ISOMO LYA 13
Oku Amadîni g’Obunywesi Ganywerhera Nnâmahanga
Erhi akaba Nnâmahanga aba buzigire, bulya gurhi amadîni gaderha oku ganamukolere gajijire bintu binji bibi? Kwa bofofi, ago madîni gaba ga bunywesi; gananywerhere Nnâmahanga. Gurhi gajiramwo ntyo? Gurhi Nnâmahanga abona ago madîni? Na gurhi anagajire?
1. Gurhi enyigirizo z’idîni zarhumire abantu barhacizigira Nnâmahanga?
Idîni ly’obunywesi ‘lyahingine okuli kwa Nnâmahanga n’eby’obunywesi.’ (Abaroma 1:25) Kwa lwiganyo, hofi amadîni goshi garhayigiriza abemezi bago izino lya Nnâmahanga. Cikone, Ebibliya edesire oku rhushinganine rhukakolesa izîno lya Nnâmahanga. (Abaroma 10:13, 14) Erhi hakajira ebintu bibi byaba, bakulu baguma baguma b’amadîni banaderhe oku obo buli bulonza bwa Nnâmahanga. Cikone obo buli bunywesi. Arhali Nnâmahanga ye olerhera abantu ebintu bibi. (Osome Yakobo 1:13.) Akantu k’okugayisa kuli kubona oku obunywesi bw’amadîni bwarhumire bantu banji barhacizigira Nnâmahanga.
2. Gurhi ebijiro b’idîni ly’obunywesi byarhumire abantu barhacizigira Nnâmahanga?
Idîni ly’obunywesi lirhakolera abantu n’obuzigire nk’oku Yehova abajirira. Ebibliya edesire oku “ebyaha [b’idîni ly’obunywesi] biri nsinga ehisire emalunga.” (Amafulûlo 18:5) Hakola hali myaka minji amadîni gali gacihira omu by’epolitike, okulunga amavita okuboko, gananigisize bantu banji bwenene. Bakulu baguma baguma b’idîni banakalonza okulama akalamo k’eraha kone, co cirhuma bakahûna abemezi babo ensaranga lyo babajirira kantu kalebe. Ebyo bijiro byoshi binayerekane oku barhamanyiri Nnâmahanga barhanashinganini okuyigiriza abantu ebya Nnâmahanga.—Osome 1 Yowane 4:8.
3. Gurhi Nnâmahanga aciyumva okubiyerekire amadîni g’obunywesi?
K’ebintu bibi amadîni g’obunywesi gajira binakugayise? Akaba binakugayise, gurhi orhanyizagye Yehova naye aciyumva? Yehova aba azigire abantu, cikone aba ashombire abakulu b’amadîni g’obunywesi bulya bamubonesize nshonyi, na bulya banakajirira abantu ebintu bibi. Alaganyize oku idîni ly’obunywesi lyayish’isherezibwa n’oku ‘lirhakanacifa lyabonesire bundi.’ (Amafulûlo 18:21) Olusiku Nnâmahanga agashereza luyegerire bwenene.—Amafulûlo 18:8.
HUMBIRIRA LY’OHUGÛKWA
Oyige kwa bulîri oku Nnâmahanga aciyumva okubiyerekire idîni ly’obunywesi. Ohugûkwe kwa bulîri ebi ago madîni gamakajira na kandi obone bulya gurhi oko kurhakakuhanza okumanya Yehova.
4. Nnâmahanga arhaba ayemire amadîni goshi
Bantu banji baba bayemire oku amadîni ko gaba nka mabarabara manji gali lubero na goshi ganahêke emwa Nnâmahanga. Ka kobinali ntyo? Osome Mateyo 7:13, 14, na buzinda oganirire er’idoso:
Gurhi Ebibliya ehugwîre enjira ehêka ebwa buzine?
Olole EVIDEO, na buzinda oganirire idoso likulikire.
K’Ebibliya edesire oku Nnâmahanga aba ayemire amadîni goshi?
5. Amadîni g’obunywesi garhayerekana obuzigire
Ebijiro bibi by’amadîni byarhumire abantu barhacizigira Nnâmahanga. Kwa lwiganyo, ganakacihira omu bintu b’ivita. Ly’obona lwiganyo luguma, olole VIDEO. Na buzinda oganirire aga madoso gakulikire.
