Bici Ebibliya Edesire Okubiyerekire Okuhâna?
Ishuzo ly’Ebibliya
Ebibliya erhuhîre omurhima rhukaha abandi erhi rhunagwerhe ecirhumire cinja c’okujira ntyo. Eyerekine oku okuhâna omu njira ya ntyo kunalerhere owahânaga n’owahâbagwa obunguke. (Emigani 11:25; Luka 6:38) Yezu adesire ntya: “Haba bushagaluke bunji omu kuhâna kulusha omu kuhâbwa.”—Ebijiro by’Entumwa 20:35, NWT.
Mangaci okuhâna kulerha obunguke?
Omuntu anayunguke erhi ahâna buzira kusezibwa. Ebibliya edesire ntya: “Ngasi muguma ahâne nk’oku omurhima gwage gunamubwizire; arhahânaga nk’oli burhe, nisi erhi nk’osezibwe; bulya Nyamuzinda azigira ohâna anashagalusire.”—2 Abakorinti 9:7.
Okuhâna buzira kusezibwa ciba cigabi c’“idini” Nnâmahanga aba ayemire. (Yakobo 1:27) Omuntu orhabala abandi buzira kusezibwa, anabe ali akola haguma na Nnâmahanga, na Nnâmahanga anabone nka ye oyo muntu arhabire. (Emigani 19:17) Ebibliya eyigirizize oku Nnâmahanga ayish’igalulira abahânyi.—Luka 14:12-14.
Mangaci okuhâna kurhashagalusa Nnâmahanga?
Erhi omuntu akajira ntyo anagwerhe ebirhumire bibi bimushumize. Kwa lwiganyo:
Ly’abandi bamubona.—Mateyo 6:2.
Ly’ayish’igalulirwa kantu kalebe.—Luka 14:12-14.
Ly’ayish’iyokoka.—Ennanga 49:6, 7.
Erhi omuntu akajira ntyo ly’alunga okuboko emikolo erhi olugenzi Nnâmahanga aba ashombire. Kwa lwiganyo, kwanaba kubi erhi omuntu akaha owundi ensaranga ly’aj’ilaluka amamvu erhi ly’agula amafumu g’okucilalusa. (1 Abakorinti 6:9, 10; 2 Abakorinti 7:1) Na kandi, kwanaba kubi okuha omuntu oburhabale n’obu agwerhe obuhashe bw’okuhikiriza amalagirire gage yene cikone arhalonzizi okujira ntyo.—2 Abatesalonika 3:10.
Erhi omuntu akajira ntyo n’oko kurhume abula buhikiriza amalagirire g’omulala gwage. Ebibliya eyigirizize oku ba nnawabo b’emilala bashinganine bakahikiriza amalagirire g’emilala yabo. (1 Timoteyo 5:8) Kurhakaba kwinja erhi nnawabo w’omulala akaha abandi ebi anakahikizizemo amalagirire g’omulala gwage. Ko n’oko, Yezu akalihire abakag’ibula buhikiriza amalagirire g’ababusi babo bashosi omukuderha oku ebi bagwerhe eri “nterekero ngoshôlere Nnâmahanga.”—Marko 7:9-13, Mashi Bible.