Maruba garhenga oku Mbaraza eri Yalongoza

Kwa Balya Boshi Bazigira Yehova n’Akanwa Kage, Bibliya:

Yezu adêrha erhi: “Mwamanya okuli, n’okuli kwammurhenza omu bujà.” (Yowane 8:32) Rhanya oku waciyumvâgya erhi omânya okuli kuba omu Bibliya! Buli bushagaluke bunji okumanya okuli mw’er’igulu liyunjwire bunywesi.​—2 Timoteyo 3:1.

Yehova Nnamahanga alonzize rhumanye okuli. Na bulya rhuzigira abantu rhunajire okwirhu koshi, rhubabwire okubiyerekire okuli. Cikone okukolera Nnamahanga kuhunyîre binji kulusha ebyo. Rhuba rhukenzire amakanuni ga Nnamahanga, rhunajire okwirhu koshi rhuyige olwiganyo lwa Yezu. Yezu ahugwîre gurhi rhwakayereka Nnamahanga oku rhumuzigîre. Adêrha ntya: ‘Mukashimba amarhegeko gani, mwasêra omu buzigire bwani, nk’oku nani nashimbire amarhegeko ga Larha, nanasêra omu buzigire bwage.’​—Yowane 15:10.

Yezu aba azigire Ishe bwenene n’ensiku zoshi anakajira obulonza bw’Ishe. Erhi omu kalamo kirhu rhwakayiga olwiganyo lwa Yezu, Yehova anarhuzigira n’oko kwanarhuha obushagaluke omu kalamo. Yezu adêrha ntya: ‘Mukamanya ebyo mukanabijira, mwaba n’obushagaluke.’​—Yowane 13:17.

Rhulangalire oku eci citabu cakurhabala olame nka kulya okuli kw’Ebibliya kunadesire n’okuba mwîra wa Nnamahanga. Rhuli rhwasalira ly’ogendekera wazibuhya obwîra bwawe kuli Nnamahanga na ntyo ‘osêre omu buzigire bwa Nnamahanga’ omu kulangalira “obuzîne bw’ensiku n’amango.”​—Yuda 21.