ISOMO LYA 25
Omuhigo gwa Nnâmahanga Kuli Rhwe Guba Guhi?
Ebibliya eyerekine oku akalamo ka bene bantu kaba ka “nsiku nsungunu erhi zinayunjwire mirhânyo.” (Ayubu 14:1) K’aka kalamo ko Nnâmahanga alilonzize rhulame? Erhi akaba arhali ntya kwal’ilonzize rhulame, omuhigo gwage kuli rhwe guba guhi? Ka gwanacihikirire? Rhuganirire amashuzo g’Ebibliya gahânyire oburhulirize.
1. Kalamo ka gurhi Yehova aba alonzize rhube nako?
Yehova alonzize rhube n’akalamo kinja. Erhi alema abantu barhanzi, Adamu na Eva, abahira omu paradizo nyinja bwenene, k’okuderha omw’ishwa ly’e Edeni. Buzinda “Nyamuzinda abagisha, ababwira, erhi: ‘Muburhe, muyololoke, mubumbe igulu munalirhegeke.’” (Omurhondêro 1:28) Yehova alilonzize baburhe abana, bajire igulu lyoshi libe paradizo n’okushibirira ensimba. Alilonzize abantu boshi babe n’amagala minja banalame ensiku n’amango.
Akalamo rhulamire ene arhaliko Nnâmahanga alirhulongize,a cikone omuhigo gwage ku rhwe gurhasagishanja. (Izaya 46:10, 11) Acilonzize bene bantu bamurhumikira bayishilama emyaka n’emyaka omu hali nyinja.—Osome Amafulûlo 21:3, 4.
2. Gurhi rhwakajira lyo rhuba n’akalamo k’omwishingo ene?
Yehova arhulemire n’irala ly’okuhugûkwa “obulagirire bwirhu bw’ekiroho,” k’okuderha irala ly’okulonza okumumanya n’okumukolera. (Osome Mateyo 5:3-6, NWT.) Aba alonzize rhube bîra bage, ‘rhushimbe enjira zage zoshi, okumuzigira,’ n’okumukolera “n’omurhima [gwirhu] gwoshi.” (Olushika 10:12; Ennanga 25:14) Erhi rhujira ntyo, rhunabe n’obushagaluke ciru ankaba rhuli omu mazibu. Okuharamya Yehova n’okulama nk’oku alonzize kunarhume rhwaba n’akalamo kinja kagwerhe omuhigo.
HUMBIRIRA LY’OHUGÛKWA
Oyige binji okubiyerekire obuzigire bunji Yehova ayerekanaga erhi arhulemera igulu, n’ebi Akanwa kage kayigirizize lugenda akalamo aba alonzize rhube nako.
3. Yehova aba alonzize bene bantu babe n’akalamo kinja
Olole EVIDEO, na buzinda oganirire er’idoso likulikire.
Bici byarhumaga Nnâmahanga alema igulu?
Osome Omuhanûzi 3:11, na buzinda oganirire er’idoso:
Bici olo lwandiko lukuyigirizize lugenda Yehova?
4. Omuhigo gwa Yehova gurhasagishanja
Osome Ennanga 37:11, 29 na Izaya 55:11, na buzinda oganirire er’idoso:
Bici biyerekine oku omuhigo gwa Yehova gurhasagishanja?
Enyumpa eshabusire yanacib’ilumulwa. Ko n’oko, bene bantu basherezize igulu cikone Nnâmahanga acililumula ly’abantu bamuzigira balilamamwo
5. Okuharamya Yehova kunarhume rhwaba n’akalamo kagwerhe omuhigo
Okumanya omuhigo gw’akalamo kwanarhuha omwishingo. Olole EVIDEO, na buzinda oganirire idoso likulikire.
Gurhi okumanya omuhigo gw’akalamo kwarhabire Terumi?
Osome Omuhanûzi 12:13, na buzinda oganirire er’idoso:
Bulya Yehova arhujirire bintu binji bwenene, bici nirhu rhushinganine rhumujirire?
HALI OMUNTU WAKADOSA NTYA: “Bulya gurhi Nnâmahanga arhulemaga?”
Gurhi wakamushuza?
KWA BOFOFI
Yehova alonzize rhube n’akalamo kinja ensiku n’amango hanw’igulu. Ene erhi rhumuharamya n’omurhima gwirhu goshi, akalamo kirhu kanabe kinja kanagwarhe n’omuhigo.
Okucikengeza
Kalamo ka gurhi Yehova alilonzize Adamu na Eva babe nako?
Gurhi rhumanyiremw’oku omuhigo gwa Nnâmahanga gurhasagishanja?
Gurhi wakajira ly’akalamo kawe kaba n’omuhigo?
OCIYIGIRIZE KWA BULÎRI
Olole ebiyerekine n’obwalagale oku kobinali ishwa ly’e Edeni lyahali.
“Bustani ya Edeni, Ilikuwaka Kabisa?” (Ilabiro ly’Akalalizi, ly’omu lusiku 1/1/2011)
Olole bulya gurhi rhwakayemera n’obwalagale okw’igulu lyahabêra emyaka n’emyaka.
Olole ebi Ebibliya edesire okubiyerekire ebi wakajira ly’oba n’omuhigo omu kalamo.
Olole gurhi mulume muguma wakagirhanya mpu ntaco abuzire ahikire aha abona akantu k’obulagirire arhagwerhe omu kalamo kage.
a Omw’isomo likulikire, rhwayiga bulya gurhi akalamo karhayosiri nk’oku Nnâmahanga alilonzize