Yehova Arhurhabire ‘Okuyâna Amalehe aha Rhwakag’irhwerwa’

Mwene wirhu Kassholm na mukage Ann-Catrin basomaga Amasomo g’Egileadi omu mwaka gwa 1979 n’omu myaka minji ‘barhwezirwe,’ erhi kurhumwa lyo baj’ikolera e Birmanie, e Iran, e Maurice, e Uganda, e Tanzanie, n’omu Zaïre. Oku Masomo g’Egileadi ko bayumvagya ihano mwalimu Jack Redford, ahânaga lyabarhabire ngasi mango bakag’ihâbwa omukolo muhyahya. Leki barhuhugûlire.

Mwe mukasinga murhang’irhubwira gurhi mwapatagamwo okuli.

Mats: Larha al’ilamire e Pologne omu mango g’Ivita lya Kabiri ly’Igulu, na mw’ago mango acibonera bulyalya bunji omw’idîni ly’Akatolika. Ciru akaba ntyo, kanji-kanji akag’iderha erhi, “Manyire oku idîni ly’okuli ligwasirwe libe lihaba!” Enyuma za kasanzi kalebe, nahugûkwa oku ntyo ko binali. Nakagula bitabu binji abandi bali bamakolesa lyo mbisoma. Ciguma muli byo cali citabu c’irangi ly’obulè cakag’ihamagalwa Kweli Iongozayo Kwenye Uzima wa Milele. Eco cirhwe cansimisa bwenene nanasoma eco citabu coshi omu budufu nacipataga. Erhi buca, nal’ikola manyire oku napasire okuli!

Kurhondera omu Mwezi gwa 4, 1972, nasomire bicapo binji by’Abahamirizi ba Yehova nanapata amashuzo oku madoso gani g’Ebibliya. Naciyumva nk’oku olya murhunzi w’omu lwiganyo lwa Yezu aciyumvagya. Enyuma z’okupata igerha ly’engulo ndarhi, aguza ngasi kantu al’igwerhe ly’aligula. Naleka omuhigo nagwerhe gw’okusoma e université lyo mba doktere, na muli ntyo, nagula “igerha” ly’okuli nabonaga. (Mt. 13:45, 46) Nabatizibwa omu nsiku 10/12/1972.

Omu mwaka muguma, ababusi bani na mulumuna wani nabo bayemera okuli banabatizibwa. Omu Mwezi gwa 7, 1973, naba painiya w’akasanzi koshi. Omu bapainiya b’obushiru bali omu cigamba cirhu, mwali mwali wirhu muguma w’iranga linja wanal’izigire Yehova bwenene wakag’ihamagalwa Ann-Catrin. Rhwasimana rhwanajira obuhya omu mwaka gwa 1975. Omu myaka ini yakulikiraga rhwalama omu vile y’e Strömsund, eneo nyinja y’e Suède bantu banji bal’ilonzizemwo okuyiga Ebibliya.

Ann-Catrin: Larha ayigaga okuli erhi akola ayusa amasomo g’e université e Stockholm. Ago mango nal’igwerhe myezi isharhu yone, cikone akag’impêka oku ntimanano n’omu mahubiri. Nyâma arhal’isimire oko anakag’ilonza okuyerekana oku ebi Abahamirizi ba Yehova bayigiriza biba bya bunywesi. Cikone arhahashaga, na muli ntyo enyuma za kasanzi kalebe naye abatizibwa. Nabatizibagwa erhi ngwerhe myaka 13, n’erhi ngwerhe myaka 16 narhondera omukolo gw’obupainiya. Erhi ndi nakolera e Umeå, hantu hali obulagirire bunji bw’abahubiri bw’Obwami, naba painiya wa pekee.

Enyuma z’okurhôlana na Mats, rhwabire n’omwishingo gw’okurhabala bantu banji bayige okuli. Muli bo mwali Maivor, munyere muguma w’omushûko walekaga okushimbulira eby’esporo omu kalamo kage anarhondera akola omukolo gw’obupainiya haguma na mulumuna wani. Bombi basomire Amasomo g’Egileadi omu mwaka gwa 1984 banali bakola nka bamisiyonere e Équateur.

Ahantu hoshi mwakolire nka bamisiyonere, gurhi mwakolesizemwo ihano ly’‘okuyâna amalehe aha murhwezirwe’?

