Omwami Murhanzi w’e Israheli

Yehova al’ihîre Abaisraheli abazuzi lyo bakabalongoza, cikone balonza okuba n’omwami. Babwira Samweli ntya: ‘Amashanja goshi garhuzungulusire gajira abami. Nirhu rhulonzize rhuhâbwe omwami.’ Samweli ayumva oku oko kuli kubi, na ntyo ashenga Yehova lugenda oko. Yehova amubwira ntya: ‘Arhali we abantu balahire. Nie bali balahira. Obabwire oku bapata omwami cikone oyo mwami abahûna bintu binji.’ Ciru akaba ntyo, abantu baderha ntya: ‘Nta kadali. Rhulonzize rhuhabwe omwami!’

Yehova abwira Samweli oku omulume wakag’ihamagalwa Sauli ye waba mwami murhanzi. Erhi Sauli agend’ilambagirira Samweli e Rama, Samweli ashîga Sauli amavurha okw’irhwe ly’aba mwami.

Buzinda Samweli ahamagala Abaisraheli boshi ly’abayeresa omwami wabo muhyahya. Cikone balonza Sauli barhamubonaga. K’omanyire bulya gurhi? Bulya al’icifulisire omu mizigo. Buzinda erhi babona Sauli, bamuhulusa banamuyimanza egarhi k’abantu. Sauli ali mulî kulusha abantu boshi, anali w’iranga linja bwenene. Samweli aderha ntya: ‘Oyu ye Yehova anabacagulire.’ Abantu baderha ntya n’izu linene: ‘Mwami alame ensiku n’amango!’

Oku murhondero Mwami Sauli akag’iyumvirhiza Samweli anakag’irhumikira Yehova. Cikone enyuma z’aho ashanja. Kwa lwiganyo, mwami arhal’iyemerirwe okuhâna enterekêro oku mazabahu. Lusiku luguma, Samweli abwira Sauli alinde oku ayisha, cikone Samweli arhayishaga ho n’aho. Muli oko Sauli ahiga okuhâna enterekêro yene oku mazabahu. Gurhi Samweli ajijire? Amubwira ntya: ‘Orhal’ishinganine obule bwarhumikira Yehova.’ Ka hali ebi Sauli aciyigirizize kugerera igosa ajiraga?

Enyuma z’aho, erhi Sauli agend’ilwisa Abaamaleki, Samweli abwira Sauli abanige boshi. Cikone Sauli ahiga okuleka Mwami Agagi. Yehova abwira Samweli ntya: ‘Sauli andesire, arhali anyumvirhiza.’ Samweli agaya bwenene, anabwira Sauli ntya: ‘Bulya walesire okurhumikira Yehova, acishoga owundi mwami.’ Erhi Samweli alonza okugenda, Sauli agwarha ecishumiro c’igoti lya Samweli. Buzinda Samweli abwira Sauli ntya: ‘Yehova anakunyazire obwami.’ Yehova akahîre omuntu wamukenga n’okumuzigira obo bwami.