AMAHUGÛLO G’AMANDIKO G’EBIBLIYA
Yowane 3:16—“Nnâmahanga Azigire Igulu”
“Neci, Nnâmahanga azigire igulu, kuhika ahâna Omugala cusha, mpu ngasi yeshi wamuyemera alek’ihera, ci abone obuzine bw’ensiku n’amango.”—Yowane 3:16, New World Translation.
Amahugûlo g’Olwandiko lwa Yowane 3:16
Nnâmahanga aba arhuzigire anaba alonzize rhulame ensiku n’amango. Co carhumaga arhuma Omugala, Yezu Kristu, hanw’igulu. Erhi Yezu ali hanw’igulu, ajijire bintu binji. Akantu kaguma ajijire kwali kuyigiriza abanafunzi bage lugenda Nnâmahanga wage n’Ishe. (1 Petro 1:3) Na kandi, ahâna obuzine bwage kuli bene bantu. Lyo rhuyish’iba n’obuzine bw’ensiku n’amango, rhushinganine rhube n’obuyemere muli Yezu.
Obuzigire bunji bwa Nnâmahanga buyerekinwe mw’ezi nderho, “ahâna Omugala cusha.”a Yezu ali Mugala cusha wa Nnâmahanga. Bulya gurhi? Bulya Yezu yene walemirwe na Nnâmahanga yene. (Abakolosi 1:17) Ye “Nfula omu biremwa byoshi.” (Abakolosi 1:15) Ebindi biremwa byoshi, bihiziremwo abandi bamalahika, byalemirwe kugerera Yezu. Ciru akaba ntyo, Yehovab Nnâmahanga arhuma Omugala muzigirwa buzira kusezibwa ly’‘akolera abandi, anahâne obuzine bwage mpu lyo acungula banji.’ (Mateyo 20:28) Yezu alibuka anafâ ly’arhukûla omu caha n’omu lufû, rhwayimaga kurhenga kuli Adamu, muntu murhanzi.—Abaroma 5:8, 12.
Okuba n’obuyemere muli Yezu kuhiziremwo binji ahanyuma n’okumuyemera kone erhi kumanya ebi arhujirire. Rhushinganine rhuyerekane obuyemere muli Mugala wa Nyamuzinda omu kumurhumikira n’okushimba enshando zage. (Mateyo 7:24-27; 1 Petro 2:21) Ebibliya edesire ntya: “Oyemera Omugala, agwerhe obuzine bw’ensiku n’amango; olahire okuyemera Omugala, arhakabona akalamo.”—Yowane 3:36.
Akanga Ebinwa Biri omu Yowane 3:16 Byaderhagwamwo
Yezu aderhaga ebyo binwa amango akag’iganira na Nikodemu, mukulu muguma w’idîni ly’Eciyahudi. (Yowane 3:1, 2) Muli ezo nganîro, Yezu ayerekana binji okubiyerekire Obwami bwa Nnâmahangac n’‘okushub’iburhwa buhyahya.’ (Yowane 3:3) Na kandi alêba gurhi akafîremwo. Aderha ntya: “Kukwanine Mwene-omuntu ayinamulwe, [kutundikwa oku murhi], lyo ngasi yeshi omuyemire abona obuzine bw’ensiku n’amango.” (Yowane 3:14, 15) Omu kuderha ntyo, asegeza oku Nnâmahanga ahîre bene bantu obo bulyo bw’okuyish’iba n’obuzine bulya aba abazigire bwenene. Yezu ashwinja enganîro zage omu kuhugûla oku lyo rhuba n’obuzine, rhushinganine rhube n’obuyemere n’okujira ebishagalusa Nnâmahanga.—Yowane 3:17-21.
a Oluderho lw’Ecigiriki luhindwirwe “Mugala cusha” luli monogenes, lwahugwîrwe nka “yene, . . . nta wundi omu bûko bwage, yene-yene (omu bûko).”—A Greek-English Lexicon of the New Testament and Other Early Christian Literature, buk. 658.
b Yehova ly’izino lya Nnâmahanga.—Ennanga 83:18, NWT.
c Obwami bwa Nnâmahanga, kandi buhamagalwa “Obwami bw’empingu,” buba burhegesi bw’empingu. (Mateyo 10:7; Amafulûlo 11:15) Nnâmahanga ayimisire Kristu nka Mwami w’obo Bwami. Obwami bwa Nnâmahanga bwayish’ihikiriza omuhigo gwage kuyerekera igulu. (Daniyeli 2:44; Mateyo 6:10) Ly’obona myanzi minji, olole ecigabi cidesire “Obwami bwa Nnâmahanga byo Bici?”