Abantu bafîre, ka kobinali banacib’ilama?

ALAGA ISHUZO LY’EBIBLIYA

“Abafîre bafûke.”​—Ebijiro by’Entumwa 24:15.

BUNGUKE BUCI WAKABA NABO ERHI WAKAYEMERA EZO NYIGIRIZO Z’EBIBLIYA?

Zanakurhuliriza erhi wakafîrwa n’omuzigirwa wawe.​—2 Abakorinti 1:3, 4.

Zanakurhabala orhacikag’iyoboha olufû.​—Abahabraniya 2:15.

Zanakuha obulangalire bw’okuyish’ibona bene winyu bafîre.​—Yowane 5:28, 29.

KA RHWANAYEMERA EBI EBIBLIYA EDESIRE?

Neci, hali bintu bisharhu byakarhuma rhwayemera ezo nyigirizo z’Ebibliya:

• Nnamahanga ye Warhondezâgya obuzîne. Ebibliya edesire oku Yehova Nnamahanga “y’enshôko y’obuzîne.” (Ennanga 36:9, NWT; Ebijiro by’Entumwa 17:24, 25) Bulya ye wahâga ebiremwa byoshi obuzîne, kobinali agwerhe obuhashe bw’okucib’igalulira abantu bafîre obuzîne.

• Nnamahanga afuzîre abantu omu nsiku za mîra. Ebibliya eganirire bantu munani bafûzirwe banacib’igendekera balama hanw’igulu. Bâl’imo emisole, abashosi, abalume n’abakazi. Baguma mulibo bal’igwerhe kasanzi kasungunu bafîre cikone muguma muli bo âli amajira nsiku 4 omu nshinda!​—Yowane 11:39-44.

• Nnamahanga agwerhe irâla ly’okucib’ifûla abafîre. Yehova kushomba ashomba olufû, kw’alubona nka mushombanyi. (1 Abakorinti 15:26) Agwerhe omuhigo gw’okuhima oyo mushombanyi n’okuyusa olufû kugerera obufûke. Agwerhe irala ly’okufûla ngasi balya bali omu nkengêro zage n’okushib’ibagalulira obuzîne.​—Ayubu 14:14, 15.