Amadoso g’Abantu Basoma Ebicapo Birhu
Omwandisi w’Emigani 30:18, 19 adesire oku “okuburha kw’omulume n’omukazi [enjira y’omulume haguma n’omunyere, NWT]” ayumvirhe ‘kumurhalusire.’ Bici al’ilonzize okuderha?
Bantu banji banacidose bici eyo milongo ehugwîre, ciru n’abamanyire binji lugenda Ebibliya. Olo lwandiko loshi ludesire ntya omu Bibliya: “Hali bisharhu nyumva bintalusire, na bini ntishi: enjira ya lubaka emalunga, enjira y’enjoka oku mbyâ [ibuye, NWT], enjira y’obwarho omu karhî k’enyanja, okuburha kw’omulume n’omukazi [enjira y’omulume haguma n’omunyere, NWT].”—Mig. 30:18, 19.
Embere, rhwal’ihugûsirwe oku enderho “enjira y’omulume haguma n’omunyere” zihugwîre kantu kalebe kabi. Bulya gurhi? Eyindi milongo mw’eco cigabi eganirire ebintu bibi birhaderha ciru n’ehitya mpu “lekaga.” (Mig. 30:15, 16) N’omulongo gwa 20 omu Mashi Bible guganirire “omukazi mugonyi” oderha oku nta kantu kabi anajijire. Muli ntyo, rhwal’irhanyize oku nka kula lubaka abalala enyanya bwenene omu malunga, erhi nka kula enjoka egera okw’ibuye, erhi nka kula obwarho erhi amashuwa gagera kulî bwenene omu garhi k’enyanja buzira kusiga ecimanyiso, omulume anajira kantu kalebe buzira muntu yeshi-yeshi okumanya ebi anajijire. Co cirhumire, rhwakag’irhanya oku enderho “enjira y’omulume haguma n’omunyere” ziganirire kantu kalebe kabi, n’oku zal’iganirire omusole gurheba omunyere kuhika bajire ecijiro c’obuhya haguma.
Cikone, bibonekine oku hali ebirhumire by’okuyemera oku eyo milongo eganirire kantu kalebe kinja c’arhali akantu kabi. Oyo mwandisi akag’iganirira kone ebintu byamusomezize.
Amandishi ga mîra g’Eciyahudi nago gayerekine oku ogo mulongo guganirire kantu kalebe kinja. Kushimbana na diksiyonere nguma ehâna amahugûlo lugenda Amandiko g’Ecihabraniya, oluderho lw’Ecihabraniya lwahindwirwe “bintalusire” omu Emigani 30:18 “luyerekine kantu kalebe kali ka kusomeza, erhi kabonekana ciru nka karhankahashikana.”
Profesere Crawford Howell Toy w’oku Université y’e Harvard e États-Unis naye adesire oku ogo mulongo gw’Ebibliya gurhaganiriri kantu kalebe kabi. Adesire ntya: “Omwandisi al’ilonzize okuganirira gurhi ebyo bintu biba bya kusomeza bwenene.”
Co cirhumire, bibonekine oku bipatine n’obwenge okuderha oku enderho ziri omu Emigani 30:18, 19 ziganirire ebintu biri binja kobinali, ciru birhalusire oku rhwakahash’ihugûkwa. Ak’oyo mwandisi w’Ebibliya, rhunasomerwe n’oku lubaka abalala enyanya bwenene omu malunga, oku enjoka yakalibirha duba-duba okw’ibuye ciru akaba erhajira magulu, oku amashuwa mazirho gakabalama omu nyanja, n’oku omusole n’omunyere bakasimana n’okuba n’akalamo k’omwishingo haguma.