Obatizibwe Buzira Kulinda

1. Birhumire bihi binja rhugwerhe by’okubatizibwa?

K’OBA ozigire Yehova Nnâmahanga wakuhâga ngasi ngalo nyinja, ciru n’obuzine? K’olonzize omuyerese oku omuzigire? Enjira nyinja bwenene wakajiramwo ntyo kuli kucihâna emwage, n’enyuma z’aho oyerekane ntyo omu kubatizibwa omu mishi. Okujira ntyo kunarhume waba muguma w’omu mulala gwa Yehova. Oko kwarhuma Yehova, Sho na Mwîra wawe, akakulongoza n’okukushibirira bulya waba wage. (Enna. 73:24; Iz. 43:1, 2) Okucihâna emwa Yehova n’okubatizibwa, kandi kwakuha obulangalire bw’okushagalukira obuzine bw’ensiku n’amango.​—1 Pt. 3:21.

2. Bici rhwaganirira mw’eci cigabi?

² Ka hali akantu kali karhuma warhindira okubatizibwa? Akaba ntyo, arhali we murhanzi. Hali emiliyoni y’abantu bal’igwasirwe bajire empindûlo omu lugenzi lwabo n’omu ntanya zabo lyo bahikiriza ebihûnyirwe lyo babatizibwa. Bunola bali bakolera Yehova n’omwishingo n’obushiru. Bici wakaciyigiriza kugerera olwiganyo lwa bantu balebe babatizibagwa omu kagana karhanzi? Leki rhuganirire amazibu balwisize n’okubona ebi rhwakaciyigiriza kugerera olwiganyo lwabo.

ABASAMARIYA BABATIZIBWA

3. Mpindûlo nguma na nguma zihi Abasamariya nkaba bal’igwasirwe bajire embere babatizibwe?

³ Abasamariya cali cigusho c’idîni omu mango ga Yezu. Basamariya banji bal’ilamire hofi n’e vile y’e Sikemu n’omu Samariya, olunda lw’emwenè lw’e Yudeya. Embere Abasamariya babatizibwe, bal’ishinganine bayemere Akanwa ka Mungu koshi n’okuyiga binji muli ko. Abasamariya bal’iyemire oku ebitabu birhanu birhangiriza by’Ebibliya byone byalongozibwe n’iroho litagatifu, ko kuderha, ecitabu c’Omurhondêro kuhika oku citabu c’Olushika, nkaba n’ecitabu ca Yozwe. Ciru akaba ntyo, bal’ilangalire okuyisha kwa Masiya, kushimbana n’eciragane ca Mungu ciri omu Olushika 18:18, 19. (Yn. 4:25) Lyo babatizibwa, bal’igwasirwe bayemere Yezu oku ye Masiya walaganyizibagwa. “Basamariya banji” bajijire ako kantu kone. (Yn. 4:39) Abandi nkaba bal’igwasirwe bahime akabôlo kal’igwisire emizi bwenene egarhi k’Abasamariya n’Abayahudi.​—Lk. 9:52-54.

4. Kushimbana n’Ebijiro by’Entumwa 8:5, 6, 14, gurhi Basamariya baguma na baguma bajijire erhi bayumva amahubiri ga Filipo?

⁴ Bici byarhabire Abasamariya lyo babatizibwa? Erhi Filipo mweneza-enjili ‘abayigiriza Kristu,’ Basamariya baguma na baguma ‘bayankirira Akanwa ka Nnâmahanga.’ (Osome Ebijiro by’Entumwa 8:5, 6, 14.) Ciru akaba Filipo ali Muyahudi, barhalahiraga okumuyumvirhiza. Nkaba bakengire amandiko g’omu Pentateuque gayerekine oku Mungu arhajira kabôlo. (Lush. 10:17-19) ‘Banunirwa n’enyigirizo zage’ lugenda Kristu, banayemera ebyayerekanaga n’obwalagale oku Mungu ye wamurhumaga. Kandi Filipo ajijire bisomerine binji bihiziremwo okufumya abalwaba n’okurhenzako abantu abazimu.​—Ebj. 8:7.

