Ka Kobinali e Coupe du Monde Yanalunga Abantu Haguma?​—Bici Ebibliya Edesire Lugenda oko?

Hofi bantu miliyare irhanu balola a match g’e Coupe du Monde y’e FIFA kurhondera omu nsiku 20/11/2022 kuhika omu nsiku 18/12/2022. Bantu banji banarhanye oku emicezo ya ntyo yanajira binji ahanyuma n’okulunga haguma abantu bali bayilola.

• “E sport egwerhe obuhashe bw’okushanja igulu. Egwerhe obushe bw’okushumya abantu bahige okujira kantu kalebe. Egwerhe obuhashe bw’okulunga abantu haguma omu njira yago-yago.”​—Nelson Mandela, prezida wa mîra w’e Afrique du Sud.

• “Akabumbu . . . kanalunge abantu haguma omu bulangalire, omu mwishingo, omu nyifinjo, omu buzigire n’omu bintu biri lubero bagwerhe byakarhuma balungana.”​—Gianni Infantino, prezida w’e FIFA.a

Ka kobinali e Coupe du Monde erhi ogundi mucezo byanahikiriza emihigo ya ntyo? Ka hali obulangalire lugenda okuba n’omurhûla n’ecinyabuguma?

Ka yanaba nshôko y’ecinyabuguma?

E Coupe du Monde y’ogu mwaka yarhumire abantu barhanya binji ahanyuma n’akabumbu kone. Eyo micezo yarhumire abantu bakaganirira eby’epolitike, n’ebiyerekire embaga bihiziremo ehaki z’abantu, akabôlo lugenda irangi ly’omubiri, n’ebihugo okurhaba n’obuhirhi buyumanine.

Ciru akaba ntyo, bantu banji banabone oku emicezo y’omw’igulu lyoshi nk’e Coupe du Monde, enahe abantu obulyo bw’okucishagalula. Cikone, ciru akaba abantu banashagalukire eyo micezo, erhankalerha ecinyabuguma c’ensiku n’amango. Lubero n’oko, eyo micezo enakayerekana kungaci abantu bagabikine omu ntanya n’omu bijiro, morhere Ebibliya edesire gakayerekine akasanzi kahamagalwa “nsiku nzinda.”​—2 Timoteyo 3:1-5.

Obulangalire bw’okunali lugenda igulu lyoshi okuba omu cinyabuguma

Ebibliya erimo obulangalire lugenda igulu lyoshi okuba omu cinyabuguma. Elaganyize oku abantu boshi bayish’ilungana omu cinyabuguma idako z’oburhegesi bw’empingu buhagalwa “Bwami bwa Nyamuzinda.”​—Luka 4:43; Mateyo 6:10.

Omwami w’obo Bwami, Yezu Kristu ayish’ijira igulu lyoshi libemo omurhûla. Ebibliya edesire ntya:

• “Obushinganyanya bwàyêra omu nsiku zage, n’omurhûla guluge.”​—Ennanga 72:7.

• “Aciza omukenyi omuyakûzize . . . Abakûla omu kunyagwa n’omu kulizibwa.”​—Ennanga 72:12, 14.

Ciru n’ene, enyigirizo za Yezu ziri zalunga emiliyoni y’abantu haguma balamire omu bihugo hofi 239. Bayizire okuleka enshombo. Ly’omanya binji, osome emyanzi edesire “Mambo ya Kufanya Juu ya Kuachana na Chuki.”