwizire omuntu olwazire ahamagale abagula b’ecigamba lyo bamurhabala, ci arhali doktere. Kandi, Yakobo ahugwîre oku omuntu olwazire anafume erhi ebyaha byage biba byamababalirwa. Ly’omuntu olwazire omu njira y’omubiri aciyumva bwinja ashinganine agend’ibona doktere, amuhugûlire endwala yage n’enyuma z’aho arhumikire obulongozi bw’oyo doktere. Ko n’oko, erhi akaba rhulonzize rhushub’iba n’obwîra bwa hofi-hofi haguma na Yehova, rhushinganine rhuganize abagula, rhubahugûlire amazibu girhu, n’enyuma z’aho rhukulikire amahano barhuha garhenzire omu Bibliya.

5. Gurhi rhwakamanyamwo oku obwîra bwirhu haguma na Yehova bukola buzambanyize?

⁵ Ebibliya erhurhonzire oku rhwanarhanya oku rhucigwerhe obwîra bwa hofi-hofi haguma na Yehova n’obu rhurhacibugwerhi. (Yk. 1:22) Ko byali ntyo oku Bakristu baguma na baguma b’omu Sardi, cikone Yezu ababwira oku barhacikag’ishagalusa Yehova. (Maf. 3:1, 2) Omu citabu ca Yakobo cigabi ca 5, Yakobo arhuhîre omurhima rhuganize abagula amango goshi rhwakaciyumva oku rhukola rhuli rhwaheza obwîra bwirhu bwa hofi-hofi haguma na Yehova. Cikone, kuli kwa bulagirire bwenene okuyemera oburhabale embere rhujire ebintu byakashereza obwîra bwirhu haguma na Yehova! Gurhi rhwakamanyamwo erhi rhugwerhe obwîra bwinja haguma na Yehova? Njira nguma rhwakajiramwo ntyo kuli kushushanya oku rhwakag’iciyumva lugenda Yehova erhi rhubatizibwa n’oku rhuli rhwaciyumva ene lugenda ye. (Maf. 2:4, 5) Rhwanacidosa ntya: ‘Ka nancishagalukire obusomi bwani bw’Ebibliya n’okurhanya bwenene lugenda ebi nasomire nk’oku nakag’ijira embere? Ka nancirheganye entimanano bwinja n’okuzijako zoshi nk’oku nakag’ijira embere? K’obushiru bwani omu mukolo gw’amahubiri bwanyihire? K’ebintu by’okucishagalusa erhi ebintu by’omubiri biri byampêka kasanzi kanji nandi nabirhanyako bwenene?’ Erhi wakashuza neci okw’idoso liguma mw’ago madoso, oko kwanayerekana oku obwîra bwawe haguma na Yehova burhaseziri nk’oku bwal’ishinganine buyorhe. Byananaba bibi bwenene erhi akaba rhurhajijiri kantu koshi-koshi lyo rhujira empindûlo. Erhi akaba rhurhagwerhi buhashe bw’okukubûla obuzamba bwirhu rhwenene erhi obo buzamba bube bwarhulongwire okuvuna amakanuni ga Mungu, rhushinganine rhuhûne abagula oburhabale.

6. Bici omuntu wajijire ecaha cizibu agwasirwe ajire?

⁶ Kobinali, omuntu wajijire ecaha cizibu cakarhuma arhenzibwa omu cigamba agwasirwe aganize omugula. (1 Kr. 5:11-13) Ngasi yeshi wahirimire omu caha cizibu alagirire oku burhabale ly’ashub’iba n’obwîra haguma na Yehova. Lyo Yehova arhubabalira kugerera engombôlo, rhugwasirwe rhujire ‘emikolo y’okuyerekana oku rhugokwire ebyaha.’ (Ebj. 26:20, Mashi Bible) Eyo mikolo ehiziremwo okuyegerera abagula erhi akaba rhwajijire ecaha cizibu.

