ISOMO LYA 15

Okuderha omu Njira y’Okuyemeza Abumvirhiza

1 Abatesalonika 1:5

OBOFOFI: Oyerekane oku oyemire n’obwalagale oku ebi oli waderha biri by’okuli n’oku biri bya bulagirire.

Orheganye bwinja. Ociyigirize buzibu-zibu omwanzi kuhika ohugûkwe entanya z’obulagirire na gurhi Ebibliya eyerekinemwo oku ziri z’okuli. Ocihangane okuhugûla ebintu by’obulagirire omu kukolesa nderho nsungunu na nembu. Osegeze gurhi ogo mwanzi gwarhabala abumvirhiza bawe. Oshenge Yehova akuhe iroho litagatifu.

Amango oli wacirheganya, oje waderha n’izu, ly’entanya wayish’iganirira zibêra omu bukengere, ly’onayishihash’iziderha bwinja.
Okolese enderho z’okuyemeza. Ahali h’okuderha kone enderho nk’oku zinayandisirwe omu cicapo, okolese enderho zawe wene. Okolese enderho ziyerekine oku oyemire n’obwalagale ebi oli waderha.
Okolese enderho z’okusegeza ebintu by’obulagirire na za kurhenga oku murhima. Oderhe n’izu liyumvikine. Erhi akaba kurhali kubi okujira ntyo, oje walaba abumvirhiza bawe.

Okuderha omu njira y’okuyemeza abumvirhiza bawe kurhali kubabulira obukenge, okurhayemera entanya zabo, erhi okubaseza bakulikire entanya zawe. Ciru n’amango oli wasegeza ebintu by’obulagirire, oganize abumvirhiza bawe omu njira y’obuzigire.