Mwanzi mwinja muci rhugwerhe oku biyerekire amadîni?

1. K’amadîni goshi gaba g’okuli?

Abantu b’omurhima mwinja baba omu ngasi idîni. Co cirhumire okumanya oku Nnamahanga anababone n’okubashibirira guli mwanzi mwinja bwenene. Cikwone bigayisize okubona oku kurhenga mira amadîni ganashumike abantu okujira amabi. (2 Abakorinti 4:3, 4; 11:13-15) Hali emyanzi eyerekine oku madîni maguma maguma ganakaciheba omu bye terorizime (bunizi n’okurhera abantu lugenda politike), okuhul’embaga, entambala, n’okujira ebijiro bibi by’obugonyi oku bana. Kobinali, ebyo bijiro bibi binagayise abo bemezi b’emirhima minja!​—Osome Mateyo 24:3-5, 11, 12.

Ciru ankaba ago madîni mabi ganagayise Nnamahanga, idîni ly’okuli lyohe linamukuze n’okumukengesa. Amadîni g’obunywesi ganayigirize enyigirizo zirhali omu Biblia, kwa lwiganyo enyigirizo z’obunywesi kuli Nnamahanga, na kuli àbafîre. Cikwone, Yehova alonzize abantu bamanye okuli kuli ye.​—Osome Ezekiyeli 18:4; 1 Timoteyo 2:3-5.

2. Mwanzi mwinja muci rhugwerhe oku biyerekire amadîni?

Guli mwanzi mwinja okumanya oku Nnamahanga arhankarhebwa n’amadîni magalugalu gakacijira nka gali gamusima nobu gasimire eby’er’igulu liri lyarhegekwa na Shetani. (Yakobo 4:4) Amadîni g’obunywesi goshi gahamagirwe omu Bibliya “Babuloni Mukulu.” Babuloni cali cishagala ca mira idîni ly’obunywesi lyarhangiriragamo enyuma lya cirya Cihonzi c’amango ga Nuhu. Nnamahanga ali hofi ahererekeze ca ligumiza amadîni goshi galigarheba abantu n’okubalibuza.​—Osome Amafulûlo 17:1, 2, 5, 16, 17; 18:8.

Alaga ogundi mwanzi mwinja: Yehova arhayibagiri abantu binja bali mw’ago madîni g’obunywesi omw’igulu lyoshi. Adwirhe abaheba haguma omu kubayigiriza okuli.​—Osome Mikeyo 4:2, 5.

3. Bici abo bantu b’emirhima minja bagwasirwe bajire?

Yehova anashibirire abantu basima aminja n’okuli. Abahunyire barhenge omu madîni g’obunywesi. Abasimire Nnamahanga banahinduke dubaduba lyo bamusimisa.​—Osome Amafulûlo 18:4.

Amango g’entumwa, abantu b’emirhima minja bakagiyankirira n’omwishingo emyanzi minja entumwa zakagiyigiriza. Yehova àbayigiriza gurhi bahindula akalamo kabo lyo kaba n’omwishingo, n’omuhigo, n’obulangalire. Abo bantu barhusigire olwiganyo lwinja, bulya erhi bayusi yankirira omwanzi mwinja, baheba Yehova embere z’ebindi byoshi omu kalamo.​—Osome 1 Abatesalonika 1:8, 9; 2:13.

Abarhenga mw’ago madîni g’obunywesi, Yehova anabayankirire omu cinyabuguma c’abamuharamya. Nawe Yehova akulalisire, okayemera waba mwira wage, waja omu mulala gw’abantu b’obuzigire balya bamuharamya Yehova, na buzinda wayishibona obuzîne bw’ensiku n’amango.​—Osome Marko 10:29, 30; 2 Abakorinti 6:17, 18.

4. Gurhi Nnamahanga ayishisimisa abantu b’amashanja goshi?

Alaga ogundi mwanzi mwinja: Amadîni g’obunywesi goshi gali hofi gatwirwe olubanja. Idîni ly’obunywesi lirhakacilibuza ndi, lirhakacirheba ndi, n’abantu barhakacilyana nka malindye. Abantu boshi bayishijira cinyabuguma ciguma c’abaharamya Nnamahanga w’okuli.​—Osome Amafulûlo 18:20, 21; 21:3, 4.