Mats: Rhwahâbirwe kanji-kanji emikolo mihyahya yakag’irhuhûna okuhamira ahandi hantu. Cikone akantu karhurhabire kanji-kanji okukomera ezo mpindulo, kwali kujira okwirhu koshi ensiku zoshi lyo rhuyiga olwiganyo lwa Yezu, ci bwenene obwirhohye bwage. (Kl. 2:6, 7) Kwa lwiganyo, ahali h’okulonza bene wirhu na bali birhu rhwakag’irhimanana nabo emunda rhwakag’irhumwa bajire ebintu nk’oku rhwal’ikomire, rhwakag’icihangana okulonza okumanya bulya gurhi bajira ebintu omu njira ndebe. Rhwakag’ilonza okuhugûkwa entanya zabo n’enkomedu z’emwabo. Oku rhwagendekire rhwayiga olwiganyo lwa Yezu, ko rhwanagendekire rhwaciyumva rhuli ‘babarhe oku burhambi bw’olwishi’ lyo rhuyâna amalehe ngasi aha rhwakag’irhumwa.​—Enna. 1:2, 3, Mashi Bible.

Ann-Catrin: Ly’omurhi gugendekera gwakula enyuma z’okushub’irhwerwa, guba gulagirire oku bulangashane bw’izuba. Ensiku zoshi, Yehova ayerekine oku ali “kazubazuba” kuli rhwe. (Enna. 84:11, Mashi Bible) Arhuhîre bene wirhu na bali birhu banji b’ekiroho barhushagalukire banarhuzigire. Kwa lwiganyo, omu cigamba cirhu cisungunu c’e Tehran, e Iran, rhwacibwinire oborhere bw’okuyegereza ebigolo abantu baganirirwe omu Bibliya bakag’iyerekana. Rhwal’isimire rhubêre e Iran, cikone omu Mwezi gwa 7, 1980, oburhegesi bwahanza omukolo gwirhu eyo munda na lusiku luguma barhubwira oku rhugwasirwe rhurhenge mw’eco cihugo omu nsa 48. Rhwahâbwa omukolo gw’okugend’ikolera omu Zaïre (ehamagalwa ene République Démocratique du Congo) omu Afrique.

Erhi manya oburhangiriza oku barhurhumire rhuj’ikolera omu Afrique, nalaka. Ebi nali erhi nayumvirhe lugenda enjoka n’endwala z’omu Afrique, byanyobohya. Cikone bîra birhu babirhi bakolire omu Afrique myaka minji barhubwira ntya: “Murhayobohaga. Murhasag’ija omu Afrique! Cikone rhumanyire oku mwashagalukira e Afrique.” Ntyo ko byanabire! Bene wirhu na bali birhu baba ba buzigire na ba bushagaluke. Co cirhumire, enyuma za myaka ndarhu erhi bihûna rhurhenge omu Zaïre enyanya z’okuhanzibwa kw’omukolo gwirhu, namwemwerhwa enyanya z’okuba nali namashanja loshi-loshi entanya zani nanakag’ishenga Yehova ntya: “Wekasinga, orhuleke rhubêre omu Afrique.”

Migisho ehi mwabire nayo omu kukolera Yehova?

Mats: Ntakabula bwaganirira obwîra bwinja bwenene rhwabire nabo haguma na bamisiyonere b’omu bihugo biri lubero n’enkomedu ziri lubero. Kandi, hantu haguma na haguma rhwarhumirwe, rhwacibwinire omwishingo gwago-gwabo gurhenga omu kulongola amafunzo manji g’Ebibliya, kwa lwiganyo, hali amango ngasi muguma wirhu akag’ilongola mafunzo 20 ntya! Na nta mango nanayibagire obuzigire n’oborhere bw’okuyegereza ebigolo bwa bene wirhu na bali birhu b’omu Afrique. Amango rhwakag’ilambagirira ebigamba omu Tanzanie, rhwakag’ilala omu mutuga gwirhu, na bene wirhu na bali birhu bakag’ijira oku bakanahasha koshi lyo barhuha ebi rhulagirireko ciru akaba bali bakenyi bwenene. (2 Kr. 8:3) Akantu kali kago-kago bwenene kuli rhwe kali kasanzi k’okubwirana emyanzi, ko kuderha, akasanzi nie na Ann-Catrin rhwakag’itamala haguma oku buzinda bwa ngasi lusiku lyo rhuganirira ebi rhwabwine omu mulegerege n’okuvuga Yehova omunkwa okubona anabire haguma na nirhu.

Ann-Catrin: Kuli nie, omwishingo munji nabire nago gwali gwa kumanyana na bene wirhu na bali birhu banji b’omu maeneo gali lubero g’igulu. Rhwayizire endimi mpyahya zihiziremwo: Ecifarsi, Ecifaransa, Eciganda, n’Eciswahiri, rhwanayiga lugenda enkomedu ziri lubero. Rhwarhabire okukomereza bene wirhu na bali birhu bahyahya, rhwacijirira abîra binja, rhwanashagalukira okukolera Yehova haguma nabo.​—Sof. 3:9.

