K’Omanyire?

Bulya gurhi Ebibliya yajîre yagalukira nderho ndebe?

HALI amango abandisi b’Ebibliya bajire bagalukira enderho za misemwa milebe luderho oku lundi. Rhuganirire bintu bisharhu nkaba byakaba byashumize abandisi b’Ebibliya bajire ntyo:

Amango yayandikagwamwo. Omu Israheli ya mîra, bantu banji barhal’igwerhe amakopi gabo bo nnene g’Irhegeko. Kanji-kanji bakag’iyumva obusomi bw’Irhegeko erhi ishanja lyoshi lyakarhimanine haguma omw’ihema ly’entimanano. (Lush. 31:10-12) Byanahashikana hali ebyakagʼibahêka obwenge amango bakag’iba bayimanzire haguma nsa nyinji bwenene omu hitû hinene hy’abantu banali bayumvirhiza. (Neh. 8:2, 3, 7) Omu mango ga ntyo, okugalukira emisemwa y’obulagirire kwakarhabire abantu bagendekere bakengera amandiko n’okugakolesa. Okugalukira nderho ndebe kwakarhabire bwenene ly’abantu bakengera amahugûlo g’amarhegeko Yehova al’ibahîre.—Lev. 18:4-22; Lush. 5:1.

Enjira y’okuyandika. Hofi bigabi 10 oku 100 by’Ebibliya ziba nyimbo, nk’ecitabu c’Ennanga, Olwimbo lw’Enyimbo, n’Endûlû. Nyimbo nguma na nguma zal’igwerhe enderho zigalukirwe kanji-kanji erhi refrain, oko kwakag’isegeza omwanzi mukulu gw’olwimbo n’okurhabala abumvirhiza babîke enderho z’olo lwimbo omu bukengere bwabo. Kwa lwiganyo, olole enderho ziri omu Ennanga 115:9-11: “Enyumpa y’Israheli yôhe Nyakasane [Yehova, NWT] ecîkubagira, ye Mufungizi wabo ye na mpênzi yabo, enyumpa ya Aroni yôhe Nyakasane ecîkubagira, ye Mufungizi wabo ye na mpenzi yabo. Abarhinya Nyakasane yene bahirakwo omurhima, ye mufungizi wabo ye na mpenzi yabo.” K’obwine gurhi okugalukira-galukira ezo nderho kwakarhabire okusegeza ezo nyigirizo z’engulo ndarhi omu bwenge n’omu mirhima y’abimbiza?

Byal’ihûnyire okusegeza ebintu by’obulagirire. Hali amango abandisi b’Ebibliya bajire bagalukira emisemwa y’obulagirire. Kwa lwiganyo, erhi Yehova arhegeka Abaisraheli barhalyaga omuko, ahûna Musa agalukire kanji-kanji ecirhumire. Nnâmahanga al’ilonzize okusegeza oku obuzine bw’omubiri buba omu muko, ko kuderha oku omuko guba gushushanyize obuzine. (Lev. 17:11, 14) Buzinda, erhi entumwa n’abagula b’omu Yeruzalemu bayerekana ebintu Abakristu bal’ishinganine bayake lyo basimisa Nnâmahanga, kandi basegize obulagirire bw’okucilanga n’omuko.—Ebj. 15:20, 29.

Yehova arhal’ilonzize okugalukira-galukira emisemwa y’Amandiko ebe nkomedu. Kwa lwiganyo, Yezu adesire ntya: “Nka mwasalira, murhakag’igalukira-galukira enderho zo n’ezo kanji-kanji.” (Mt. 6:7, NWT) Enyuma z’aho, arhuyeresa ebintu bishinganine bipatine n’obulonza bwa Nnâmahanga rhwakaderha omu masala girhu. (Mt. 6:9-13) Co cirhumire, ciru akaba rhunayake okugalukira-galukira enderho zo n’ezo kanji-kanji omu masala girhu, rhugwerhe oluhuma lw’okushenga kanji-kanji lugenda bintu bilebe by’obulagirire Yezu aganiriraga.—Mt. 7:7-11.

Hali ebirhumire binja birhumire Akanwa ka Nnâmahanga kajîre kagalukira nderho ndebe erhi misemwa milebe. Eyo eri nguma y’omu njira nyinji Omwigiriza wirhu Mukulu arhuyigirizizemwo oku bunguke bwirhu.—Iz. 48:17, 18.