“Nasîmaga Akaraté Bwenene”

AKALAMO KANI KA MÎRA

Nayagaza owirhu mushasi erhi rhuba rhuli rhwacikomereza. Namushurha ecipasi omw’izûlu buzira kumanya. Naciyumva kubi nanarhondera narhanya okuleka akaraté. Bici byarhumaga elyo igosa liguma lyarhuma narhondera narhanya okuleka omucezo nakagisîma bwenene myaka minji? Leki nteng’imubwira oku narhonderaga nasharha akaraté.

Nakuliraga omu mulala gw’abakatoliki bazigiraga idîni lyabo bwenene. Rhwalilamire hofi n’e Buffalo, vile y’omu New York, omu États-Unis. Nasomeraga oku masoma g’abakatoliki nanakagikola oku lutari lw’akanisa. Ababusi bani balilonzize nie na mwali wirhu rhube n’akalamo kinja. Muli oko banyemerera okukajira oku micezo y’emasomo n’okujira akazi ka kasanzi kasungunu enyuma z’amasomo, caziga mpate emasomo. Oko kwantabala okukajira bintu bilebe niene nancirimurho.

Erhi nyeneza myaka 17, narhondera nayiga akaraté. Najijire myaka minji erhi kucikomereza ncikomereza nsa 3 oku lusiku, nsiku 6 ngasi mugobe. Ngasi mugobe nakagijira nsa nyinji lyo ncikengeza bulenga buguma buguma omw’irhwe lyani n’okulola evideo zakantabire okuba karateka mwinja. Nalishagalukire okucikomereza n’amasu gani gashwesirwe ecitambara, ciru n’amango nakagicikomereza n’engôrho. Nagwerhe obuhashe bw’okubera olubaho erhi kuvungunyula iburiki omu kulishurha ngumi nguma yone. Nalikarateka muzibu nanahimire kamashigwe nyinji. Akaraté kali kantu ka bulagirire bwenene omu kalamo kani.

Nahikira ebi nakagirhanya omu kalamo. Napata e diplome yani y’e université na halama nyinji. Napata akazi k’okuba ingénieur informaticie omu sosyete nkulu bwenene nanakagipata nfaranga nyinji. Esosyete yakahikiriza agandi malagirire gani. Nagwerhe enyumpa, nanagwerhe omwira w’omunyere. Nakagibonekana nka ngwerhe akalamo k’omwishingo, cikoki ntakagwerhe bulya ntalimanyire okulama byo bici n’okola kwakambuza omurhula omu kalamo.

OKU EBIBLIYA YASHANJIRE AKALAMO KANI

Lyo mbona amashuzo oku madoso gani, nacihiriraho omuhigo gw’okuja oku kanisa kabirhi omu mugobe, nanakagishenga Nnâmahanga anongoze. Lusiku luguma, enganîro najiraga haguma n’omwira wani zashanja akalamo kani. Namudosa er’idoso: “K’okola ocidosize ebi rhujira mw’er’igulu? Bulya liyunjwiremo amazibu n’obubule bw’obushinganyanya bunji!” Ansuza oku naye akola acidosize ago madoso n’oku abwine ishuzo likwanine omu Bibliya. Ampa ecitabu Unaweza Kuishi Milele Katika Paradiso Duniani.a Ampugûlira oku anacifunze Ebibliya haguma n’Abahamirizi ba Yehova. Narhindira okurhola eco citabu bulya nakagirhanya oku kurhakaba kwinja okusoma ecitabu cirhali c’idîni lyani. Okubona nalilonzize okupata amashuzo oku madoso gani, nayumva enyorha y’okulola erhi enyigirizi z’Abahamirizi ba Yehova zipatine n’obwenge.

Nasomerwa okubona ebi Ebibliya eyigiriza. Naciyigiriza oku Nnâmahanga alemire omuntu ly’alama ensiku n’amango n’oku arhasagishanja ogo muhigo gwage. (Omurhondêro 1:28) Nasomerwa okubona izino lya Nâmahanga Yehova omu Bibliya yani ya King James n’okumanya oku elyo izino lyo nakagisalira omw’isala lya Larha Wirhu. (Ennanga 83:18; Mateyo 6:9) Kandi, Nahugûkwa bulya gurhi Nnâmahanga alekerera abantu balibuke. Ebi naciyigirize byalipatine n’obukengere. Nashagaluka bwenene.

Ntakayibagira oku naciyumvagya erhi nja oku ntimanano z’Abahamirizi ba Yehova. Abantu boshi bâl’ibakulonza obwîra n’okulonza okumanya izino lyani. Omu ntimanano ntanzi najagamo, ehotuba yago-yago y’abantu boshi yajiragwa yaliyerekire amasala gayumvibwa na Nnâmahanga. Ecirhwe c’eyo hotuba cantabala bwenene bulya nakagishenga oburhabale bwa Nnâmahanga. Buzinda naja aha Kukengera Olufû lwa Yezu. Mw’ezo ntimanano, nasomerwa bwenene okubona abana bali bakulikirana n’oli wayigiriza ngasi kusoma olwandiko omu Bibliya. Oku murhondero, ntalimanyire oku balonza olwandiko omu Bibliya, cikoki Abahamirizi bantabala bwenene omu kunyigiriza oku kolesa Ebibliya.