Kandi rhwabwine obulemi bwa Yehova buli lubero bw’okushagalusa. Ngasi mango rhwakag’iyemera omukolo muhyahya, rhwakag’iciyumva nka rhuli rhwabalama haguma na Yehova, ye nka Cirongozi cirhu. Arhuyigirizize ebintu rhurhakamanyire ciru n’ehitya oku bwirhu rhwenene.

Mazibu gahi mwarhimanine nago, na gurhi mwagalwisize?

Mats: Hali amango rhwalwazire ndwala ndebe, kwa lwiganyo amalaria. Na Ann-Catrin abezirwe omu mango malebe gali lubero buzira kulaliza. Kandi rhwal’iyobohire lugenda ababusi birhu bal’ikola bajire bashosihala; co cirhumire rhuvuzire balumuna birhu omunkwa bulya bayemire okubashibirira erhi rhunali omu mukolo gwirhu. Bajijire bwinja ogo mukolo n’obulembedu, omwishingo, n’obuzigire. (1 Tm. 5:4) Ciru akaba ntyo, hali amango rhwakag’ilwisa entanya z’okucitumuza enyanya z’okuba rhwal’ilonzize okujirira ababusi birhu binji ahali h’okubarhabala kone rhunali kulî.

Ann-Catrin: Omu mwaka gwa 1983, erhi rhuli rhwakolera omu Zaïre, nalwala ekolera ndarhi. Doktere abwira Mats ntya: “Omurhenze mw’eci cihugo ene ene!” Olusiku lwakulikiraga, rhwagenda omu mviyo ehêka emizigo, yone mviyo yahali olo lusiku yajaga e Suède.

Mats: Rhwarhanya oku omukolo gwirhu gw’obumisiyonere guhwerire aho, enyanya z’oko rhwalaka bwenene. Cikone Ann-Catrin afuma ciru akaba doktere al’idesire oku arhafume. N’enyuma za mwaka muguma, rhwashub’igaluka omu Zaïre, ago mango lero rhwaja omu cigamba cisungunu c’Eciswahiri e Lubumbashi.

Ann-Catrin: Amango rhwali e Lubumbashi, naba izimi cikone lyagera. Ciru akaba rhurhal’ipanzire okuburha abana, okuheza oyo mwana wirhu kwarhuma rhwaciyumva kubi bwenene. Cikone mw’ago mango mazibu, Yehova arhuha engalo rhurhal’irhanyizeko. Rhwarhondeza mafunzo manji g’Ebibliya kulusha oku byali embere. Omu myezi milebe yone, ecigamba rhwalimwo ca bahubiri 35 bayushûka kuhika oku 70, n’abantu bakag’iyisha oku ntimanano bayushûka kurhenga oku bantu 40 kuhika oku bantu 220. Rhwakag’ijira binji bwenene omu mukolo gw’amahubiri, na Yehova agisha obushiru bwirhu n’oko kwarhuma naciyumva bwinja bwenene. Ciru akaba ntyo, rhunacirhanye n’okuganira kanji-kanji lugenda oyo mwana wirhu muzigirwa. Rhuli rhwalindirira oku Yehova afumya loshi-loshi amalumwa girhu g’ekandalala omu Paradizo.

Mats: Enyuma z’aho, Ann-Catrin arhondera aciyumva ali muzamba bwenene anarhamire. Mw’ago mango go n’ago, bambonamwo akansere k’omu bula byanahûna mberwe. Cikone ene ndi naciyumva bwinja, na Ann-Catrin ali ajira oku akanahasha koshi omu mukolo gwa Yehova.

Rhwahikire okuhugûkwa oku arhali rhwene rhulwisa amazibu, abandi nabo banagalwise. Omu mwaka gwa 1994 enyuma z’okuniguzibwa kw’abantu omu cihugo c’e Rwanda, rhwalambagirira bene wirhu na bali birhu banji bali omu makambi g’ababunga. Okucibonera obuyemere bwabo, obulembedu bwabo, n’oborhere bwabo bw’okuyegereza ebigolo ciru akaba bal’ilamire omu kanga kazibu bwenene, kwarhuyigirizize oku Yehova ajira obuhashe bw’okurhabala abakozi bage omu ngasi irhangulo.​—Enna. 55:22.