7. Bandi bantu bahi balagirire oku burhabale bw’abagula?

⁷ Arhali abajijire ebyaha bizibu bone abagula barhabala; cikone kandi banarhabale abazambanyize omu hali y’ekiroho. (Ebj. 20:35) Kwa lwiganyo, nkaba wanayoboha okubona oli wayabirwa okuhima enyifinjo mbi. Kwanaba kuzibu ciru bwenene kuli we okuhima enyifinjo mbi erhi akaba embere obe Mukristu wali mujà w’amafumu g’okucilalusa, wakag’ilola epornografi, erhi wal’igwerhe olugenzi lw’eby’enshonyi. Orhayobohaga okuhûna oburhabale. Wanaganiza omugula ociyumva oyegerire, n’okulangalira oku ayumvirhiza ebikubabazize, akuha amahano wakakolesa, n’okukuyemeza n’obwalagale oku wanashagalusa Yehova erhi wakahagalika enyifinjo mbi. (Muh. 4:12) Erhi akaba wavunisire omurhima bulya oli wayabirwa okuhima enyifinjo mbi, abagula banakukengeza oku nkaba oko kuyerekine oku onashibirire obwîra bwawe haguma na Yehova onali wayaka okucilangalira okurhalusire olugero.​—1 Kr. 10:12.

8. Ka kuli kwa bulagirire okuganiza abagula lugenda ngasi igosa rhujijire? Ohugûle.

⁸ Kurhali kwa bulagirire okubona abagula lugenda ngasi kantu karhubabazize okubiyerekire ehali yirhu y’ekiroho. Kwa lwiganyo, hali amango wakaderha kantu kalebe kagayisa mwene wirhu mulebe erhi mwali wirhu, erhi ciru kandi obêre burhe. Ahali h’okugend’iganiza omugula, nkaba wanakolesa ihano lya Yezu lugenda okujira omurhûla n’oyo mwene wirhu erhi mwali wirhu. (Mt. 5:23, 24) Wanajira obusagasi lugenda emyanzi eyerekire obutûdu, obulembedu, n’okucihasha ly’ohash’iyerekana ciru bwenene ago morhere minja omu gandi mango. Cikone, erhi akaba orhahashiri okuyusa ago mazibu wene, nkaba wanahûna mugula mulebe oburhabale. Omu maruba gage emw’Abafilipi, entumwa Paolo yahûnyire mwene wirhu muguma Ebibliya erhaganiriri izino lyage arhabale Evodiya na Sintiki okuyusa okurhayumvikana kwali egarhi kabo. Ko n’oko, nawe omugula w’omu cigamba cinyu anakurhabala omu njira eri nk’eyo.​—Fl. 4:2, 3.

BULYA GURHI RHUSHINGANINE RHUHAMAGALE ABAGULA?

9. Bulya gurhi rhurhashinganini rhuleke enshonyi zirhume rhurhahamagala abagula? (Emigani 28:13)

⁹ Rhurhashinganini rhuleke enshonyi zirhume rhurhahamagala abagula. Co cirhumire rhulagirire oku buyemere n’oburhwali lyo rhuhûna oburhabale amango rhwajijire ecaha cizibu, erhi amango rhuli rhwaciyumva oku rhuli rhwayabirwa okuhima buzamba bwirhu bulebe. Bulya gurhi? Bulya omu kukulikira omupango gwa Yehova rhwanayerekana oku rhumulangalire rhunalangalire obulongozi bwage bw’okugendekera arhurhabala rhube n’amagala minja g’ekiroho n’obuyemere busezire. Rhumanyire oku rhulagirire oku burhabale bwa Yehova lyo rhugendekera rhwajira ebishinganine. (Enna. 94:18) N’erhi akaba rhwajijire ecaha, Mungu anarhuyeresa olukogo erhi rhwakahungama n’okuleka ebyaha birhu.​—Osome Emigani 28:13.

10. Gurhi byakaba erhi rhwakalonza okufulika ebyaha birhu?

¹⁰ Ahali h’emigisho rhwakapata omu kuganiza abagula amango rhulagirire oku burhabale, rhwanajira akanga kirhu kabe kabi bwenene erhi rhwakalonza okufulika ebyaha birhu. Erhi Mwami Daudi alonza okufulika ebyaha byage, alibuka bwenene omu hali y’ekiroho, omu bukengere, arhanacibaga n’amagala minja. (Enna. 32:3-5) Kwa lwiganyo, erhi rhwakalwala erhi kuyagalika, oku rhugendekera rhwajira kasanzi kanji buzira kubukwa, ko rhunagendekera rhwayumva amalumwa bwenene. Ko n’oko, erhi akaba rhwajijire ecaha cizibu, oku rhugendekera rhwalinda embere rhuhûne oburhabale bw’abagula ko rhunagendekera rhwalibuka bwenene. Yehova ahugûsirwe oko, co cirhumire arhuhûnyire “rhuyumvanye” naye omu kuganiza abagula akolesa lyo barhurhabala rhushub’iba bîra bage.​—Iz. 1:5, 6, 18, Mashi Bible.

