ISOMO LYA 6

Okuhugûla n’Obwalagale Ecirhumire c’Okukolesa Olwandiko

Yowane 10:33-36

OBOFOFI: Orhasomaga kone olwandiko n’enyuma z’aho ahamire oku kandi kantu. Omanye n’obwalagale erhi abumvirhiza bawe babwine bwinja-bwinja olushangi luli egarhi k’olwandiko wasomaga n’ebi oli waganirira.

OKU WAKAJIRAMWO NTYO:

Oyerekane enderho z’obulagirire. Enyuma z’okusoma olwandiko, osegeze enderho zipatine bwinja-bwinja n’akantu k’obulagirire olonzize okuganirira. Wanajira ntyo omu kugalukira ezo nderho erhi omu kudosa idoso lyashumya abumvirhiza bawe babone enderho z’obulagirire.

Erhi wakakolesa enderho ziri lubero ly’ogalukira entanya ziri omu lwandiko, omanye n’obwalagale erhi abumvirhiza bawe banacigendekera babona bwinja-bwinja gurhi enderho ziri omu Bibliya zipatine n’akantu k’obulagirire olonzize okuganirira.
Osegeze akantu olonzize abumvirhiza bawe bakakengera. Erhi wakajira enshokolezi y’olwandiko omu kuyerekana n’obwalagale ecirhumire c’okusoma olo lwandiko, ohugûle gurhi enderho z’obulagirire z’olo lwandiko zilunzire okuboko eco cirhumire.

Amango oli waganirira olwandiko wasomaga, orhayigalaga Ebibliya yawe. Oko kunarhabale abumvirhiza bawe bajire olushangi egarhi k’enderho oli waderha n’olwandiko wasomaga.
Ohâne amahugûlo malembu lugenda olwandiko. Oyake okuhâna amahugûlo lugenda ebintu bisungunu-ngunu birhagwerhi olushangi n’akantu k’obulagirire oli waganirira. Omu kurhanya bwenene lugenda ebi abumvirhiza bawe bakola bamanyire lugenda ogo mwanzi, ohige bintu binga byaba byabulagirire bwenene okuganirira ly’omumvirhiza wawe ahugûkwa bwinja akantu kʼobulagirire.