ISOMO LYA 29

Gurhi Biba Erhi Rhufâ?

Cacapirwe

K’okola ofîrirwe n’omuntu walizigire bwenene? Omu kasanzi kazibu kali nk’ako, hali amango wakacidosa ntya: ‘Gurhi biba erhi rhufâ? Ka rhwanacibone abazigirwa birhu bafîre?’ Mw’eci cigabi n’omu cikulikire rhwabona amashuzo Ebibliya ehânyire n’ago mashuzo ganarhurhuliriza.

1. Gurhi biba erhi rhufâ?

Yezu ashushanyize olufû n’îro ly’akadodo. Omuntu oli omw’îro ly’akadodo arhamanya ebiri byajirikana eburhambi bwage. Omu njira nci olufû luba lushushanyizibwe n’îro? Erhi omuntu afâ, arhakaciyumva malumwa. Ciru ankaba alizigire abantu b’omu mulala gwage n’abîra bage, arhakacibakengera. Ebibliya edesire ntya: ‘Abafîre barhamanyiri cici.’—Osome Omuhanûzi 9:5.

2. Bunguke buhi rhwakaba nabo erhi rhwakamanya okuli okubiyerekire olufû?

Bantu banji banakayoboha olufû, ciru n’abandi banayobohe abantu bafîre. Cikone ebi Ebibliya edesire lugenda olufû byanakurhuliriza. Yezu aderha ntya: “Okuli kwammurhenza omu buja.” (Yowane 8:32) Ebibliya erhaba eyigirizize oku omuntu ajira iroho garhafâ ligendekera lyalama enyuma z’okufâ k’omuntu, nk’oku madîni manji gaderha. Ntaye ogendekera alibuka enyuma z’okufâ. N’abafîre barhamanyiri kantu koshi-koshi, nta kantu koshi-koshi kabi bakarhujirira, n’omu ntyo, rhurhashinganini rhubaharamye erhi kubajirira kantu kalebe mpu lyo rhubasimisa, na kandi rhurhakabasengerera.

Bantu baguma baguma banaderhe mpu banaganira n’abafîre. Cikone oko kurhakahashikana. Nk’oku rhwanayizire, ‘abafîre barhamanyiri cici.’ Bala barhanya mpu bali baganira n’abazigirwa babo bafîre, banakaba erhi bali baganira n’abazimu, bulya abazimu banacijire nk’oyo muntu wafîre. Co cirhumire okumanya okuli lugenda abafîre kunarhulange rhurharhebagwa n’abazimu. Yehova arhuhanizize oku rhurhahira rhukaganiza abafîre bulya amanyire oku okujira ntyo kwanarhulerhera amazibu.—Osome Olushika 18:10-12.

HUMBIRIRA LY’OHUGÛKWA

Oyige binji okubiyerekire ebi Ebibliya eyigirizize lugenda olufû, olole n’ebiyerekine oku Nnâmahanga w’obuzigire arhakalibuza abafîre.

Omulume na bana bage babirhi badamire okuciti omu kasanzi k’okubisha mukage wafîre. Abantu b’omu mulala n’abîra babazungulusire lyo babarhuliriza n’okubarhabala.

3. Oyige okuli lugenda oku biba erhi omuntu afâ

Omw’igulu lyoshi abantu baba bayemire bintu binji biri lubero lugenda oku biba erhi omuntu afâ. Cikone ebyo baba bayemire arhali byoshi biba by’okuli.

Bwemere buhi bantu banji b’emunda olama bajira lugenda oku biba erhi omuntu afâ?

Ly’obona ebi Ebibliya eyigirizize, olole EVIDEO.

VIDEO: Gurhi Owamafâ Ayorha?—Hihimbi (1:19)

Enfoto: Enfoto ziri omu video ‘Abantu Bafîre Gurhi Bayorha?—Hihimbi.’ 1. Omuntu ofîre ali oku nshingo omu hopitali. 2. Mulume oli omu train adamire egarhi ka bantu babirhi ali îro.

Osome Omuhanûzi 3:20, na buzinda oganirire aga madoso:

Nk’oku olo lwandiko luyerekine, gurhi biba erhi omuntu afâ?
Ka hali ecigabi c’omuntu cigendekera calama enyuma z’okufâ?

Ebibliya erhuganirire lugenda olufû lwa Lazaro, mwîra wa Yezu. Omu kasanzi wayishiba oli wasoma Yowane 11:11-14, olole ebi Yezu adesire lugenda ehali Lazaro alimo erhi afâ. Buzinda oganirire aga madoso:

Bici Yezu ashushanyize n’olufû?
Bici ebi Yezu ashushanyagya n’olufû birhuyigirizize okubiyerekire ebiba erhi omuntu afâ?
K’orhanyize oku oko Ebibliya ehugwîre olufû kuyumvikine?

4. Okuli okubiyerekire olufû kunarhuhe bunguke bunji

Okumanya okuli okubiyerekire olufû kunarhurhabale rhurhayobohaga abafîre. Osome Omuhanûzi 9:10, na buzinda oganirire er’idoso:

K’abafîre banarhujira kubi?

Kandi, okumanya okuli kw’Ebibliya kunarhurhabale rhurhayemeraga enyigirizo z’okuderha oku hali akantu rhwakajirira abafîre lyo barhag’irhujira kubi erhi oku rhwanabaharamya. Osome Izaya 8:19 na Amafulûlo 4:11, na buzinda oganirire er’idoso:

Gurhi orhanyize Yehova aciyumva erhi abona omuntu aharamya owafîre erhi kumuhûna oburhabale?

Nfoto: Enkomêdu z’okurherekera abafîre. 1. Mulume ofukamire embere z’enshinda n’ebiryo by’okurherekera abafîre. 2. Balume ba bûko bulebe bayambirhe ebishâke by’okusama nabyo. 3. Bantu bayambirhe amaske badwirhe ebintu bishushire orhuvuha rhw’abantu. — Okumanya okuli okubiyerekire olufû kunarhukule omu bujà bwa nkomêdu nguma na nguma zirhasimisa Yehova

5. Okuli okubiyerekire olufû kunarhurhulirize

Bantu banji bayigirizibwe oku amango bafâ, banalibuzibwe erhi bijiro byabo bya mîra birhumire. Cikone rhurhulirizibwe okumanya oku nta muntu yeshi-yeshi ogendekera alibuka enyuma z’okufâ, ciru n’omuntu wakagijira mabi manji bwenene naye arhagendekera alibuka erhi afâ. Osome Abaroma 6:7, na buzinda oganirire er’idoso:

Ebibliya edesire oku erhi omuntu afâ analyule ebyaha byage byoshi, k’omu ntyo wanacirhanya oku omuntu wamafâ anacigendekera alibuka erhi byaha ajiraga mango mîra birhumire?

Oku rhwagendekera rhwamanya Yehova bwinja, ko rhwanagendekera rhwahugûkwa oku ntamango akalibuza omuntu wafîre. Osome Olushika 32:4 na 1 Yowane 4:8, na buzinda oganirire aga madoso:

K’orhanyize oku Nnâmahanga ogwerhe amorhere gaganirirwe mw’aga mandiko kobinali analibuza abantu bafîre?
K’obwine nk’okumanya okuli okubiyerekire olufû kwanarhuliriza? Bulya gurhi?

HALI ABANTU BADERHA NTYA: “Nnankayoboha ebyanampikire amango nafâ.”