11. Gurhi okufulika ecaha cizibu kwakaba n’amalehe mabi oku bandi?

¹¹ Erhi rhwakafulika ebyaha bizibu, oko kwanaba n’amalehe mabi oku bandi. Rhwanarhuma iroho lya Yehova lirhakola oku cigamba coshi, rhwananarhuma bene wirhu na bali birhu barhaba n’omurhûla. (Ef. 4:30) Ko n’oko, erhi rhwakamanya oku muntu mulebe omu cigamba anajijire ecaha cizibu, rhushinganine rhumuyinginge aj’ibona abagula anababwire lugenda ecaha cage.a Okufulika ecaha cizibu c’owundi muntu kwanarhuma nirhu rhwatumuzibwa. (Lev. 5:1) Obuzigire bwirhu kuli Yehova bwanarhushumya rhubone abagula n’okubabwira okuli. Erhi rhwakajira ntyo, rhwanalanga bene wirhu na bali birhu omu cigamba, rhwananarhabala oyo muntu wajiraga ecaha ashub’iba n’obwîra bwinja haguma na Yehova.

GURHI ABAGULA BARHURHABALAMWO?

12. Gurhi abagula barhabalamwo abazamba omu hali y’ekiroho?

¹² Abagula baba bahûnyirwe bashibirire abazambanyize omu hali y’ekiroho. (1 Ts. 5:14) Erhi akaba wajijire kantu kalebe kankashereza obwîra bwawe haguma na Yehova, abagula banakudosa amadoso lyo bahugûkwa entanya zawe n’oku oli waciyumva. (Mig. 20:5) Wanabarhabala erhi wakabaganiza n’obwalagale ciru akaba wanabona nka kuli kuzibu okujira ntyo enyanya z’enkomedu z’emwinyu, obumuntu bwawe, erhi enshonyi enyanya z’amazibu oli wageramwo. Orhayobohaga enyanya z’okurhanya oku enderho zawe zabonekana nka ‘zidwirhe zahabuka.’ (Ayu. 6:3.) Ahali h’okulutwa duba-duba, abagula bacihangana okukuyumvirhiza bwinjinja lyo bamanya omwanzi goshi embere bakuhe amahano. (Mig. 18:13) Baba bahugûsirwe oku omukolo gw’okulanga ebibuzi gunahûne akasanzi. Co cirhumire baba bamanyire oku barhakayusa amazibu goshi omu kujira enganîro liguma lyone.

13. Gurhi abagula bakarhurhabalamwo kugerera amasala gabo n’amahano barhuha gayimangire oku Bibliya? (Olole n’enfoto.)

¹³ Amango wamahamagala abagula, bakurhabala ly’orhacitumuzagya ciru bwenene kulusha. Ahali h’okukutumuza, bashenga enyanya zawe. Wanasomerwa okubona oku amasala gabo ‘garhagaluka kwone [gajira buhashe bunji, NWT].’ Oburhabale bwabo buhiziremwo kandi ‘okukushîga amavurha okw’izino lya Nyakasane.’ (Yk. 5:14-16, Mashi Bible) Ago “mavurha” gashushanyize okuli kuba omu Kanwa ka Mungu. Kugerera obulenga bwabo bw’okukolesa Ebibliya, abagula banakurhuliriza n’okukuha omurhima lyo bakurhabala oshub’iba n’obwîra bwinja haguma na Yehova. (Iz. 57:18) Amahano gabo gayimangire oku Bibliya ganakuha emisi y’okugendekera wajira ebishinganine. Kugerera abagula, wanayumva izu lya Yehova liri lyakubwira ntya: ‘Eyi yo njira, oyishimbe.’​—Iz. 30:21.