5. Masomo gahi wakaciyigiriza kugerera olwiganyo lw’Abasamariya?

⁵ Abo Basamariya bakalesire akabôlo erhi okubula obumanye kubahanze okujira amajambere. Cikone barhalekaga bibe ntyo. Abasamariya barharhindiraga okubatizibwa enyuma z’okuyemera oku Filipo akag’ibayigiriza okuli. Ebibliya edesire ntya: “Erhi baba bamayemera Filipo wakagibayigiriza Emyanzi y’Akalembe k’Obwami bwa Nnâmahanga n’izino lya Yezu Kristu, abalume n’abakazi babatizibwa.” (Ebj. 8:12) K’oyemire oku Akanwa ka Mungu ko okuli n’oku Abahamirizi ba Yehova banahime akabôlo n’okucihangana okuyeresanya obuzigire bw’okunali, cimanyiso ciyerekana Abakristu b’okuli? (Yn. 13:35) Akaba ntyo, orhayobohaga okubatizibwa. Wanayemera n’obwalagale oku Yehova akugisha.

6. Gurhi wakayunguka kugerera olwiganyo lwa Ruben?

⁶ Ruben, w’e Allemagne, akuliraga omu mulala gw’Abahamirizi ba Yehova. Cikone, erhi ali musole agwerhe akarhinda lugenda okubaho kwa Yehova. Gurhi ayusizemwo akarhinda kage? Ahugûkwa oku al’ibuzire obumanye na ntyo ahiga okujira kantu kalebe lugenda oko. Adesire ntya: “Omw’ifunzo lyani niene, nal’ishinganine ndwise akarhinda kani. Nal’igwasirwe nyige kanji-kanji omwanzi lugenda oku ebintu byajire byahinduka-hinduka byone.” Ruben asoma ecitabu Je, Kuna Muumba Anayekujali? Eco citabu camurhabala okuzibuhya obuyemere bwage muli Mungu. Akaderha ntya omu murhima gwage yene: ‘Kobinali! Yehova ali w’okunali.’ N’amango Ruben alambagiriraga ebiro bikulu, arhondera asima ciru bwenene ecinyabuguma ciba egarhi ka bene wirhu na bali birhu b’omw’igulu lyoshi. Erhi Ruben agaluka e Allemagne, abatizibwa erhi agwerhe myaka 17. Erhi akaba ogwerhe akarhinda lugenda ebi wayizire, okalwise omu kujira obusagasi omu bicapo birhu. Akarhinda kanahimwa kugerera “okumanya [obumanye bw’okuli, NWT].” (Ef. 4:13, 14) N’omu kasanzi waba oli wayumva emyanzi lugenda obuzigire n’ecinyabuguma egarhi k’abantu ba Yehova omu gandi maeneo g’igulu n’okucibonera byo wene omu cigamba cinyu, obuzigire bwawe oku cinyabuguma cirhu c’omw’igulu lyoshi bwayushûka.

SAULU W’E TARSO ABATIZIBWA

7. Ntanya zihi Saulu al’igwasirwe akubûle?

⁷ Orhanye oku lwiganyo lwa Saulu w’e Tarso. Akag’ijira amajambere minja omw’idîni ly’Eciyahudi, anal’imanyikine bwenene egarhi k’Abayahudi. (Gl. 1:13, 14; Fl. 3:5) Ago mango Bayahudi banji bakag’ibona Abakristu nka bali bagoma, muli ntyo Saulu akabalibuza anakunire. Akag’icirheba omu kurhanya oku ali ajira obulonza bwa Mungu. (Ebj. 8:3; 9:1, 2; 26:9-11) Lyo Saulu ayemera Yezu n’okubatizibwa nka Mukristu, al’igwasirwe naye yene ayemere okulibuzibwa.

8. (a) Bici byarhabire Saulu ly’abatizibwa? (b) Kushimbana n’Ebijiro by’Entumwa 22:12-16, gurhi Ananiya arhabiremwo Saulu? (Olole n’enfoto.)

