ISOMO LYA 28
Oyerekane oku Ovuzire Omunkwa kw’Ebi Yehova na Yezu Bakujirire
Gurhi ociyumva erhi omwîra wawe aguha akantu kinja? Onacishinge bwenene, onanalonze okumuvuga omunkwa. Yehova na Yezu barhuhîre engalo nyinja bwenene elushire ngasi kantu muntu mulebe amakarhuha. Ngalo ehi eyo, na gurhi rhwakayerekanamwo oku rhuvuzire omunkwa kwʼeyo ngalo?
1. Njira ehi nguma rhwakayerekanamwo oku rhuvuzire omunkwa kw’ebi Yehova na Yezu barhujirire?
Ebibliya edesire oku “ngasi yeshi wamuyemera [Yezu]” analame ensiku n’amango. (Yowane 3:16) Gurhi rhwakayerekanamwo oku rhuyemire Yezu? Okuba n’obuyemere muli Yezu kuhiziremo bintu binji ahanyuma n’okuyemera kone. Rhunayerekane oku rhugwerhe obuyemere muli Yezu kugerera ebijiro n’emihigo rhurhôla. (Yakobo 2:17) Erhi rhuyerekana obuyemere bwirhu kugerera enderho n’ebijiro birhu, rhunazibuhye obwîra bwirhu haguma na Yezu, n’Ishe Yehova.—Osome Yowane 14:21.
2. Mango gahi gago-gago garhurhabala rhuyerekane oku rhuvuzire omunkwa kw’ebi Yehova na Yezu barhujirire?
Ebijingo by’embere z’okufâ kwa Yezu, aganirire entumwa zage okubiyerekire eyindi njira bakayerekinemwo oku bavuzire omunkwa oku nterekêro ahânaga. Arhondeza akantu kago-kago Ebibliya ehamagala “Ishega ly’Ebijingo lya Nnawirhu,” na kandi linahamagalwe Okukengera olufû lwa Yezu. (1 Abakorinti 11:20, NWT) Yezu arhondezagya er’ishega n’entumwa zage, n’Abakristu boshi b’okuli, bagendekire bakengera oku ahânyire obuzine bwage erhi rhwe rhurhuma. Yezu arhegeka abanafunzi bage ntya: “Mukâjira ntyo kube kukankengera.” (Luka 22:19) Erhi oja aha Kukengera olufû lwa Yezu, onayerekane oku ovuzire omunkwa oku buzigire bunji Yehova na Yezu barhuyeresire.
HUMBIRIRA LY’OHUGÛKWA
Olole ezindi njira wakayerekanamwo oku oshagalukire obuzigire bunji Yehova na Yezu barhuyeresire. Na kandi olole bulya gurhi Okukengera olufû lwa Yezu kuli kwa bulagirire bwenene.
3. Rhwanajira kantu kalebe lyo rhuyerekana oku rhuvuzire omunkwa
Orhanye obe walikola wazika (kuzama) cikone muntu mulebe ayishe akuyokole. Ka wanayibagira ebi oyo muntu akujirire? Erhi wanalonza enjira wakayerekanamwo oku ovuzire omunkwa kw’ebi akujirire?
Yehova ye warhuyokolaga. Osome 1 Yowane 4:8-10, na buzinda oganirire aga madoso:
Bulya gurhi enterekêro Yezu ahânaga eba ngalo yago-yago?
Gurhi ociyumva okubiyerekire ebi Yehova na Yezu bakujirire?
Gurhi wakajira ly’oyerekana oku ovuzire omunkwa kw’ebi Yehova na Yezu bakujirire? Osome 2 Abakorinti 5:15 na 1 Yowane 4:11; 5:3. Enyuma z’okusoma ngasi lwandiko, oganirire er’idoso:
Nk’oku osomire mw’olo lwandiko, bici rhushinganine rhujire lyo rhuyerekana oku rhuvuzire omunkwa kw’ebi Yehova na Yezu barhujirire?
4. Oyige olwiganyo lwa Yezu
Okuyiga olwiganyo lwa Yezu, yo yindi njira rhwakayerekanamwo oku rhuvuzire omunkwa kw’ebi Yehova na Yezu barhujirire. Osome 1 Petro 2:21, na buzinda oganirire er’idoso:
Omu njira nci wakayiga olwiganyo lwa Yezu erhi kushimba enshando zage n’obwishwekerezi?
Yezu alizigire Akanwa ka Nnâmahanga, akagihubiri, anakag’irhabala abandi
5. Okaja aha Kukengera olufû lwa Yezu
Ly’obona ebyajijirwe erhi Yezu arhondeza Ishega ly’Ebijingo lya Nnawirhu lirhanzi, osome Luka 22:14, 19, 20. Buzinda oganirire aga madoso:
Bici byajijirwe amango g’Ishega ly’Ebijingo lya Nnawirhu?
Bici omugati n’idivayi biba bishushanyize?—Olole omulongo gwa 19 n’ogwa 20.
Yezu alilonzize abanafunzi bage bakajira Ishega ly’Ebijingo lya Nnawirhu liguma omu mwaka, alilonzize bakajira ntyo omu lusiku lulinganine n’amango afâga. Abahamirizi ba Yehova banarhimanane haguma ngasi mwaka lyo bakengera olufû lwa Yezu nk’oku anarhegekaga. Ly’ociyigiriza binji okubiyerekire eyo ntimanano yago-yago, olole EVIDEO. Buzinda oganirire idoso likulikire.
Bici bijirwa aha Kukengera olufû lwa Yezu?
Omugati n’idivayi biba nyiganyo. Omugati guba gushushanyize omubiri mwimana Yezu ahânaga erhi rhwe rhurhuma. Idivayi liba lishushanyize omuko gwage
HALI ABANTU BADERHA NTYA: “Oyemere Yezu kone na ntyo wanayokoka.”
Gurhi wakakolesa olwandiko lwa Yowane 3:16 na Yakobo 2:17 ly’oyerekana oku hali ebindi bintu omuntu ashinganine ajire aha nyuma n’okuyemera Yezu kone?
KWA BOFOFI
Rhunayerekane oku rhuvuzire omunkwa kw’ebi Yezu arhujirire omu kuba n’obuyemere muli ye n’omu kukaja aha Kukengera olufû lwage.
Okucikengeza
Okuba n’obuyemere muli Yezu k’okuderha gurhi?
Gurhi wakayerekanamwo oku ovuzire omunkwa kw’ebi Yehova na Yezu bakujirire?
Bulya gurhi kuli kwa bulagirire okaja aha Kukengera olufû lwa Kristu?
OCIYIGIRIZE KWA BULÎRI
Bici olufû lwa Kristu lurhushumize rhujire?
Ociyigirize binji okubiyerekire obuyemere n’oku rhwakabuyerekanamwo.
“Onyesha Imani Yako Katika Ahadi za Yehova” (Ilabiro ly’Akalalizi, ly’Omwezi gwa 10, 2016)
Omu mwanzi gudesire “Sasa Niko Safi na Ninafurahia Maisha,” olole gurhi okusoma emyanzi ereyekire enterekêro Yezu ahânaga kwarhabire mukazi muguma.
“Biblia Inabadilisha Maisha ya Watu” (Ilabiro ly’Akalalizi, ly’omu lusiku 1/8/2011)
Olole bulya gurhi bantu basungunu bone balya omugati n’okunywa idivayi olusiku lw’Okukengera olufû lwa Yezu.