14. Kushimbana n’Abagalasiya 6:1, NWT, gurhi abagula barhabalamwo omuntu wajijire “akantu kabi?” (Olole n’enfoto.)

¹⁴ Osome Abagalasiya 6:1, NWT. Omukristu wajijire “akantu kabi” anabe arhali alama kushimbana n’amakanuni mashinganyanya ga Mungu. Akantu kabi kanaba kurhôla omuhigo gurhali gwa bwenge erhi okujira ecaha cizibu. Obuzigire bunashumye abagula Bakristu bacihangane “okukubûla oyo muntu omu iroho ly’obwirhonzi.” Oluderho lw’Ecigiriki lwahindwirwe “kukubûla” lwakag’ikolesibwa omu kuganirira gurhi doktere olunga akavuha kal’ivunisire lyo kafuma bwinja. Nka kula doktere ogwerhe obulenga alunga akavuha kal’ivunisire omu kukolesa enjira yanyihya amalumwa nk’oku byakanahashikana, abagula banasegeze obwenge oku kubuka endwala yirhu y’ekiroho buzira kurhuyushulira amalumwa. Kandi, abagula bahûnyirwe ‘bacilange.’ Amango abagula bali barhabala muntu mulebe ly’akolesa amakanuni g’Ebibliya, ensiku zoshi banakengere oku nabo banajire amagosa. Ahali h’okuyerekana obukulu, okucibona bashinganyanya kulusha omuntu bali barhabala, erhi okumurhanyiza kubi, banacihangane okuyumviza omuntu obwonjo.​—1 Pt. 3:8.

15. Bici rhwakajira amango rhugwerhe amazibu?

¹⁵ Abagula bakomerezibwe okurhubîkira amahwe, okuhâna amahano gayimangire oku Bibliya ahali h’okuhâna amahano gayimangire oku ntanya zabo bonene, n’okugendekera barhurhabala lyo rhuhash’ilwisa amazibu girhu. Co cirhumire rhwanalangalira abagula. (Mig. 11:13; Gl. 6:2) Obumuntu bwabo n’ebi bacibwinire biba lubero, cikone rhwanaganiza omugula yeshi-yeshi n’okumubwira amazibu girhu. Kobinali, rhurhashinganini rhuje rhwahûna ngasi mugula ihano kuhika rhupate owarhubwira ebi rhulonzize okuyumva. Erhi rhwakajira ntyo, rhwanaba ak’abantu balonza ababayigiriza ‘ebi balonzize okuyumva’ ahali h’okubayigiriza “enyigirizo z’okuli” z’omu Kanwa ka Mungu. (2 Tm. 4:3, Mashi Bible) Erhi rhwakabwira omugula lugenda amazibu girhu, nkaba anarhudosa erhi rhwagabwizire abandi bagula na mahano gahi barhuhîre. N’okuba wa lugero kwanamushumya ahûne owundi mugula ihano.​—Mig. 13:10.

EBI NGASI MUGUMA WIRHU ASHINGANINE AJIRE

16. Bici ngasi muguma wirhu agwasirwe ajire?

¹⁶ Abagula banarhuhe amahano n’okurhurhabala amango rhugwerhe amazibu, cikone barharhurhôlera omuhigo. Ngasi muguma wirhu ashinganine ayereke Yehova kugerera enderho n’ebijiro omu kalamo kage ka ngasi lusiku, oku amuzigire analonzize okumushagalusa. Kugerera oburhabale bwage rhwanahasha okugendekera rhwabêra bishwekerezi kuli ye. (Rm. 14:12) Co cirhumire ahali h’okurhubwira ebi rhugwasirwe rhujire, abagula banarhurhabale okuhugûkwa entanya za Mungu ziri omu Kanwa kage. Omu kukulikira amahano gabo gayimangire oku Bibliya, rhwanakomereza “obwenge” bwirhu okurhôla emihigo minja.​—Hb. 5:14.

17. Bici rhushinganine rhuhige okujira?

¹⁷ Luli lukengwa lunene bwenene okuba bibuzi bya Yehova! Yehova arhumire Yezu, “lungere mwinja,” arhulyulire engombôlo lyo rhupata obuzine bw’ensiku n’amango. (Yn. 10:11) Na kugerera abagula omu cigamba, Yehova ahikirizize eci ciragane cage: “Nammuha balungere omurhima gwani gusîmire, abôla bamuyabula n’oburhimanya n’obumanye.” (Yer. 3:15) Amango rhuzambanyize erhi rhulwazire omu hali y’ekiroho, rhurhashinganini rhurhindire okuhamagala abagula lyo barhuha oburhabale. Lekagi rhuhige okugendekera rhwayunguka bwenene n’omupango Yehova ahizireho lyo haba abagula omu cigamba.