Yezu Amacishoga Saulu

Saulu ali cikala w’e Roma waburhagwa e Tarso. Ali Mufarizeyi wal’imanyire bwinja Amarhegeko g’Abayahudi, ananakag’ishomba Abakristu. Akag’ikula abalume n’abakazi Bakristu omu mwababwe n’okubakweba omu prizo. Erhi ecigusho c’abantu cishurha omwanafunzi Stefano amabuye n’okumuniga, Saulu ali aho ananakag’ilaba.

Cikone Saulu arharhimukagwa n’okushweka Abakristu bali e Yeruzalemu bone. Ahûna kuhani mukulu oluhusa lw’okuja e Damasko ly’aj’ilibuza Abakristu bali eyo munda. Erhi Saulu ali hofi n’evile y’e Damasko, obulangashane bunji bwenene bwamuzunguluka, anahirimira okw’idaho. Ayumva izu lyaderha ntya: ‘Saulu, bulya gurhi oli wandibuza?’ Saulu adosa ntya: ‘We ndi?’ Ely’izu lyamushuza ntya: ‘Nie Yezu. Oje e Damasko, wamanyira yo ebi oshinganine ojire.’ Ho n’aho, Saulu aba muhurha, analagirira oku wundi muntu wakamugwarha okuboko ly’amuhisa mw’eyo vile.

Omu vile y’e Damasko, mwali Mukristu muguma mwishwekerezi wakag’ihamagalwa Ananiya. Yezu abwira Ananiya ntya omu cibonekerezi: ‘Oje emwa Yuda omu njira ederhwa Njira Ekubûsire, olonzemwo omulume ohamagalwa Saulu.’ Ananiya aderha ntya: ‘Nyakasane, mmanyire oyo muntu bwinja! Ali akweba abanafunzi bawe omu prizo!’ Cikone Yezu aderha ntya: ‘Oje emunda ali. Nacishozire Saulu ly’ayaliza omwanzi mwinja omu mashanja manji.’

Ntyo Ananiya abona Saulu anamubwira ntya: ‘Saulu, mwene wirhu, Yezu anantumire lyo nzibula amasu gawe.’ Ho n’aho, Saulu ashub’iba n’obuhashe bw’okubona. Ayiga lugenda Yezu anaba ntumwa yage. Bulya Saulu al’ikola ali Mukristu mubatize, arhondera ahubiri omu sinagogi haguma n’ababo Bakristu. Ka wanarhanya kunganaci Abayahudi bagayire bwenene erhi babona Saulu ali ahubiri abantu lugenda Yezu? Baderha ntya: ‘K’arhali olya mulume wakag’ilibuza abanafunzi ba Yezu oyu?’

Saulu ayusa myaka isharhu ali ahubiri abantu bal’ilamire e Damasko. Abayahudi bashomba Saulu banarhôla emipango y’okumuniga. Cikone bene wirhu bayumva oku hali ogo mupango banarhabala Saulu ly’ayaka. Bamuhira omu lurhanda banamuhira embuga y’evile omu kumugereza omu murhule gwali omu lukuta lw’evile.

Erhi Saulu aja e Yeruzalemu, alonza okucilunga haguma na bene wirhu b’eyo munda. Cikone bakag’imuyoboha. Enyuma z’aho, mwanafunzi muguma w’olukogo wakag’ihamagalwa Barnaba, ahêka Saulu emunda entumwa zali anaziyemeza n’obwalagale oku kobinali Saulu ashanjire. Saulu arhondera ahubiri omwanzi mwinja n’obushiru haguma n’ecigamba cali e Yeruzalemu. Buzinda, ayish’imanyikana oku izino lya Paolo.