ISOMO LYA 12

Okuderha omu Njira y’Obwonjo na ya Buzigire

1 Abatesalonika 2:7, 8

OBOFOFI: Oderhe enderho zirhenzire oku murhima, onayereke abumvirhiza bawe oku obazigire onalonzize okubarhabala.

Orhanye lugenda abumvirhiza bawe. Orheganye omurhima gwawe omu kurhanya oku mazibu bali barhimanana nago. Obe nka warhanya gurhi bali baciyumva.
Ocishoge bwinja enderho wakolesa. Olonze okurhuliriza n’okuha abumvirhiza bawe omurhima. Oyake okukolesa enderho zirhali za bulagirire zakarhuma baciyumva kubi, orhanaderhaga kubi lugenda abantu barhali bahamirizi ba Yehova erhi lugenda ebi baba bayemire buzibu-zibu.
Oyerekane oku olonzize okurhabala abumvirhiza bawe. Omu kukolesa izu ly’olukogo n’ebimanyiso by’omubiri bishinganine, oyereke abumvirhiza bawe oku kobinali obashibirire. Obe masu lugenda ebimanyiso byawe by’ebusu; oje wamwemwerhwa kasanzi oku kandi.

Orhalonzagya okuyerekana oku orhali waciyumva orhanarhalusagya olugero lugenda oku oli waciyumva. Amango oli wasoma, oyerekane oku oli waciyumva kushimbana n’ebiganirirwe omu mwanzi oli wasoma, cikone omanye wakarhuma abantu bakusegezako obwenge okurhashinganini. Bulya okusegeza izu oku konsone kwanarhuma obusomi bwawe bwaba bwa mboho-mboho erhi bwa duba-duba, ocihangane bwenene okukulula evwayele ly’obusomi bwawe bubamwo ecidurhu.