Yezu “Àyiga Oburhumisi”

Yezu akag’irhumikira Yehova ensiku zoshi. (Yn. 8:29) Bulya gurhigi Ebibliya edesire ntya: “Àyiga oburhumisi omu malumwa àbwine”?​—Hb. 5:8.

Amango Yezu ali hano igulu, ahikirwe n’ebintu arhahikiragwa nabyo amango ali empingu. Alezirwe n’ababusi bal’izigire Yehova cikone barhali bimana. (Lk. 2:51) Alembire okujirirwa kubi n’ebirongozi bibi by’amadîni n’abakag’irhegeka ago mango. (Mt. 26:59; Mk. 15:15) Na kandi, afîre olufû lw’amalumwa manji. Ebibliya edesire ntya: “Acirhohize yéne, aba mumvi [arhumikira] kuhika okufâ.”​—Fl. 2:8.

Ebyo byahikiraga Yezu byamuyigirizize okurhumikira omu njira arhalisag’iyiga amango ali empingu. Muli ntyo, akabirage Mwami na Kuhani Mukulu mwinja bwenene, w’okuhugûkwa bwinja ehali yirhu. (Hb. 4:15; 5:9) Yezu aba wa bulagirire ciru bwenene kuli Yehova, anamukolesa ciru bwenene enyuma z’okuyiga okurhumikira kugerera amalibuko alemberaga. Nirhu rhwanaba ba bulagirire bwenene kuli Yehova, ananarhukolesa bwenene omu ngasi mukolo akarhuha erhi rhwakabêra ba kurhumikira amango rhwamahikirwa n’amazibu.​—Yk. 1:4.