ISOMO LYA 18

Okuyigiriza Abumvirhiza Bawe Bwinja

1 Abakorinti 9:19-23

OBOFOFI: Oshumye abumvirhiza bawe barhanye oku mwanzi oli wabayigiriza, lyo bahugûkwa oku bayizire kantu kalebe k’obulagirire.

Orhanye kw’ebi abumvirhiza bawe bakola baba bamanyire. Ahali h’okugalukira ebi abumvirhiza bawe bakola baba bamanyire, obarhabale barhanye omu njira mpyahya oku mwanzi oli wayigiriza.

Orhagezagya kasanzi kanji oku bintu abumvirhiza bawe bayosire bamanyire, cikone amango okola waganirira ebintu bihyahya oderhe bunyi-bunyi.
Ojire obusagasi onarhanye bwenene oku mwanzi waganirira. Amango bihashikine, okolese emyanzi erhamanyikini bwenene erhi ebintu biri byaba mw’agano mango ly’osegeza entanya z’obulagirire. Orhanye bwenene oku mwanzi gwawe onalabe erhi gugwerhe olushangi n’ebintu oli walonza okuderha.

Amango oli warheganya omwanzi gwawe oshumye entanya zawe omu kucidosa amadoso nka ‘bici, bulya gurhi, mangaci, indi na gurhi.’ Ojire enyigirizo zawe zibe zakushagalusa omu kudosa n’omu kushuza maguma na maguma ga mw’ago madoso amango oli wageza ecigabi cawe.
Oyerekane gurhi omwanzi gwawe gwakarhabala abumvirhiza bawe. Ohugûle gurhi ebiri omu mandiko byakarhabala abumvirhiza bawe omu kalamo kabo ka ngasi lusiku. Oganirire kanga kalebe, amorhere n’ebijiro biyerekire abumvirhiza bawe.