Bamisionere Bakola “Kuhika ah’Igulu Lihekera”

Yezu abwira abanafunzi bage ntya: ‘Mwaba bahamirizi bani . . . kuhika ah’igulu lihekera.’ (Ebijiro by’Entumwa 1:8) Ene, Abahamirizi ba Yehova banajire ogo mukolo n’obushiru boshi. Cikone, hali maeneo maguma na maguma g’omw’igulu gabamo bantu banji, garhasagihânwamo obuhamirizi goshi. N’omu bindi bihugo muba Bahamirizi ba Yehova basungunu. (Mateyo 9:37, 38) Gurhi rhujira lyo bihashikana okuhubiri muli ago maeneo?

Ly’Ekomite y’Omukolo y’Embaraza Eri Yalongoza erhumikira er’irhegeko lya Yezu, enahireho bamisionere lyo bagend’ihubiri ahantu hali obulagirire bw’okuhubiri. Ene omw’igulu lyoshi muli bamisionere 3 090 b’Abahamirizi ba Yehova.a Banji bamulibo bakomerezibwe oku masomo g’Ebibliya, kwa lwiganyo, nk’Amasomo g’aba Eneza Injili bw’Obwami. Baba babidu okurhenga emwabo n’okugend’ilama omu cindi cihugo. Bulya baba bakuzire kiroho, n’okubona bakomerezibwe banagwerhe bulenga bunji, abo bamisionere bishwekerezi banarhabale okuyaliza omwanzi mwinja n’okuhâna olwiganyo lwinja oku banafunzi bahyahya.

Okurhabala Bamisionere lyo Barhabala Abandi

Omu ngasi tawi, Edepartema y’Omukolo enakole haguma n’Ecomite y’Etawi ly’ehikiriza amalagirire ga bamisionere, kwa lwiganyo, ensaranga z’okubalipira enyumpa, ez’okubabukisa, n’ez’okuhikiriza amalagirire gabo ga ngasi lusiku. Omu mwaka gw’omukolo gwa 2020, Abahamirizi ba Yehova bayusize hofi dolare miliyoni 27 lyo bashibirira bamisionere. Kugerera eyo mipango, bamisionere banahash’isegeza obwenge bwabo oku mukolo gw’amahubiri n’oku burhabale baha ecigamba babarhumiremwo.

Bunguke buci bamisionere badwirhe omu mukolo gw’amahubiri? Mwene wirhu Frank Madsen, okola omu Komite y’Etawi y’e Malawi, adesire ntya: “Kugerera obushiru bwabo n’obulenga bwabo, bamisionere banarhabale ebigamba bihubiri omu maeneo gali mazibu okuhubiri, kwa lwiganyo, nk’omu nyumpa barhalug’iyemerera abantu okujamwo erhi omu maeneo g’olulimi lw’emahanga. Na kandi obushiru bajira lyo bayiga olulimi luhyahya n’enkomêdu za mw’eco cihugo bunahâne olwiganyo lwinja oku bandi, na kandi bunashumye emisole ebe n’entanya nyinja okubiyerekire omukolo gw’akasanzi koshi. Rhuvuzire Yehova omunkwa okubona arhuhire abo bamisionere.”

Owundi mwene wirhu w’omu Komite y’Etawi y’ecindi cihugo, adesire ntya: “Bamisionere banayerekane oku abakozi ba Yehova b’omw’igulu lyoshi baba omu cinyabuguma. Ciru n’abantu barhali Bahamirizi ba Yehova babwine oku enkomêdu rhwakulagamwo zirharhuma rhwaba n’akabôlo, cikone enyigirizo z’Ebibliya zinarhurhabale okuba n’ecinyabuguma.”

Gurhi bamisionere barhabalamwo abahubiri? Mwene wirhu muguma ohamagalwa Paulo, olama e Timor-Leste, ashagalukire okuba haguma na mulume muguma na mukage baba bamisionere omu cigamba cabo. Adesire ntya: “Eno munda emwirhu eba ecidurhu bwenene. Cikone, ciru akaba abo bamisionere barhenganga omu cihugo cibamw’emboho, oko kulama omu cihugo c’ecidurhu kurharhuma barhahubiri. Ngasi mango banakayisha oku ntimanano y’amahubiri. Na mbabone ngasi mango bali bagalukira abantu ciru akaba kali kalengerere, gala mango izuba liba liri lyabasha bwenene bananajire ntyo bijingo. Barhabire bantu banji bamanye okuli, nani ndi muguma wa mulibo. Banacihâne loshi omu mukolo gwa Yehova n’obushiru n’obushagalusi, n’oko kunashumye ecigamba cicihâne omu mukolo gw’amahubiri.”

Ketti, painiya muguma olama e Malawi, adesire gurhi mulume muguma na mukage bali bamisionere barhabire omulala gwage, adesire ntya: “Erhi barhuma bamisionere omu cigamba cirhu, niene nali Muhamirizi wa Yehova omu mulala gwirhu. Cikone bantabala bwenene, banaba bîra b’omulala gwirhu. Olwiganyo lwabo lwinja lwarhabire abana bani babone oku, amango omuntu ali akolera Yehova, anabe n’akalamo k’omwishingo na ka kurhimukwa. Kugerera olugenzi lwabo lwinja, ene, bali bani basharhu bakola baba ba painiya b’akasanzi koshi n’ibanie akola aja oku ntimanano.”

Ngahi rhukula ensaranga zirhabala bamisionere okuhikiriza omukolo gwabo? Zinakarhenga omu burhabale buhânwa omu kulunga okuboko omukolo gw’omw’igulu lyoshi. Obo burhabale bunajirwe kugerera donate.jw.org. Rhumuvuzire omunkwa kuli obo buhânyi bwinyu.