ISOMO LYA 2

Okuganira omu Njira Nyinja

2 Abakorinti 2:17

OBOFOFI: Oganire nk’oku oyorha oganira, oganirire ebintu birhenzire oku murhima omu njira eyerekine gurhi oli waciyumva lugenda omwanzi oli waganirira na lugenda abumvirhiza bawe.

OKU WAKAJIRAMWO NTYO:

Oshenge onacirheganye bwinja. Oshenge Yehova onamuhûne akurhabale ly’orhasegezagya obwenge bwawe kuli we wene, cikone ly’obusegeza oku mwanzi waganirira. Obîke omu bwenge bwawe ebintu by’obulagirire oshinganine oganirire. Oderhe entanya ogwerhe omu nderho zawe wenene; orhajaga wagalukira kone enderho nk’oku zinayandisirwe omu cicapo.

Erhi akaba wasoma omwanzi guli omu Bibliya erhi omwanzi guli omu cindi cicapo, ocihangane okumanyirira enderho zirimw’ogo mwanzi erhi omu lwandiko wasoma ly’ozisoma buzira kurhindira-rhindira. Erhi akaba wasoma enderho muntu mulebe erhi bantu balebe baderhaga osome enderho zabo omu njira eyerekine oku oli waciyumva, buzira kuba nk’oli wajira eteyatre.
Oderhe enderho zirhenzire oku murhima. Orhanye bulya gurhi abumvirhiza bawe balagirire oku kuyumva omwanzi oli waganirira. Obasegezeko obwenge. Erhi wakajira ntyo, oku oyimanzire erhi oku odamire, ebimanyiso byawe by’omubiri n’eby’ebusu, byanayerekana ecidurhu n’oku oli waderha omu njira y’obwîra.

Okuderha nk’oku oyorha oderha kurhahugwîri okubulira abantu obukenge. Okengese omwanzi gwawe omu kukolesa enderho zicîre n’omu kukenga amarhegeko g’olulimi lwinyu.
Olabe abumvirhiza bawe. Oje walola oku bumvirhiza bawe erhi akaba kurhaba kubi okujira ntyo emwinyu. Erhi akaba oli wageza ehotuba, okalola oku muntu muguma muguma, ahali h’okulola oku bantu boshi erhi kubagezamwo amasu caligumiza.