⁸ Bici byarhabire Saulu ly’abatizibwa? Erhi Nyakasane Yezu, wali wamakuzibwa abonekera Saulu, Saulu ahurha. (Ebj. 9:3-9) Ayusize nsiku isharhu zoshi buzira kulya n’okunywa. Na buzira karhinda mw’ako kasanzi, arhanyize bwenene lugenda ebyamuhikiraga. Kobinali, Saulu ayemera oku Yezu ye wali Masiya n’oku abanafunzi bage bo bali omw’idîni ly’okuli. Saulu agwasirwe abe akag’iciyumva kubi bwenene okubona ashangire omu kuyirha Stefano! (Ebj. 22:20) Oku buzinda bw’ezo nsiku isharhu, mwanafunzi mulebe w’Ebibliya wakag’ihamagalwa Ananiya ayegera Saulu omu njira y’olukogo, afumya obuhurha bwage, anamuha omurhima abatizibwe buzira kulegama. (Osome Ebijiro by’Entumwa 22:12-16.) Saulu ayemera oburhabale omu njira y’obwirhohye anarhondera alama akalamo kahyahya.​—Ebj. 9:17, 18.

9. Masomo gahi wakaciyigiriza kugerera olwiganyo lwa Saulu?

⁹ Hali amasomo rhwakaciyigiriza kugerera olwiganyo lwa Saulu. Akalesire obucibone erhi okuyoboha abantu kurhume arhabatizibwa. Cikone arhalekaga oko kube. Omu njira y’obwirhohye Saulu ashanja akalamo kage erhi ayemera okuli lugenda Kristu. (Ebj. 26:14, 19) Saulu ayemire okuba Mukristu ciru akaba al’imanyire oku akalibuzibwe. (Ebj. 9:15, 16; 20:22, 23) Enyuma z’okubatizibwa kwage, agendekire ayegemera Yehova ly’amurhabala okulembera amarhangulo gali lubero. (2 Kr. 4:7-10) Okubatizibwa kwawe nka Muhamirizi wa Yehova, nkaba kwakulerherha amarhangulo g’obuyemere erhi amazibu, cikone waba n’oburhabale. Wanayemera n’obwalagale oku ensiku zoshi, Yehova na Kristu bakuha oburhabale olagirireko ly’ogendekera walembera n’okubêra mwishwekerezi.​—Fl. 4:13.

10. Gurhi rhwakayungukamwo kugerera olwiganyo lwa Anna?

¹⁰ Anna akuliraga omu mulala gw’Abakurdi omu Europe de l’Est. Enyuma z’okubatizibwa kwa nnina wa Anna, ishe wa Anna amuyemerera arhondere ayiga Ebibliya erhi agwerhe myaka 9. Cikone erhi abandi bantu b’omu mulala bal’ilamire aha mwabo Anna bamanya oku ali ayiga Ebibliya haguma n’Abahamirizi ba Yehova, barhondera bamuhagalika. Abo bantu b’omu mulala gwabo bakag’ibona nk’omuntu okuleka idîni lya bashakulûza, kwali kubonesa omulala nshonyi. Erhi Anna agwerhe myaka 12, ahûna ishe amuyemerere abatizibwe. Ishe alonza okumanya erhi gwali muhigo gwage yenene erhi hali muntu mulebe wakag’imuseza. Anna ashuza ntya: “Nzigire Yehova.” Ishe amuyemerera abatizibwe. Enyuma z’okubatizibwa kwage, abantu b’omu mulala gwabo bagendekera bamujirira kubi n’okumushekera. Muntu muguma w’omu mulala gwabo amubwira ntya: “Kwakabire kwinja ocilamage akalamo k’obubaraga erhi okukanywa irhabi ahali h’okuba Muhamirizi wa Yehova.” Gurhi Anna alwisizemwo ago mazibu? Adesire ntya: “Yehova antabire nzibuhe, na larha na nyâma bantabire bwenene.” Anna aba abisire eliste y’amango gago-gago Yehova amurhabire omu kalamo kage. Mango oku gandi anakasoma kw’eyo liste ly’arhag’iyibagira gurhi Yehova amurhabire. Erhi akaba oli wayoboha okuhagalikwa, okengere oku nawe Yehova akurhabala.​—Hb. 13:6.

KORNELIYO ABATIZIBWA

11. Bulya gurhi Korneliyo akarhindire okubatizibwa?

¹¹ Kandi Ebibliya ehânyire olwiganyo lwa Korneliyo. Ali “murhegesi w’engabo,” al’iyimangire basoda hofi 100 omu murhwe gw’Abaroma. (Ebj. 10:1) Enyanya z’oko, nkaba akag’ikengwa bwenene omu lubaga n’omu basoda. “Akagirhabala bwenene olubaga.” (Ebj. 10:2) Yehova amurhumira entumwa Petro ly’ej’imuganirira omwanzi mwinja. K’ecikono ca Korneliyo carhumire arhindira okubatizibwa?

