ISOMO LYA 4

Okujirira Amandiko Enshokolezi Nyinja

Mateyo 22:41-45

OBOFOFI: Orheganye obukengere bw’abumvirhiza bawe embere osome olwandiko.

Omanye bici byarhuma wasoma olwandiko. Embere z’okusoma ngasi lwandiko olujirire enshokolezi yarhabala abumvirhiza bawe okubona akantu k’obulagirire olonzize okusegeza.

Orhanye oku kanga olwandiko lwaganiriragwamwo. Erhi akaba wajira enshokolezi y’olwandiko omu kuganirira enderho muntu mulebe aderhaga, oshinganine omanye n’obwalagale erhi kobinali oyo muntu ye wanaziderhaga, n’erhi akaba wajira ntyo omu kuganirira omuntu wayandikaga citabu cilebe c’Ebibliya, oshinganine omanye n’obwalagale erhi kobinali oyo muntu ye waciyandikaga.
Oyerekane oku Ebibliya egwerhe obuhashe. Amango oli waganira n’abantu baba bayemire Nnâmahanga, obashumye basegeze obwenge bwabo oku Bibliya nka Kanwa ka Nnâmahanga. Omu kujira ntyo wanayerekana oku Ebibliya yo nshôko nyinja bwenene y’obwenge.
Oshumye abumvirhiza bawe bashagalukire amandiko. Odose idoso olwandiko lwashuzako, oganirire mazibu malebe olwandiko lwakarhabala okulwisa, erhi ohâne akanuni omwanzi guli omu Bibliya gwarhabala abumvirhiza bawe okuhugûkwa.

Orhanye oku bintu abumvirhiza bawe bakaba bamanyire lugenda ogo mwanzi na lugenda olo lwandiko. Ojirire olwandiko abumvirhiza bawe bamanyirire enshokolezi mpyahya, onabarhabale bacib’ilurhanyako n’okuluhugûkwa bwinja bwenene kulusha oku bal’iluhugûsirwe embere.