Amafulûlo ga Yowane

Erhi entumwa Yowane eba eli omu prizo oku cirhwa c’e Patmosi, Yezu amuyeresa bibonekerezi 16, erhi nfoto ziyerekire ebintu byakabire omu mango gayisha. Ebyo bibonekerezi byal’iyerekine gurhi izino lya Yehova lyakacesibwemwo, oku Obwami bwage bwakayishire, n’oku obulonza bwage bwakajirikine hanw’igulu nk’omu mpingu.

Omu cibonekerezi ciguma, Yowane abona Yehova atamire omu mpingu oku cirhi c’obwami cigwerhe irenge, azungulusirwe na bagula 24 bayambirhe emishangi myeru n’oku marhwe gabo kuli ebimane by’enoro. Obulangashane n’amazu g’omukungulo byakag’irhenga ebwa eco cirhi c’Obwami. Abo bagula 24 bafukama embere za Yehova banamuharamya. Omu cindi cibonekerezi, Yowane abona ehitu hy’abantu barhenzire omu mashanja goshi, omu mbaga zoshi, n’omu ndimi zoshi bali baharamya Yehova. Omwana-buzi, ko kuderha Yezu, ali abayabula n’okubalongoza ebwa mishi g’obuzine. Enyuma z’aho, omu cindi cibonekerezi Yowane abona Yezu arhondera arhambula nka Mwami omu mpingu, haguma na balya bagula 24. Omu cibonekerezi cakulikiraga, Yowane abona Yezu ali alwisa enkuba-joka, ko kuderha Shetani, n’abazimu bage. Yezu abafukuza omu mpingu, abakweba okw’igulu.

Enyuma z’aho Yowane abona enfoto nyinja bwenene y’Omwana-buzi ayimanzire haguma na bantu 144 000 oku Ntondo Siyoni. Kandi Yowane abona malahika ali abalala omw’igulu lyoshi, ali abwira abantu bayobohe Mungu banamuhe irenge.

Ecibonekerezi cikulikire, ciyerekire ivita lya Armagedoni. Mw’er’ivita, Yezu n’abasoda bage bahima igulu libi lya Shetani. Omu cibonekerezi cizinda, Yowane abona ecinyabuguma egarhi k’empingu n’igulu. Shetani n’iburha lyage basherezibwa loshi-loshi. Abantu boshi omu mpingu n’okw’igulu bali babona oku izino lya Yehova liri litagatifu, banali bamuharamya yenene.