12. Bici byarhabire Korneliyo ly’abatizibwa?

¹² Bici byarhabire Korneliyo ly’abatizibwa? Ebibliya edesire oku ‘arhinyaga Nnâmahanga, ye n’abaha mwage.’ Na ngasi mango, Korneliyo akag’isemberera Nnâmahanga omw’isala. (Ebj. 10:2) Erhi Petro aganirira Korneliyo omwanzi mwinja, ye n’omulala gwage bayemera Kristu banabatizibwa buzira kulegama. (Ebj. 10:47, 48) Buzira karhinda, Korneliyo agwerhe obulonza bwinja bw’okujira ngasi mpindûlo zal’ihûnyirwe lyo ye n’omulala gwage baharamya Yehova.​—Yoz. 24:15; Ebj. 10:24, 33.

13. Masomo gahi rhwakaciyigiriza kugerera olwiganyo lwa Korneliyo?

¹³ Aka Saulu, Korneliyo akalesire ecikono agwerhe cirhume arhaba Mukristu. Cikone arhalekaga bibe ntyo. Enyanya z’okuyemera okuli, ka bikuhûnyire ojire mpindûlo nyinji bwenene omu kalamo kawe ly’obatizibwa? Akaba ntyo, Yehova aba Murhabazi wawe. Agisha omuhigo gwawe gw’okumukolera omu kulama kushimbana n’amakanuni g’Ebibliya.

14. Gurhi wakayungukamwo kugerera olwiganyo lwa Tsuyoshi?

¹⁴ Tsuyoshi, w’e Japon, al’igwasirwe ajire empindûlo omu kazi kage ly’ahikiriza ebihûnyirwe ly’abatizibwa. Ali murhabazi w’omukulu w’amasomo g’e Ikenebo, gayigiriza okushibirira amauwa. Erhi omukulu w’amasoma akayabirwe okuhika oku ciriyo, kanji-kanji Tsuyoshi ye wakag’igenda ahali hage n’okujira enkomedu z’Ababuda zijirwa oku ciriyo zigwerhe olushangi n’idîni ly’obunywesi. Cikone, erhi Tsuyoshi ayiga okuli lugenda abafîre, amanya oku arhakabatizibwe erhi akagendekire acilunga mw’ezo nkomedu. Muli ntyo, ahiga yene okurhacigendekera acilunga omu nkomedu z’Ababuda. (2 Kr. 6:15, 16) Tsuyoshi aganiza omukulu w’amasomo lugenda oko. Malehe gahi oko kwadwirhe? Tsuyoshi aba n’obulyo bw’okugendekeza akazi kage, buzira kukacilunga mw’ezo nkomedu. Enyuma za mwaka muguma arhondire ayiga Ebibliya, abatizibwa.a Erhi akaba olagirire oku kujira empindûlo omu kazi kawe ly’oshagalusa Mungu, oyemere n’obwalagale oku akuha we n’omulala gwawe ebi mulagirireko.​—Enna. 127:2; Mt. 6:33.

ABAKORINTI BABATIZIBWA

15. Bici byakarhumire Abakorinti barhabatizibwa?

¹⁵ Abantu b’omu Korinti ya mîra, bakag’ilonza bwenene eby’en’igulu banagwerhe olugenzi lubi lw’eby’enshonyi. Bantu banji bal’ilamire mw’eyo vile bakag’ijira ebintu Nnâmahanga aba ahanzize. Bibonekine n’obwalagale oku akalamo ka ntyo kakadwirhire ngasi yeshi wakayemire omwanzi mwinja amazibu. Ciru akaba ntyo, erhi entumwa Paolo ehika mw’eyo vile, enahubiri omwanzi mwinja lugenda Kristu, “Abakorinti banji bakagiyumva enyigirizo . . . bayemera banabatizibwa.” (Ebj. 18:7-11) Enyuma z’aho, Nyakasane Yezu Kristu abonekera Paolo omu cibonekerezi anaderha ntya: “Abantu bâni bali banji muli eci cishagala [lugo].” Muli ntyo, Paolo ajira mwaka muguma n’enusu ali ahubiri mw’eyo eneo.

