ISOMO LYA 34
Gurhi Rhwakayerekanamwo oku Rhuzigire Yehova?
Kurhenga orhondire wayiga Ebibliya, k’okola ociyumva oku ozigire Yehova bwenene? K’osimire ogendekere wazibuhya obwîra bwawe haguma naye? Erhi akaba ntyo, okengere oku erhi Yehova akabona obuzigire bwawe kuli ye bwayushusire, ko naye akagendekera akuzigira n’okukushibirira. Gurhi wakajira ly’omuyereka oku omuzigire?
1. Gurhi rhwakayerekamwo Yehova oku rhumuzigire?
Rhunayerekane oku rhuzigire Yehova erhi rhumurhumikira. (Osome 1 Yowane 5:3.) Arhaseza muntu yeshi-yeshi oku amurhumikire. Lubero n’oko, ahîre ngasi muguma wirhu oluhûma lw’okucishoga, k’okuderha oku rhwanacishoga okumurhumikira erhi nanga. Bulya gurhi? Bulya Yehova aba alonzize rhube “bakurhumikira kurhenga omu murhima.” (Abaroma 6:17, NWT) Kuli kuderha oku aba alonzize rhumurhumikire, arhali mpu bulya rhusezibwe okumurhumikira, ci bulya rhumuzigire. Ecigabi ca 3 n’eca 4 c’eci citabu cakurhabala oyerekane oku ozigire Yehova omu kujira ebi ashagalukira n’okuyaka ebi ashomba.
2. Bulya gurhi kwakaba kuzibu okuyerekana obuzigire bwirhu kuli Yehova?
“Amahanya galugira omushinganyanya.” (Ennanga 34:19, Mashi Bible) Rhweshi rhunalwise obuzamba bwirhu bw’okurhaba bimana. Hali n’agandi mango rhulwisa amazibu gw’obukenyi, obubule bw’obushinganyanya, erhi agandi mazibu. Amango rhuli omu mazibu, rhwanabona nka kurhali kulembu okujira ebi Yehova arhuhûnyire rhujire. Oko kunahikire, bulya okushimba enjira mbi kunakabonekana nka ko kulembu. Cikone erhi wakagendekera wajira ebi Yehova akubwizire ojire, wanayerekana oku omuzigire kulusha akandi kantu koshi-koshi. Na kandi wanayerekana oku oli mwishwekerezi kuli ye. Na ntyo, naye anagendekera aba mwishwekerezi kuli we, arhankanakuleka ciru n’ehitya.—Osome Ennanga 4:3.
HUMBIRIRA LY’OHUGÛKWA
Olole bulya gurhi okurhumikira Yehova kuli kwa bulagirire, oyige n’ebyakakurhabala ly’ogendekera wamurhumikira.
3. Amashitaka gakuyerekire
Nk’oku biyerekinwe omu citabu ca Ayubu, Shetani amushitasire, cikone arhali yene ashitasire ci n’abantu boshi balonza okukolera Yehova. Osome Ayubu 1:1, 6–2:10, na buzinda oganirire aga madoso:
Bici Shetani ayerekine oku byo byakagirhuma Ayubu arhumikira Yehova?—Olole Ayubu 1:9-11.
Bici Shetani ashobesire bene bantu boshi, ciru na nawe?—Olole Ayubu 2:4.
Osome Ayubu 27:5b, na buzinda oganirire er’idoso:
Gurhi Ayubu ayerekinemwo oku kobinali alizigire Yehova?
Ayubu ayerekine oku azigire Yehova omu kubêra mwishwekerezi kuli ye
Rhunayerekane oku rhuzigire Yehova omu kubêra bishwekerezi kuli ye
4. Oshagaluse omurhima gwa Yehova
Osome Emigani 27:11, na buzinda oganirire aga madoso:
Gurhi Yehova aciyumva erhi abona wakola n’obwenge n’amango omurhumikire? Bulya gurhi?
5. Wanaba mwishwekerezi kuli Yehova
Okuzigira Yehova kunarhushumye rhubwire abandi okubimuyerekire. Obwishwekerezi kuli ye bunarhushumye rhumurhumikire ciru n’amango birhali bilembu okujira ntyo. Olole EVIDEO, na buzinda oganirire aga madoso gakulikire.
Ka hali amango obona kuli kuzibu okubwira abandi okubiyerekire Yehova?
Nk’oku obwine mw’eyo video, bici byarhabire Grayson arhacikag’iyoboha okubwira abandi enyanya z’obuyemere bwage?
Kuba kulembu okuba mwishwekerezi kuli Yehova erhi rhwakazigira ebi azigira n’okushomba ebi ashomba. Osome Ennanga 97:10, na buzinda oganirire aga madoso:
Kugerera kw’ebi wamakayiga, bintu bihi wahugûsirwe Yehova azigira? Na bintu bihi ashomba?
Bici byakakurhabala osime ebintu binja, oshombe n’ebintu bibi?
6. Rhunabe n’obunguke erhi rhurhumikira Yehova
Ngasi mango okurhumikira Yehova kunakalerha obunguke. Osome Izaya 48:17, 18, na buzinda oganirire aga madoso:
K’oyemire kobinali oku Yehova amanyire ebyakarhulerhera obunguke? Bulya gurhi?
Kuhikira buno ebi wamakayiga omu Bibliya na kuli Yehova Nnâmahanga, bunguke buci byamakakulerhera?
HALI ABANTU BADERHA NTYA: “Ciru nakajira ebinja erhi ebibi, Nnâmahanga arhacihangayisa n’ebyo.”
Lwandiko luhi wakakolesa ly’oyereka omuntu ogwerhe ezo ntanya oku ebijiro birhu byanashagalusa Yehova erhi bimushologose?
KWA BOFOFI
Wanayerekana oku ozigire Yehova omu kumurhumikira n’okugendekera kwabêra mwishwekerezi kuli ye ciru n’omu kasanzi k’amazibu.
Okucikengeza
Bici olwiganyo lwa Ayubu lukuyigirizize?
Gurhi wakayerekanamwo oku ozigire Yehova?
Bici byakakurhabala ogendekere wabêra mwishwekerezi kuli Yehova?
OCIYIGIRIZE KWA BULÎRI
Olole gurhi wakajira ly’oba mwishwekerezi kuli Yehova n’ecigamba.
Oyige binji okubiyerekire amashitaki Shetani ashitasire bene bantu.
“Yobu Anaendelea Kuwa Mushikamanifu” (Biblia Iko na Habari Gani? Sehemu ya 6)
Olole gurhi emisole yakayerekana oku ezigire Yehova.
Gurhi omusole guli gwashumikwa n’eyabo misole oku gujire amabi gwakabêramwo mwishwekerezi kuli Yehova?