Oku nagendekeraga naja oku ntimanano, ko nanagendekeraga nashagalukira obwinja n’enyigirizo zilengerire z’Abahamirizi ba Yehova. Naciyigiza bintu binji oku ngasi ntimanano, n’ensiku zoshi nakagirhengamo erhi shagalusire na ntulirizîbwe. Buzinda narhondera okuciyigiriza Ebibliya n’Abahamirizi ba Yehova.

Abahamirizi baligwerhe olugenzi lwali lubero n’ebi nalikomire okubona omu kanisa kirhu. Nafulûla oku Abahamirizi ba Yehova ciba cikundi c’abantu balama omu cinyabuguma n’abacihangana okuyerekana amorhere gayerekine oku bali Bakristu b’okuli, k’okuderha, bayerekana obuzigire.​—Yowane 13:35.

Oku nagendekeraga naciyigiriza Ebibliya, ko nanagendekire najira mpindulo nyinji lyo ndama nk’oko amakanuni g’Ebibliya gadesire. Ciru akaba ntyo, nakabona oku ntakahasha naleka okusharha akaraté. Nalisimire okucikomereza n’okujira akamashigwe. Erhi nganiza Omuhamirizi wakaginyigiriza Ebibliya, aderha ntya n’obwonjo: “Ogendekere waciyigiriza, manyire oku wanarhôle omuhigo mwinja.” Oko ko nalilagirireko okuyumva. Oku nagendekire naciyigiriza, ko nanegendekire nalonza okushagalusa Yehova Nnâmahanga.

Nahiga okuleka okusharha akaraté enyuma za kalya kanga naderhaga oku murhodero, erhi nshurha owirhu mushasi ecipasi omw’izûlu. Eyo aksida yarhuma narhanya bwenene lugenda okuba mwanafunzi wa Kristu w’okulonza omurhûla erhi nakagendekera naba karateka. Naciyigiriza oku Izaya 2:3, 4 âli amalêba oku abalonza obulongozi bwa Yehova, ntabo “bacicîyigirize okulwa.” Na Yezu ayigiriza abantu okuyâka ebijiro by’obushumûsi ciru n’amago abantu babakolire obubule bw’obushinganyanya. (Mateyo 26:52) Muli oko, nahiga okuleka ogo mucezo nakagisîma bwenene.

Enyuma z’okuguleka, nakulikira ihano ly’Ebibliya ly’okulama omu ‘kucîkomereza omu kucîshwekera kuli Nnâmahanga.’ (1 Timoteyo 4:7, Mashi Bible) Obwihangane n’akasanzi nakagiyusa omu kusharha akaraté, nkola bikolesa omu kuyegerera n’okukolera Nnâmahanga. Okubona omunyere nakagilama naye arhasîmaga erhi ntondera nayiga Ebibliya, rhwalekana naye. Nabatizibwa n’okuba Muhamirizi wa Yehova nsiku 24/1/1987. Kasanzi kasungunu enyuma z’okubatizibwa, narhondera omukolo gw’akasanzi koshi omu kukolesa akasanzi kani, okuyigiriza abandi Ebibliya. Kuhika ene ncigendekire n’omukolo gw’akasanzi koshi, na kasanzi kasungunu nakolîre oku biro bikulu by’Abahamirizi ba Yehova byali e New York omu États-Unis.

EBI NAYUNGUSIRE

Okubona nkola manyire okuli lugenda Nnâmahanga, napatire akantu nakagilonza omu Kalamo. Akalamo kani kakola kajira ecirhumire. Nkola njira obulangalire bw’okuli lugenda akalamo k’amango gayisha n’obushagaluke bw’okunali. Kuhika buno ncijira enkomedu y’okucikomereza, cikone oko kucikomereza kurhaciba kwa burhanzi omu kalamo kani. Akantu kw’obulagirire bwenene omu kalamo kani kuli kukolera Yehova Nnâmahanga.

Erhi mba ndi nasharha akaraté, akasanzi koshi nakagiba masu bwenene lugenda abantu nakagibuganana nabo lyo mbana gurhi nakacihalira erhi akashambulira. Ene, ncigendekire naba masu lugenda oku nakabarhabala. Ebibliya yantabîre okuba muhânyi na mulume mwinja kuli mukanie, mukazi mwinja, Brenda.

Nasîmaga akaraté bwenene omu kalamo kani. Cikoki kuhika buno, nkola nsîma akantu kinja bwenene. Ebibliya eganirire ako kantu omu njira nyinja bwenene: “Okushagalusa omubiri kuba kwinja hisungunu, cikwone okucîshwekerera kuli Nnâmahanga, kwo kwinja kulusha byoshi, bulya arhulaganyize obuzine bwa buno n’obw’omu mango gayisha.”​—1 Timoteyo 4:8.