Amaruba Garhenga oku Mbaraza Eri Yalongoza

Bene Wirhu na Bali Birhu Bazigirwa:

Rhwe nka bakozi ba Yehova, rhuba rhuzigire Akanwa kage, Bibliya. Rhuba rhuyemire n’obwalagale oku ebamwo emyanzi y’okunali, obulongozi bw’okulangalirwa bwakarhurhabala omu kalamo, n’ebintu by’okuhuma oku murhima birhuyemezize n’obwalagale oku Yehova aba azigire bene bantu. (Ennanga 119:105; Luka 1:3; 1 Yowane 4:19) Rhujira irala linji bwenene ly’okurhabala abantu bayige enyigirizo nyinja z’okuli ziba omu Kanwa ka Mungu. Co cirhumire rhugwerhe omwishingo gw’okumuha eci citabu cidesire: “Amasomo Wakayiga Kugerera Ebibliya.” Leki rhumuganirire hisungunu lugenda ebiri mw’eci citabu.

Erhi rhuli rhwarheganya eci citabu, rhwakag’irhanya bwenene lugenda abana. Cikone canarhabala n’abantu bakulu bagwerhe irala ly’okuyiga binji lugenda Ebibliya. Na bulya Ebibliya ciba citabu c’abantu boshi, buzira karhinda, carhurhabala rhuyunguke omu kushub’iyiga amasomo gamuli gakarhurhabala rhube n’omwishingo gw’okunali.

Omu kukolesa emyanzi eri omu Bibliya, eci citabu cirhuganirire emyanzi eyerekire bene bantu ya kurhondera amango g’obulemi na kugendekera. Rhwacihanganyire bwenene lyo rhuhugûla emyanzi eganirirwe omu Bibliya omu njira eyumvikine n’obwalagale, nnembu, rhwanajijire okwirhu koshi lyo rhuyiganirira nk’oku ekulikirine omu Bibliya.

Cikone, eci citabu cijijire binji ahanyuma n’okuganirira kone emyanzi eri omu Bibliya. Emyanzi n’enfoto biri mw’eci citabu byarheganyizibwe omu njira yakarhurhabala rhube nka ho rhwali erhi emyanzi eri omu Bibliya ejirikana n’okuciyumva nk’oku abantu baganirirwemwo bakag’iciyumva.

Eci cicapo carhurhabala rhubone oku Ebibliya ciba citabu ciganirire abantu boshi; ko kuderha, abarhumikire Yehova n’abarhamurhumikiraga. Na kandi carhurhabala rhuciyigirize masomo malebe kugerera enyiganyo zabo. (Abaroma 15:4; 1 Abakorinti 10:6) Eci citabu cirimwo bigabi 14. Oku murhondero gwa ngasi cigabi kuli obofofi bwa masomo maguma na maguma rhwakaciyigiriza.

Akaba oli mubusi, wanasoma isomo haguma n’omwana wawe, n’okuganirira enfoto zipatine n’er’isomo. Enyuma z’aho mwembi mwanasoma amandiko g’Ebibliya er’isomo liyimangireko. Orhabale omwana wawe abone gurhi ebi anasomaga omu Bibliya bipatine n’isomo anasomaga omu citabu. Wananajira ntyo amango oli warhabala omuntu mukulu ly’ahugûkwa kwa bofofi emyanzi eganirirwe omu Bibliya.

Rhulangalire oku eci cicapo carhabala abantu bagwerhe emirhima minja; babe baciri bana erhi bantu bakulu, lyo bayiga Akanwa ka Mungu n’okukolesa amasomo gamuli omu kalamo kabo. Oko kwabarhabala lyo nabo bamuharamya nka baguma b’omu mulala gwage aba azigire.