Akalamo k’Abalya Ebishogo-shogo​—Bici Ebibliya Edesire?

Omu igulu lyoshi, bantu banji banashagalukire ebishogo-shogo.

• “Akalamo k’okulya ebishogo-shogo, eba njira y’okurhanya erhi kulama omu kuyaka okuyagaza ensimba erhi kuzikolesa nka biryo, mishangi, erhi kuzikolesa omu kuhikiriza ogundi muhigo.”​—The Vegan Society.

Bantu baguma na baguma banakaba bakulya ebishogo-shogo arhali kone mpu bulya bashibirire ensimba, cikone kandi bulya balonzize bakubûle amazingira, amagala gabo erhi kandi enyanya z’eby’idîni.

• “Akalamo k’okulya ebishogo-shogo kaba lubero n’okuyaka okulya biryo biguma na biguma, bulya kanji-kanji abantu banakakabona nka buyemere, nka muhigo gw’olugenzi, na nka njira ngasi muntu alonza okushanjamwo igulu lyo liba linja.”​—Britannica Academic.

K’Akalamo k’okulya ebishogo-shogo kanayusa amazibu g’igulu? Bici Ebibliya edesire?

Oku Omulemi wirhu abona bene bantu n’ensimba

Ebibliya eyerekine oku Omulemi wirhu, Yehova Mungu,a anabone bene bantu oku balushire ensimba ananabahîre obuhashe bw’okuzirhegeka. (Omurhondêro 1:27, 28) Kobinali, Mungu ayemerire bene bantu bakalya ensimba. (Omurhondêro 9:3) Cikone, arhaba ayemire okulibuza ensimba.​—Emigani 12:10.

Ebibliya eyerekine oku omuntu yene oshinganine ahige erhi alya enyama erhi nanga.b Omuhigo gwirhu gurhakarhuma rhwaba ba bulagirire bwenene omu masu ga Mungu. (1 Abakorinti 8:8) Ntaye oshinganine aderhe kubi omuhigo owabo anarhôzire lugenda ebi alya.​—Abaroma 14:3.

Oku Igulu Lyanabemwo Linja

Ebibliya eyerekine n’obwalagale oku arhali oku rhucishozire okulama ko kwakayusa amazibu g’igulu. Mazibu manji g’er’igulu ganakalerhwa n’eby’epolitike, eby’olubaga, n’eby’oburhunzi by’er’igulu birhakakubulwa n’omuntu yeshi-yeshi. Ebibliya edesire ntya:

• “Ebyakubire birhakacikubûka.”​—Omuhanûzi 1:15, Mashi Bible.

Omulemi wirhu ayish’iyusa amazibu gali garhuhikira. Ebibliya ekolesize enjira y’olwiganyo ly’eyerekana ebi ayish’ijira.

• “Okubundi nanacibona amalunga [mpingu] mahyahya n’igulu lihyahya, bulya amalunga [mpingu] marhanzi n’igulu lirhanzi byahirigisire, n’enyanja ntayo ecihali.”​—Amafulûlo 21:1.

Mungu ayish’irhenzaho amarhegesi ga bene bantu, erhi “amalunga [mpingu] marhanzi,” n’okuhiraho “amalunga [mpingu] mahyahya,” ko kuderha oburhegesi bw’Obwami bwage bw’empingu. Obwami bwage bwayish’irhenzaho “igulu lirhanzi,” ko kuderha abantu babi, bwanayish’irhegeka “igulu lihyahya,” ko kuderha balya boshi barhumikira oburhegesi bwage.

Omu burhegesi bw’Obwami bwa Mungu mone bene bantu bayish’iyiga okulama omu murhûla haguma n’ensimba n’okukenga amazingira.​—Izaya 11:6-9.