Bici makanisa manji gajijire amango g’Ivita lya Kabirhi ly’Igulu?
Gurhi ociyumvirhe enyanya z’ebyo bijiro gajiraga?
Osome Yowane 13:34, 35 na 17:16. Na buzinda oganirire aga madoso:
Gurhi orhanyize Yehova aciyumva erhi amadîni gacihira omu bintu b’ivita?
Amadîni g’obunywesi gajijire bintu binji bibi. Bici nawe wacibwinire biyerekine oku amadîni g’obunywesi garhajira buzigire?
Amadîni g’obunywesi garhayerekana obuzigire
6. Nnâmahanga alonzize akûle abantu omu bujà bw’idîni ly’obunywesi
Osome Amafulûlo 18:4,a na buzinda oganirire er’idoso:
Gurhi ociyumvirhe okumanya oku Nnâmahanga alonzize okukûla abantu omu bujà bw’idîni ly’obunywesi?
7. Ogendekere waciyigiriza binji okubiyerekire Nnâmahanga w’okuli
Ka wanaleka okuzigira Nnâmahanga enyanya z’enyigirizo z’amadîni g’obunywesi n’ebintu bibi gakajira? Orhanye okubiyerekire omusole gulahire obulongozi ishe ali aguha. Buzinda ogo musole gwanarhenga aha mwabo gujilama akalamo kabi bwenene. Ishe arhashagalukiri ebyo bijiro omugala ajijire. Bulya gurhi kuli kubi bwenene erhi omuntu akaderha okw’ishe w’ogo musole ye warhumire omugala alama akalamo kabi bwenene?
Ka kwanaba kwinja erhi wakakaderha oku Yehova yegwerhe amagosa, na ntyo oleke okuciyigiriza binji kuli ye enyanya z’ebijiro amadîni g’obunywesi gakajira?
HALI ABANTU BADERHA NTYA: “Ntashibirira ebiyerekire Nnâmahanga bulya idîni lyarhumire mazibu manji gaba hanw’igulu.”
Ka ntyo ko nawe orhanya?
Bulya gurhi ebijiro b’idîni ly’obunywesi birhashinganini birhume orhacibona Yehova nka Nnâmahanga wa buzigire?
KWA BOFOFI
Enyigirizo n’ebijiro by’amadîni g’obunywesi byarhumire abantu barhacizigira Nnâmahanga. Nnâmahanga ashereza amadîni goshi g’obunywesi.
Okucikengeza
Gurhi ociyumva lugenda enyigirizo z’amadîni g’obunywesi n’ebijiro byago?
Gurhi Yehova aciyumva okubiyerekire amadîni g’obunywesi?
Gurhi Nnâmahanga ajira amadîni goshi g’obunywesi?
OCIYIGIRIZE KWA BULÎRI
Olole njira ibirhi zihi amadîni gagayisizemwo Nnâmahanga.
“K’Amadîni Goshi go Ganaba Maguma? Ka Goshi Ganahêke emwa Nnâmahanga?” (Mwanzi guli oku jw.org)
Bulya gurhi Yehova asima rhumuharhamye haguma n’abandi bantu?
“Ka Kuba kwa Bulagirire Okuba n’Idîni Lilebe?” (Mwanzi guli oku jw.org)
Ciru ankaba padri muguma agayisibagwa n’ebijiro b’idîni lyage, arhalekaga okuyiga okuli lugenda Nnâmahanga.
“Sababu Iliyofanya Padri Aache Kanisa Lake” (Amuka!, y’Omwezi gwa 2, 2015)
Amadîni gayigirizize obunywesi kuli Nnâmahanga, n’oko kwarhumire abantu bakola bakarhanya mpu Nnâmahanga arharhushibirira arhanaba wa bwonjo. Olole nyiganyo isharhu.
a Ly’ohugûkwa bulya gurhi ecitabu c’Amafulûlo cishushanyize amadîni g’obunywesi n’omukazi ohamagalwa Babiloni Mukulu, olole Amahugûlo ga 1.