Ann-Catrin: Agandi mazibu gaba amango rhwajaga oku ntimanano y’okuhânwa kw’etawi y’e Ouganda emwa Yehova omu mwaka gwa 2007. Enyuma z’eyo programe, rhwali omu mubalamo gw’okuja e Nairobi omu cihugo c’e Kenya, cali cigusho ca bantu 25 ntya ca bamisiyonere na Babetelite. Embere rhuhike oku mupaka gw’e Kenya, omutuga munene gwarhengaga olundi lunda gwagonga ebisi rhwalimwo. Shoferi, bene wirhu babirhi na bakabo n’owundi mwene wirhu bafâ ho n’aho; mwali wirhu muguma afîra oku hopitali enyuma z’aho. Rhuli rhwacifinja bwenene okushub’ibona abo bîra birhu!​—Ayu. 14:13-15.

Nafumire ebihulu by’omubiri byanjagako ago mango. Cikone nie na Mats rhuli egarhi k’abantu bali mw’eyo bisi bagendekire balibuzibwa n’amahangayiko enyuma z’eyo aksida. Okubinyerekire, ago mahangayiko gakag’inyishira budufu, gakag’intula omw’iro n’okurhuma naciyumva nk’olwazire etansio. Ebyo byakag’iba bya kuyobohya. Cikone okusalira bwenene emwa Yehova haguma n’okusoma n’okurhanya bwenene oku mandiko maguma na maguma rhusima bwenene kwarhurhabire okurhulirira. Kandi rhwajir’ibona badoktere bal’imanyire okurhabala abagwerhe amahangayiko, n’oko kwarhurhabala bwenene. Ene, ago mahangayiko garhaciri manji, rhunal’irhwahûna Yehova arhurhabale lyo rhurhuliriza abandi bali balwisa amazibu gali nk’ago.

Ene oganirira gurhi mwahashire okulwisa amazibu wadesire oku Yehova akag’imuhêka “nka maji mabishi.” Bici walonzagya okuderha?

Mats: Ezo nderho zirhenzire omu musemwa gw’Eciswahiri gudesire, “Tumebebwa kama mayai mabichi,” erhi “Rhwahêsirwe nka maji mabishi.” Nka kula omuntu aba masu bwenene amango adwirhe amaji mabishi lyo garhaberekaga, Yehova arhushibirire omu njira y’olukogo omu ngasi mukolo rhwakag’ihâbwa. Ensiku zoshi rhwakag’iba n’ebi rhulagirireko, ciru na kulusha ebi rhwal’ilagirireko. Njira nguma rhwabwinemwo obuzigire n’oburhabale bwa Yehova kuli kugerera oku Embaraza Eri Yalongoza yakag’icihira ahali hirhu.

Ann-Catrin: Nakalonzize nganirire lwiganyo luguma luyerekine gurhi Yehova arhurhabire omu njira y’olukogo. Lusiku luguma bampamagala oku telefone banambwira oku larha ali omu kafuhero e Suède. Mats aciyusagya afuma amalaria anaciri muzamba. Rhurhal’igwerhe buhashe bw’okulipa itiké ly’emviyo lyo rhuja e kâ, muli ntyo, rhwahiga okuguza omutuga gwirhu. Rhwashub’ihamagalwa kabirhi oku telefone; mulume muguma na mukage barhuhamagalaga bamanyaga lugenda akanga kirhu, bal’ilonzize okurhulipira itiké lya muntu muguma. Owundi muntu warhuhamagalaga ali mwali wirhu muguma mugikulu wakag’ibîka ensaranga omu cibweta al’iyandisireko “Enyanya za muntu mulebe oli omu bulagirire.” Omu miniti misungunu, Yehova arhulwako!​—Hb. 13:6.

Erhi murhanya oku myaka 50 mwamajira omu mukolo gw’akasanzi koshi, bici mubona mwayizire?

Ann-Catrin: Nayizire oku emisi yirhu eba ‘omu kudekerera n’omu kulangalira’ Yehova. Erhi rhulangalira Yehova, anarhulwire. (Iz. 30:15; 2 Nga. 20:15, 17) Omu kukolera Yehova n’obuhashe bwirhu boshi omu ngasi mukolo, rhwahâbirwe migisho minji kulusha ngasi migisho rhwakabire nayo rhucijirage ogundi mukolo.

Mats: Isomo ly’obulagirire nayizire kuli kuyegemera Yehova omu ngasi kanga n’okulola oku arhurhabala. (Enna. 37:5) Nta mango asag’iyabirwa okuhikiriza eciragane cage c’okurhurhabala. Rhunacigendekire rhwabona gurhi Yehova ali arhurhabala omu mukolo rhuli rhwajira ene oku Beteli y’e Birmanie.

Rhulangalire oku misole minji elonzize okujira binji omu mukolo gwa Yehova nayo yacibonera obo buzigire bwishwekerezi Yehova arhuyeresire. Rhulangalire oku byaba ntyo erhi bakaleka Yehova abarhabale bayâne malehe manji ngasi aha bakarhwerwa.