16. Bici byarhabire bantu baguma na baguma b’e Korinti okuhima ebyakabahanzize okubatizibwa? (2 Abakorinti 10:4, 5)

¹⁶ Bici byarhabire Abakorinti lyo babatizibwa? (Osome 2 Abakorinti 10:4, 5.) Akanwa ka Mungu n’iroho litagatifu lijira obuhashe, byarhabire Abakorinti okujira empindûlo z’obulagirire bwenene omu kalamo kabo. (Hb. 4:12) Abantu b’e Korinti bayemeraga omwanzi mwinja lugenda Kristu, baba n’obuhashe bw’okuleka enkomedu n’ebijiro bibi, kwa lwiganyo obulalwe, obushambo, n’oburhazi.​—1 Kr. 6:9-11.b

17. Bici olwiganyo lw’Abakorinti lwakakuyigiriza?

¹⁷ Obwine oku ciru akaba bantu baguma na baguma b’e Korinti bal’igwasirwe bahime enkomedu zali zagwisire emizi bwenene muli bo, barharhanyagya oku kwakabire kuzibu bwenene kuli bo okuba Bakristu. Bajijire okwabo koshi lyo baja omw’ibarabara lifundire lihêka ebwa buzine bw’ensiku n’amango. (Mt. 7:13, 14) K’oli walwisa enkomedu mbi erhi cijiro cilebe cibi ly’obatizibwa? Orhalekaga okucihangana okujira empindûlo! Osemberere Yehova akuhe iroho lyage litagatifu lyo likurhabala ohagalike irala ly’okujira ebintu bibî.

18. Gurhi wakayungukamwo kugerera olwiganyo lwa Monika?

¹⁸ Monika, w’omu cihugo c’e Georgie, ajijire bushiru bunji ly’aleka enderho zirhacîri n’okucishagalusa n’ebintu bigalugalu ly’ahikira okubatizibwa. Adesire ntya: “Omu myaka yani y’omushûko, isala yo yali misi yani. Yehova al’imanyire oku nal’ilonzize okujira ebintu binja, n’ensiku zoshi akag’intabala n’okunongoza.” Monika abatizibwe erhi agwerhe myaka 16. Ka hali enkomedu oshinganine oleke ly’okolera Yehova omu njira ayemire? Ogendekere wamuhûna emisi minji ly’ojira eyo mpindûlo. Yehova anahâne iroho litagatifu burhagera.​—Yn. 3:34.

OBUYEMERE BWAWE BWANAHAMISA ENTONDO

19. Bici byakakurhabala okuhima amazibu gali nka ntondo? (Olole n’enfoto.)

¹⁹ Oyemere n’obwalagale oku Yehova akuzigire analonzize obe muguma w’omu mulala gwage. Byanaba ntyo ciru wakaba oli walwisa mazibu gahi ly’obatizibwa. Yezu abwizire cigusho ciguma c’abanafunzi bage omu kagana karhanzi ntya: “Nka mugwerhe obuyemere buli nka mogomogo ya sinapi, mwanabwira eyi ntondo, erhi: ‘Rheng’aha, oje hala’; enagende, na ntaco cankammuyabira.” (Mt. 17:20) Abantu bayumvagya ezo nderho bal’igwerhe myaka misungunu yone bali haguma na Yezu, co cirhumire obuyemere bwabo bwacir’ilagirire oku kuyushûka. Cikone Yezu abayemeza n’obwalagale oku erhi bakabire n’obuyemere busezire, Yehova akabarhabire lyo bahima amazibu gali nka ntondo. Nawe Yehova akurhabala okujira ntyo!

20. Gurhi enyiganyo z’Abakristu b’omu kagana karhanzi n’ez’Abakristu ba mw’agano mango zaganirirwe mw’eci cigabi zakushumize?

²⁰ Enyuma z’okumanya amazibu gali gakuhanza okubatizibwa, orhôle emipango y’okugahima buzira kulegama. Wapata oburhulirize n’emisi kugerera enyiganyo z’Abakristu b’omu kagana karhanzi n’aba mw’agano mango. Mashi enyiganyo zabo zikuhâge omurhima zinakushumye ly’ocihâna emwa Yehova n’okubatizibwa. Go muhigo mwinja bwenene kulusha yoshi wakarhôla omu kalamo!